မန္တလေးတိုင်း၊ သပိတ်ကျင်းမြို့နယ်တွင် ရက်သတ္တပတ်ကြာ စစ်ကြောင်းထိုးနေသော စစ်ကောင်စီစစ်ကြောင်းအား လိုက်လံတိုက်ခိုက်ရာ ထိခိုက်မှုများကြောင်း သပိတ်ကျင်းမြို့နယ်(ပကဖ)၊ TBKတောဆင်ရိုင်းပြောက်ကျားတပ်ဖွဲ့က သတင်းထုတ်ပြန်သည်။
အောက်တိုဘာ ၁၃ ရက်မှ ၂၁ရက်အထိ ရက်တစ်ပတ်အတွင်း စစ်ကောင်စီတပ်နှင့် ဒေသတွင်းတော်လှန်ရေးအင်အားစုများ တိုက်ပွဲများဖြစ်ပွားပြီး စစ်ကောင်စီဘက်မှ ထိခိုက်သေဆုံးမှုများကြောင်း TBKတောဆင်ရိုင်းပြောက်ကျားတပ်ဖွဲ့က အသိပေးသည်။
အောက်တိုဘာ ၁၅ ရက် ညနေ ၃နာရီ မိနစ် ၄၀ခန့်က သပိတ်ကျင်းရှိ တတက(၁၃) လေ့ကျင့်ရေးတပ်မှ အင်အား ၁၅၀ခန့်ပါ စစ်ကောင်စီစစ်ကြောင်းသည် တပ်စိပ်များခွဲကာ အင်အားဖြန့်ပြီး စစ်ကြောင်းထိုးလာခဲ့သည်ဟု ဆိုသည်။
အဆိုပါ စစ်ကြောင်းအား လက်ပံကုန်းကျေးရွာအနီးတွင် ဒရုန်းဖြင့် ဗုံးသီး နှစ်လုံးချတိုက်ခိုက်ခဲ့ကြောင်း TBK တောဆင်ရိုင်းပြောက်ကျားတပ်ဖွဲ့၏ တာဝန်ရှိသူက ပြောသည်။
Public Service Announcement
တိုက်ခိုက်မှုကြောင့် စစ်ကောင်စီတပ်သား ခုနစ်ဦးခန့် ဒဏ်ရာရပြီး နာရေးကားများဖြင့် ကြာညှပ်ဆေးရုံသို့ ပို့ဆောင်ခဲ့ရသည်ဟု မြေပြင်ရှိသူများက အတည်ပြုကြောင်း အထက်ပါတာဝန်ရှိသူက ဆိုသည်။
အောက်တိုဘာ ၁၇ ရက်ကလည်း အင်အား ၄၀ ခန့်ပါ စစ်ကောင်စီစစ်ကြောင်းနှင့် ရေယဥ်ကျေးရွာအနီးတွင် တိုက်ပွဲဖြစ်ပွားခဲ့ကြောင်း၊ စစ်ကောင်စီတပ် ထိခိုက်မှုများ၍ ရေယဥ်ကျေးရွာ နေအိမ်များ မီးရှိ့ဖျက်ဆီးသွားကြောင်း TBK တောဆင်ရိုင်းပြောက်ကျားတပ်ဖွဲ့၏ တာဝန်ရှိသူက ပြောသည်။
“နေ့တိုင်းဖြစ်တယ်။ တစ်ရက်ကို အနည်းဆုံး နှစ်ကြိမ်လောက်ဖြစ်ခဲ့တာ။ ဖြစ်တာက နေရာအစုံပဲ။မြို့နယ်(ပကဖ) အဖွဲ့တွေ အားလုံးဝိုင်းဆော်ကြတာ။ အခုတော့ တကောင်းတိုက်နယ်ထဲရောက်သွားပြီ။”ဟု ၎င်းက ဆိုသည်။
