ရန်ကုန်-မန္တလေး အမြန်လမ်းပေါ်ရှိ သပြေစမ်းရဲကင်းစခန်းအား သွားရောက်တိုက်ခိုက်ရာ စစ်အုပ်စုဝင်များ ထိခိုက်သေဆုံးမှုရှိနိုင်ကြောင်း တိုက်ဒေါင်းပြည့်သူ့တော်လှန်ရေးအင်အားစု၏ ပြန်ကြားရေးတာဝန်ခံကိုပုညက ပြောသည်။
ယနေ့ နိုဝင်ဘာလ ၆ ရက် နံနက် ၁ နာရီခွဲခန့်က ရမည်းသင်းမြို့နယ်၊လွှစင်အုပ်စု၊သပြေစမ်းကျေးရွာအနီး၊ ရန်ကုန်- မန္တလေး အမြန်လမ်း မိုင်တိုင်အမှတ် ၂၄၉/၂၅၀ရှိ သပြေစမ်းရဲကင်းစခန်းအား ဒေသတွင်းတော်လှန်ရေးအင်အားစုများက သွားရောက်တိုက်ခိုက်ခဲ့ခြင်းဖြစ်သည်။
စခန်း၌ စစ်ကောင်စီတပ်နှင့်ရဲအင်အား ၁၇ ဦးထက်မနည်းရှိပြီး ၎င်းတို့က ပြန်လည်ပစ်ခတ်ခဲ့၍ မိနစ်၂၀ခန့် အပြန်အလှန်ပစ်ခတ်ခဲ့ကြကြောင်း၊ စစ်အုပ်စုဝင် ၄ ဦးသေဆုံးသည်ဟု သတင်းရသော်လည်း အတည်မပြုနိုင်သေးကြောင်း တိုက်ဒေါင်းပြည့်သူ့တော်လှန်ရေးအင်အားစု၏ ပြန်ကြားရေးတာဝန်ခံ ကိုပုညက ပြောသည်။
“ပေငါးဆယ်လောက်အထိ ကပ်နိုင်ခဲ့တယ်။ညကြီးဆိုတောသိပ်မမြင်ရဘူး။ ဒေသခံတွေပြောတာတော့ လူနာတင်ယာဥ်လာတာတွေ့တယ်ပြောတယ်။သေဆုံးမှုရှိမယ်။ ကျွန်တော်တို့ကမောင်းပြန်အင်အားရှိသလောက်ပဲ လူကလိုက်သွားရတာဆိုတော့ စခန်းတော့မသိမ်းနိုင်ခဲ့ဘူး။ သူတို့မှာက စက်လက်တစ်လက်လဲရှိတယ်။ပြန်ဆုတ်ချိန်နဲ့ဆို ၄၅ မိနစ်လောက် ထိတွေ့မှုရှိခဲ့တယ်။”ဟု ကိုပုညကပြောသည်။
Public Service Announcement
တိုက်ခိုက်ခံရသည့်ရဲစခန်းသို့ တစ်နာရီခန့် အကြာတွင် စစ်ကူရောက်လာခဲ့သည်ဟု သိရသည်။
ထိုစစ်ဆင်ရေးကို တိုက်ဒေါင်းပြည်သူ့တော်လှန်ရေးအင်အားစု၊ သာစည် (ပကဖ)၊ မြို့သစ် (ပကဖ)၊ တပ်ရင်း(၉၀၃)ဂဠုန် PDF၊ တပ်ခွဲ (၁) နတ်မောက် ကျားသစ်နက်တပ်ဖွဲ့၊ဗိဿနိုးလက်အောက်ခံ(ကြိုးကြာနီတပ်ဖွဲ့)၊ နတ်မောက် (ပကဖ)တို့က စနစ်တကျ ပူးပေါင်းတိုက်ခိုက်ခဲ့ကြောင်း အသိပေးထားသည်။
တိုက်ဒေါင်းပြည်သူ့တော်လှန်ရေးအင်အားစုနှင့်မဟာမိတ်များသည် စက်တင်ဘာလ ၂၃ ရက်နေ့ကလည်း ပျော်ဘွယ်မြို့နယ်၊ ညောင်ကုန်းတိုက်နယ်ရဲစခန်းကို သွားရောက်ပစ်ခတ်တိုက်ခိုက်ရာ ရဲ၃ဦးသေဆုံးခဲ့သည်။
