ဆိုင်ခန်း ၁၅၀ခန့်ရှိသော ပုဏ္ဏားကျွန်းမြို့ရှိ မြို့မဈေးသည် စစ်ကောင်စီရေတပ်က ပစ်ခတ်သော လက်နက်ကြီး ကျရောက်ပေါက်ကွဲခဲ့သောကြောင့် တစ်ဈေးလုံး မီးလောင်ဆုံးရှုံးခဲ့ရကြောင်း အဆိုပါ မြို့ခံများက ပြောသည်။
ရခိုင်ပြည်နယ် ပုဏ္ဏားကျွန်းမြို့ရှိ မြို့မဈေးသည် ယမန်နေ့(နိုဝက်ဘာ၂၄ရက်) ညနေ ၃နာရီခန့်ကလက်နက်ကြီးကျရောက်ပေါက်ကွဲခဲ့ပြီး မီးလောင် ခဲ့ခြင်းဖြစ်သည်။
“တစ်ခန်းမှ အကောင်းပြန်မရပါဘူး။ အကုန်လောင်သွားတယ်” ဟု မြို့ခံတစ်ဦးကပြောသည်။
ယမန်နေ့က ဈေးမီးလောင်နေစဉ် မီးငြိမ်းသတ်ရန် လာသည့် မီးသတ်ကားများအား ပုဏ္ဏားကျွန်း အခြေစိုက် ခမရ(၅၅၀)တပ်ရင်းက သေနတ်ဖြင့်ပစ်ခတ် တားဆီးခဲ့သောကြောင့် မီးမထိန်းနိုင်ခဲ့ခြင်းဟု ရက္ခိုင့်တပ်တော်(AA)နှင့် နီးစပ်သူတစ်ဦးကပြောသည်။
Public Service Announcement
ထို့အပြင် ယမန်နေ့ညက စစ်ကောင်စီက လက်နက်ကြီးပစ်ခတ်မှုကြောင့် ပုဏ္ဏားကျွန်းမြို့မှအရပ်သားတစ်ဦး ဒဏ်ရာရခဲ့သည်ဟုသတင်းရရှိသည်။
စစ်ကောင်စီတပ်သည် ရခိုင်လူထုကို ဦးတည်၍ ပစ်မှတ်ထားသတ်ဖြတ်ခြင်း၊ စစ်ရာဇဝတ်မှုကျူးလွန်နေကြောင်း AAက နိုဝင်ဘာလ ၁၆ရက် တွင် သတင်းထုတ်ပြန်သည်။
ရက္ခိုင့်တပ်တော်သည် ရက္ခိုင်ပြည်သူလူထု၏ အသက်၊ အိုးအိမ်၊ စည်းစိမ်တို့ကို အမြဲတမ်းကာကွယ်ပေးလျက်ရှိပြီး ပြည်သူလူထုအားဒုက္ခရောက်ရန် ပြုလုပ်သော မည်သူ့ကိုမဆို တားဆီးတိုက်ဖျက်သွားမည်ဖြစ်ပြီး အာရက္ခပြည်သူလူထုများအား သတ်ဖြတ်နေသော စစ်ကောင်စီတပ်ဖွဲ့ ဝင်များကိုလည်း လက်စားချေ တုံ့ပြန်သွားမည်ဟု AAက ထုတ်ပြန်ထားသည်။
