အမျိုးသားညီညွတ်ရေးအစိုးရ(NUG)၊ မဟာမိတ်ဆက်ဆံရေးကော်မတီနှင့် ကချင်နိုင်ငံရေးဆိုင်ရာ စုဖွဲ့မှုဖြစ်သည့် Kachin Political Interim Coordination Team (KPICT)တို့ ယမန်နေ့တွင် တွေ့ဆုံဆွေးနွေးခဲ့ကြောင်း NUGက သတင်းထုတ်ပြန်သည်။
နိုဝင်ဘာ ၃၀ရက် နံနက် ၁၀နာရီတွင် အွန်လိုင်းမှ ပြုလုပ်ခဲ့သည့် တွေ့ဆုံဆွေးနွေးမှုတွင် ကချင်လွတ်လပ်ရေးအဖွဲ့(KIO) ခေါင်းဆောင်တစ်ဦးဖြစ်သည့် ဗိုလ်ချုပ်ကြီး ဂွမ်မော်၊ KPICT ဥက္ကဋ္ဌ ဆရာကြီး တူးရှန် ဦးဆောင်သည့် အဖွဲ့ဝင်များ တက်ရောက်ခဲ့ပြီး NUG ဘက်က မဟာမိတ်ဆက်ဆံရေးကော်မတီမှ အဖွဲ့ဝင် ဝန်ကြီးများ၊ ဒုတိယဝန်ကြီးများ၊ အကြံပေးများနှင့် အတွင်းရေးမှူးများ ပါဝင်တက်ရောက်ခဲ့ကြောင်း အသိပေးသည်။
တွေ့ဆုံစဉ် တော်လှန်ရေးကာလ စစ်ရေး၊ နိုင်ငံရေး၊ နိုင်ငံခြားရေးနှင့် ဝန်ဆောင်မှုလုပ်ငန်း အရပ်ရပ်ကို ဆွေးနွေးသုံးသပ်မှုများ ပြုလုပ်ခဲ့သည်ဟု ထုတ်ပြန်သည်။
လက်ရှိ ပူးပေါင်းဆောင်ရွက်နေသည့် ကဏ္ဍရပ်များ ပိုမိုအားကောင်းရေး၊ တော်လှန်ရေးအောင်မြင်ရေးအတွက် လက်တွဲဆောင်ရွက်မည့် ရှေ့လုပ်ငန်းစဉ်များကို ဆွေးနွေးချမှတ်ခဲ့ကြောင်း ဖော်ပြထားသည်။
Public Service Announcement
ယခင်ကလည်း NUG တာဝန်ရှိသူများနှင့် ဗိုလ်ချုပ်ဂွန်မော်ပါဝင်သည့် KPICT တာဝန်ရှိသူများ အကြား တွေ့ဆုံဆွေးနွေးမှုများ လုပ်ဆောင်ခဲ့ဖူးသည်။
KIO အနေဖြင့် KPICTမှတဆင့် အမျိုးသားညီညွတ်ရေးအစိုးရနှင့် ဆက်သွယ်ပြီး နိုင်ငံရေးဆိုင်ရာ ကိစ္စရပ်များဆွေးနွေးညှိနှိုင်းလုပ်ဆောင်လျက်ရှိသည်။
