ပုလဲမြို့နယ်ရှိ မြကုန်းရွာကို စစ်တပ်က မီးရှို့ဖျက်ဆီးပြီး စိတ်ကျန်းမာရေးမကောင်းသူတစ်ဦးကို သတ်ဖြတ်

စစ်ကိုင်းတိုင်း၊ ယင်းမာပင်ခရိုင်၊ ပုလဲမြို့နယ်ရှိ မြကုန်းကျေးရွာကို စစ်ကောင်စီတပ်က မီးရှို့ဖျက်ဆီးပြီး စိတ်ကျန်းမာရေးမကောင်းသူကလေးတစ်ဦးကို သတ်ဖြတ်ကာ ပြည်သူ့ကာကွယ်ရေးတပ်(PDF)ဝတ်စုံဝတ်ပေးသွားကြောင်း ပုလဲမြို့နယ်ပြည်သူ့အုပ်ချုပ်ရေးအဖွဲ့က ပြောသည်။

ဒီဇင်ဘာ ၁ ရက်က မြကုန်းကျေးရွာအား စစ်ကောင်စီတပ်များက ဝင်ရောက်စီးနင်းပြီး မီးရှို့ဖျက်ဆီးရာ နေအိမ် ၁၈လုံး ပျက်စီးဆုံးရှုံးခဲ့ကြောင်း၊ ထို့အပြင် စိတ်ကျန်းမာရေးမကောင်းသည့် အသက် (၁၆)နှစ်အရွယ် ယောကျာ်းလေးတစ်ဦးကိုလည်း သတ်ဖြတ်ပြီး PDF ဝတ်စုံ ဝတ်ပေးသွားကြောင်း ပုလဲ(ပအဖ)အဖွဲ့၏ လူသားစာနာတာဝန်ခံက ပြောသည်။

“စိတ်မနှံ့တဲ့ကလေးကိုဖမ်းပြီး ဓားနဲ့ထိုးသတ်သွားတယ်။ အဲဒီကလေးက​ဘောင်းဘီမဝတ်တတ်တဲ့ကလေးကို PDF ​ဘောင်းဘီဝတ်ပေးပြီးတော့ အလောင်းလည်းထားခဲ့တယ်။”ဟု အထက်ပါတာဝန်ခံက ပြောသည်။

ထိုနေ့က မြကုန်းကျေးရွာအနီး၌ စစ်ကောင်စီတပ်နှင့် ဒေသတွင်း PDFအဖွဲ့အချို့ ထိတွေ့မှုဖြစ်ပွားပြီး စစ်အုပ်စုထိခိုက်မှုရှိကြောင်း၊ ပြည်သူ့ရဲဘော်တစ်ဦးလည်းကျဆုံးခဲ့ကြောင်း ဒေသတွင်းသတင်းရင်းမြစ်များက ပြောသည်။

Public Service Announcement

နိုဝင်ဘာ၁၂ ရက်ကလည်း ပုလဲမြို့နယ် အေးကုန်းကျေးရွာကို စစ်ကောင်စီတပ်က မီးရှို့ဖျက်ဆီးခဲ့ရာ နေအိမ် ၁၆လုံး မီးလောင်ပျက်စီးခဲ့သည်။