တောင်သာနယ်တွင် စစ်ကောင်စီယာဥ်တန်းကို မိုင်းဆွဲတိုက်ခိုက်

မန္တလေးတိုင်း၊ တောင်သာမြို့နယ်တွင် စစ်ကောင်စီယာဥ်တန်းအား မိုင်းဆွဲတိုက်ခိုက်ရာ ထိခိုက်သေဆုံးမှုရှိကြောင်း ​ဒေသတွင်းတော်လှန်ရေးအင်အားစုများက ပြောသည်။

ဒီဇင်ဘာ ၅ ရက် နံနက် ၁၀ နာရီခွဲခန့်ကတောင်သာမြို့နယ် ကျွဲတလင်းကျေးရွာပျူစောထီးများထံမှ ပြန်လာသော စစ်ကား သုံးစီးအား ရှေ့ထွက်မိုင်း သုံးလုံးဖြင့် မိုင်းဆွဲတိုက်ခိုက်ခဲ့ကြောင်း ညောင်ဦးခရိုင်ပကဖ(ပုဂံပြည်ဘီဘူးတပ်)၏ တာဝန်ရှိသူက ပြောသည်။

“သူတို့အပြန်မှာ မိုင်းဆွဲတာပါ။ အင်အား ၃၀ ကျော်ပါတယ်။ စစ်ကား သုံးစီးထဲက တစ်စီးကို မိုင်းဆွဲခဲ့တာပါ။”ဟု ၎င်းက ပြောသည်။

တိုက်ခိုက်မှုကြောင့် စစ်သား နှစ်ဦးသေဆုံးပြီး ၅ ဦး ပြင်းထန်ဒဏ်ရာရရှိကြောင်း ၎င်းတာဝန်ရှိသူက ဆိုသည်။

Public Service Announcement

ဒဏ်ရာရရှိသော စစ်သား ၅ ဦးအား မိတ္ထီလာဆေးရုံသို့ သယ်ဆောင်သွားကြောင်း မြင်းခြံခရိုင် တပ်ရင်း (၃)က အသိပေးသည်။

အဆိုပါ စစ်ဆင်ရေးအား မြင်းခြံခရိုင် တပ်ရင်း (၃)၊ ညောင်ဦးခရိုင် ပကဖ(ပုဂံပြည်ဘီဘူးတပ်)နှင့် အခြားမဟာမိတ်အဖွဲ့များ တိုက်ခိုက်ခဲ့ခြင်းဖြစ်သည်။

နိုဝင်ဘာ ၂၉ ရက်ကလည်း တောင်သာမြို့နယ်၊ တစ်မိုက်သာကျေးရွာရှိ ပျူစောထီးခေါင်းဆောင်နေအိမ်အား မြင်းခြံခရိုင်အမှတ်(၃)တပ်ရင်းနှင့် မဟာမိတ်အဖွဲ့များက ဝင်တိုက်ရာ ပျူတစ်ဦးသေဆုံးပြီး သေနတ်၅ လက်နှင့် ခဲယမ်းများရရှိခဲ့သေးသည်။