သံတွဲမြို့နယ်တွင်မြေမြှုပ်ထားခဲ့သည့်စစ်သားအလောင်းများ မိုးသည်းထန်စွာရွာသွန်းပြီး​နောက် ပြန်​ပေါ်လာ၍​ဒေသခံများက သဂြိုလ်​ပေး​နေရ

ဇော်ရမ်း/People’s Spring

ရခိုင်ပြည်နယ်၊ သံတွဲမြို့နယ်တွင်ဖြစ်ပွားနေသော တိုက်ပွဲများအတွင်း သေဆုံးသွားသည့် စစ်ကောင်စီရုပ်အလောင်းအချို့ကို ဒေသခံများ၏ နေအိမ်ခြံဝင်းများအတွင်း မြုပ်နှံသွားရာ ယခုရက်ပိုင်း မိုးသည်းထန်စွာရွာသွန်းပြီးနောက် အဆိုပါရုပ်အလောင်းများ ပြန်ပေါ်လာခဲ့သည်။

“မြုပ်ထားတာတွေက ဟိုတစ်စု ဒီတစ်စုနဲ့။ နောက်ပြီး ဖြစ်သလိုမြုပ်သွားတာ။ မြေကို တစ်တောင် ကျော်ကျော်လေးတူးမြုပ်တာတောင် ရှိတယ်။ မိုးရွာတော့ အကုန်ပြန်ပေါ်လာတာ” ဟု သံတွဲဒေသခံတစ်ဦးကပြောသည်။

ဧပြီလမှစ၍ စစ်ကောင်စီနှင့် အာရက္ခတပ်တော်(AA)တိုက်ပွဲအပြင်းအထန်ဖြစ်ပွားခဲ့သည့် သံတွဲမြို့နယ် လင်းသီရွာ နှင့် ကျောင်းကုန်းရွာတို့၌ စစ်ကောင်စီရုပ်အလောင်းအချို့တွေ့ရှိရခြင်းဖြစ်သည်။

Public Service Announcement

ထိုရွာနှစ်ရွာတွင်စစ်ကောင်စီကတပ်စွဲခဲ့၍ ဒေသခံများထွက်ပြေးတိမ်းရှောင်ခဲ့ကြရသည်။ တိုက်ပွဲများအတွင်းအထိနာပြီးနောက် စစ်ကောင်စီသည် ထိုနေရာများမှ ဆုတ်ခွာထွက်‌ ပြေးနေရသည်။

“တိုက်ပွဲမှာ ကျတဲ့သူတွေကို ချောင်းနဲ့နီးရင်ချောင်းထဲကိုပစ်သွားတယ်။ ချောင်းနဲ့ဝေးတဲ့နေရာတွေမှာဆိုရင် မြေမြုပ်သွားတဲ့သဘောပဲ။ မနေ့ကအထိ ကျောင်းကုန်းရွာမှာသုံးလောင်း၊ လင်းသီရွာမှာနှစ်လောင်းတွေ့ပါတယ်ဗျ”ဟု ဒေသခံတဦးကပြောသည်။

အဆိုပါရုပ်အလောင်းများကို ဒေသခံများကမီးရှို့သင်္ဂြိုဟ်​ပေးခဲ့ကြသည်။

ပြီးခဲ့သည့် မေလ ၂၁ရက်ကလည်း လင်းသီရွာချောင်းအတွင်း မျောပါလာသော စစ်ကောင်စီရုပ်အလောင်း ၁၀ လောင်းထက်မနည်းကို ဒေသခံများက တွေ့ရှိခဲ့ကြသည်။

သံတွဲမြို့နယ်တွင် ဧပြီလ၂၂ရက်ကတည်းက တိုက်ပွဲစတင်ဖြစ်ပွားခဲ့ပြီး ဒေသခံပြည်သူ နှစ်သောင်းခန့်သည် ဘေးလွတ်ရာသို့တိမ်းရှောင်နေကြရသည်။ တိုက်ပွဲအတွင်းစစ်ကောင်စီကလေကြောင်းနှင့်လက်နက်ကြီးတိုက်ခိုက်မှုကြောင့် အရပ်သားသေဆုံးမှုများရှိခဲ့သည်။

မေလ ၁၄ ရက်နေ့က သံတွဲမြို့နယ် လင်းသီကျေးရွာကို စစ်ကောင်စီတပ်က လက်နက်ကြီးဖြင့် ပစ်ခတ်တိုက်ခိုက်ရာ အရပ်သား ဆယ်ဦးသေဆုံးခဲ့ပြီး ၃ ဦးထက်မနည်း ထိခိုက်ဒဏ်ရာရရှိခဲ့ကြောင်း၊ မေလ ၁၈ရက်ကလည်း တိုက်ပွဲအပြင်းအထန်ဖြစ်နေစဉ် နတ်တောင်မော်ကျေးရွာကိုစစ်ကောင်စီက ဂျက်ဖိုက်တာဖြင့်ဗုံးကြဲတိုက်ခိုက်ရာ အရပ်သား ရှစ်ဦးသေဆုံးခဲ့ကြောင်း ဒေသခံများကပြောသည်။

သံတွဲဒေသတိုက်ပွဲ၌ စစ်ကောင်စီမှ​သေဆုံးဒဖဏ်ရာရသူများနေပြီး အရာရှိအချို့လည်းထွက်ပြေးသွားကြောင်း မြေပြင်စစ်ရေးသတင်းရင်းမြစ်အချို့ကပြောသည်။ ယခုအခါ သံတွဲမြို့နေရာအများစုကို AAက ထိန်းချုပ်ထားပြီး စစ်ရေးအသာစီးရယူထားသည်ဟု ဒေသခံများကပြောသည်။

ဘူးသီးတောင်၊ မောင်တော၊ သံတွဲမြို့နယ်များတွင် တိုက်ပွဲများဆက်လက်ပြင်းထန်နေပြီး ယင်းဒေသရှိ နိုင်ငံတကာအဖွဲ့အစည်းများအနေဖြင့်လုံခြုံရေးအတွက် ဘေးလွတ်ရာသို့ ကြိုတင်ရွှေ့ပြောင်းထားကြရန် နှင့် အကယ်၍ စစ်ပွဲအန္တရာယ်ဇုန်ကြား ပိတ်မိခဲ့ပါက အချိန်မရွေး ဆက်သွယ်အကူအညီတောင်းခံနိုင်ကြောင်းအာရက္ခတပ်တော်(AA)က မေလ ၂၀ရက်တွင် ထုတ်ပြန်ထားသည်။