စဉ့်ကူးမြို့ကို စစ်ကောင်စီ လက်နက်ကြီးဖြင့်ပစ်ခတ်နေ

ယောနသံ/People’s Spring

မန္တလေး PDFပူးပေါင်းတပ်များ သိမ်းပိုက်ထိန်းချုပ်ထားသည့် စဥ့်ကူးမြို့ကို စစ်ကောင်စီက လက်နက်ကြီးများဖြင့် ပစ်ခတ်နေသည်။

စဉ်ကူးမြို့နယ်အတွင်းရှိ စစ်ကောင်စီ စခန်းများအားလုံးနှင့် စဉ့်ကူးမြို့ကို ဇူလိုင် ၁၇ရက်တွင် မန္တလေး PDF ပူးပေါင်းတပ်များက အပြီးသတ် သိမ်းပိုက်ခဲ့ခြင်းဖြစ်သည်။ စစ်ကောင်စီသည် ဧရာဝတီမြစ်တစ်ဖက်ကမ်း ကျောက်မြောင်းမြို့နယ် မခေါက်ရွာ၌တပ်စွဲကာ လက်နက်ကြီးများတပ်ဆင်၍ စဉ့်ကူးမြို့ကို ပစ်ခတ်နေခြင်းဟု ဒေသခံများက ပြောသည်။

Public Service Announcement

” ကျောက်မြောင်းက မခေါက်ရွာကို စစ်ကောင်စီက ဝင်တပ်စွဲတယ်။ စဉ့်ကူးကို လက်လွှတ်လိုက်ရတော့ မခေါက်ရွာကို သင်္ဘောတွေနဲ့ အင်အားတွေလာပို့တယ်။ ဒီအတိုင်းမလာရဲလို့လေကြောင်းအကူနဲ့လာတာ”ဟု စဉ့်ကူးမြို့မှ ကာကွယ်ရေးရဲဘော်တစ်ဦးက ပြောသည်။

မခေါက်ကျေးရွာသည် စဉ့်ကူးမြို့နင့် ဧရာဝတီမြစ်ခြားသည်။ စဉ့်ကူးမြို့ဘက်သို့ ယမန်နေ့(ဇူလိုင်၂၂ရက်)က လက်နက်ကြီး နှစ်ကြိမ်ပစ်ခတ်ခဲ့သော်လည်း လူထိခိုက်မှုမရှိခဲ့ကြောင်း ပြည်သူ့ကာကွယ်ရေးရဲဘော်တစ်ဦးက ပြောသည်။

စစ်ကောင်စီသည် ဇူလိုင် ၁၉ရက်က ဧရာဝတီမြစ်အတွင်း စစ်သင်္ဘောများပေါ်မှ စဉ့်ကူးမြို့တွင်းကို လက်နက်ကြီးများဖြင့်ပစ်ခတ်ခဲ့သလို လေကြောင်းမှလည်း တိုက်ခိုက်ခဲ့သည်။ ထို့အပြင် စဉ့်ကူးမြို့အား ပြန်လည်ထိန်းချုပ်နိုင်ပြီဖြစ်ကြောင်း သတင်းလိမ်လည်း ထုတ်ပြန်ခဲ့သေးသည်။

စဉ့်ကူးမြို့သိမ်းတိုက်ပွဲတွင် စစ်ကောင်စီတပ်မှ ဒုဗိုလ်မှူးကြီးနှင့် ဗိုလ်မှူးအပါအဝင် ၂၈ ဦး ဖမ်းဆီးထားကြောင်း မိုးကုတ်ဗျူဟာ အမှတ် (၁၂၂၂) တပ်ရင်းက ဇူလိုင် ၂၁ရက်တွင် သတင်းထုတ်ပြန်ထားသည်။

ဇူလိုင် ၂၀ရက်က ကျောက်မြောင်းစစ်တပ်မှ လက်နက်ကြီးဖြင့် ပစ်ခတ်ခဲ့၍ စဥ့်ကူးမြို့နယ်၊ လက်ပန်လှရွာ၊ ပြည်စိုးအောင်ရပ်ကွက်အတွင်း ကျရောက်ပေါက်ကွဲခဲ့ကြောင်း ဒေသခံအချို့က ပြောသည်။