ဟန်နွေ/People’s Spring
မန္တလေးတိုင်း မိုးကုတ်မြို့ကို အပြီးသတ်သိမ်းပိုက်နိုင်ပြီဖြစ်ကြောင်း တအာင်းတပ်မတော် (TNLA)က အတည်ပြုသည်။
ယနေ့ ဇူလိုင် ၂၄ရက်တွင် မိုးကုတ်မြို့နယ်အတွင်း တော်လှန်ရေးတပ်ဖွဲ့များအား ပြည်သူလူထုများက ကြိုဆိုနေသည့် ဓာတ်ပုံများကို စစ်မြေပြင် သတင်းရင်းမြစ်က ဖော်ပြခဲ့သည်။
Public Service Announcement
အဆိုပါ အခြေအနေနှင့်ပတ်သက်၍ TNLA ပြောရေးဆိုခွင့်ရှိသူ လွေးယေဦးက မိုးကုတ်မြို့ကို အပြီးသတ် သိမ်းနိုင်ပြီဟု ပြောသည်။
“ဒီနေ့ အပြီးသတ် သိမ်းပိုက်နိုင်ခဲ့ပါတယ်”ဟု လွေးယေဦးက ပြောသည်။
TNLA ထိပ်ပိုင်းခေါင်းဆောင်တစ်ဦးကလည်း မိုးကုတ်မြို့ကို အပြီးသတ်သိမ်းပိုက်နိုင်ပြီဖြစ်ကြောင်း ယနေ့ညပိုင်း၌ အတည်ပြုပေးသည်။
TNLAသည် ၁၀၂၇ စစ်ဆင်ရေးကို ဇွန်လ ၂၅ရက် က စတင်၍ မဟာမိတ်တပ်များနှင့်အတူ ပူးပေါင်းဆင်နွှဲခဲ့ရာ ဇူလိုင် ၁၀ရက်တွင် နောင်ချိုမြို့ကိုပထမဆုံး သိမ်းပိုက်နိုင်ခဲ့ပြီးဒုတိယမြောက်အဖြစ် မိုးကုတ်မြို့ကို ယနေ့ သိမ်းပိုက်နိုင်ခဲ့ခြင်းဖြစ်သည်။
တရုတ်က အပစ်အခတ်ရပ်စဲရန် ဖိအားပေးနေသည့် ကြားမှ TNLAနှင့် မဟာမိတ်တပ်များသည် စစ်ကောင်စီတပ်စခန်းများကို ဆက်လက်တိုက်ခိုက်ခဲ့ခြင်းလည်းဖြစ်သည်။
TNLA အထွေထွေအတွင်းရေးမှူးချုပ် ဗိုလ်ချုပ်တားဘုန်းကျော်ကလည်း အပစ်ရပ်စဲခြင်းမပြုဘဲ ဆက်လက်၍ စစ်အာဏာရှင် စစ်ကောင်စီတပ်ကို တိုက်ခိုက်ရန် အသိပေးရေးသားပြီး သုံးရက်အကြာတွင် မိုးကုတ်မြို့ကို သိမ်းပိုက်နိုင်ခဲ့ခြင်းလည်းဖြစ်သည်။
မိုးကုတ်တိုက်ပွဲတွင် TNLAနှင့်အတူ PDF တပ်ဖွဲ့များ ပါဝင်တိုက်ခိုက်နေခြင်းဖြစ်သည်။
TNLA အနေဖြင့် ကျောက်မဲမြို့ကိုလည်း ထိန်းချုပ်ထားပြီး ကျောက်မဲ၌ ကျန်နေသည့် စစ်ကောင်စီတပ်များကိုဆက်လက်ထိုးစစ် ဆင်လျက်ရှိသည်။
မန္တလေး PDF နှင့် ပူးပေါင်းတပ်များကလည်း ဇူလိုင် ၁၇ရက်တွင် မန္တလေးတိုင်း စဉ့်ကူးမြို့ကို အပြီးသတ် သိမ်းပိုက်နိုင်ခဲ့သည်။ထို့ကြောင့် မိုးကုတ်မြို့သည် မန္တလေးတိုင်းအတွင်း တော်လှန်ရေးတပ်ဖွဲ့များကဒုတိယမြောက် သိမ်းပိုက်နိုင်ခဲ့သည့် မြို့လည်းဖြစ်သည်။
