အင်ကြင်း/People’s Spring
မန္တလေးမြို့တွင် ကျုံးရေနည်းလာ၍ ရေမီတာက ပေးဝေနိုင်ခြင်းမရှိသောကြောင့် မြို့ပေါ် ရပ်ကွက် အချို့ သောက်သုံးရေပြတ်လပ်နေကြောင်း ဒေသခံများက ပြောသည်။
မန္တလေးမြို့၊ အောင်မြေသာစံနှင့် ချမ်းအေးသာစံမြို့နယ်တို့တွင် ကျုံးအတွင်းမှတဆင့် ဖြန့်ဝေနေသည့် ရေမီတာမှ ရေမလာတော့၍ သောက်သုံးရေပြတ်လပ်နေခြင်းဖြစ်ကြောင်း ဒေသခံများက ပြောသည်။
Public Service Announcement
“ကြာပြီ။ လဆန်းပိုင်းကတည်းကမရတော့တာ။ ရေကားနဲ့ဝယ်သုံးနေရတယ်။”ဟု နန်းရှေ့ဒေသခံတစ်ဦးက ပြောသည်။
ထို့ကြောင့် သောက်သုံးရေပြတ်လပ်နေ၍ ရေကားများဖြင့် တစ်စီးလျှင် ကျပ်ခြောက်သောင်းဝန်းကျင်ဖြင့် ဝယ်ယူအသုံးပြုနေရကြောင်း ဒေသခံများက ပြောသည်။
ကျုံးရေမှာ မတ္တရာမြို့နယ်၊ ဆည်တော်ကြီးမှဝင်ရောက်ခြင်းဖြစ်ပြီး ယခုလဆန်းပိုင်းက ဆည်တော်ကြီးအနီးရှိ တပ်စခန်းအား မန္တလေး PDF နှင့် ပူးပေါင်းတပ်များက သိမ်းပိုက်ခဲ့သည်။ ထိုသို့သိမ်းပိုက်ပြီးနောက် ရေပေးဝေရေးဝန်ထမ်းများ မရှိတော့သဖြင့် ရေမရတော့ခြင်းဖြစ် ကြောင်း ဒေသခံအချို့က ဆိုသည်။
အလားတူ လျှပ်စစ်မီးဖြင့် ရေတင်အသုံးပြုသည့် မန္တလေးမြို့ပေါ် အခြားနေရာများတွင်လည်း လျှပ်စစ်မီး အချိန်မှန်မရ၍ ရေပြတ်တောက်မှုများ မကြာခဏ ကြုံနေရကြောင်း မန္တလေးမြို့ခံများက ပြောသည်။
