ထားမြတ်/People’s Spring
ချင်းပြည်နယ် ထန်တလန်မြို့ပေါ်ရှိ စစ်ကောင်စီတပ်သား တစ်ဦးနှင့် ရဲတစ်ဦးတို့ ယနေ့ ဇူလိုင် ၂၅ရက်တွင် ချင်းပြည်အစိုးရတပ်ဖွဲ့ထံ ပူးပေါင်းလာကြောင်း ချင်းဒေသကာကွယ်ရေးတပ်(CDF)-ထန်တလန်က သတင်းထုတ်ပြန်သည်။
အဆိုပါ စစ်ကောင်စီ လက်နက်ကိုင်တပ်ဖွဲ့ဝင် ၂ဦးသည် စစ်ကောင်စီထံတွင် တာဝန်ထမ်းဆောင်လိုခြင်းမရှိသည့်အပြင် ပြည်သူ့တော်လှန်ရေးတွင် ပါဝင်လိုကြောင်း ဝန်ခံခဲ့သည်ဟု ဆိုသည်။
Public Service Announcement
၎င်းတပ်သား ၂ ဦးနှင့်အတူ MA 2 တစ်လက်၊ G3 တစ်လက် ကျည်ဘောက်နှင့် ကျည်များ ယူဆောင်လာကြောင်း ဖော်ပြသည်။
လက်နက်၊ ကျည်များ ယူဆောင်ကာ ပူးပေါင်းလာသည့် စစ်ကောင်စီ လက်နက်ကိုင် ၂ဦးကိုတစ်ဦးလျင်ကျပ်သိန်း ၅၀ စီ ပေးအပ်ခဲ့ကြောင်း၊ ထို့ပြင် လုံခြုံရာနေရာသို့ ပို့ဆောင်ပေးခဲ့ကြောင်း CDF ထန်တလန်က ထုတ်ပြန်သည်။
CDF ထန်တလန် အပါအဝင် ချင်းပြည်အစိုးရ တပ်ဖွဲ့ဝင် အဖွဲ့များ ပူးပေါင်း၍ ထန်တလန် – ဟားခါးကြားရှိ စစ်ကောင်စီတပ်စခန်းများကို တိုက်ခိုက်နေချိန်တွင် ယခုကဲ့သို့ စစ်သားနှင့် ရဲတို့ ပူးပေါင်းလာခြင်းလည်းဖြစ်သည်။
ချင်းပြည်အစိုးရတပ်ဖွဲ့က Tilim Operation ၄ ဖော်ဆောင်တိုက်ပွဲဝင်လျက်ရှိသည့်အတွက် ပြည်သူ့တော်လှန်ရေးအတွင်း ပါဝင်ရန်ဆန္ဒရှိပါက အမြဲတခါးဖွင့် ကြိုဆိုလျက်ရှိကြောင်း လည်း CDF ထန်တလန်က အသိပေးထုတ်ပြန်သည်။
