ကိုပုဂံ/People’s Spring
လားရှိုးမြို့အကျဉ်းထောင်အနီးတွင် ယနေ့ တိုက်ပွဲဖြစ်ပွားပြီးနောက် အကျဥ်းထောင်ရှိ နိုင်ငံရေး အကျဥ်းသားများအားလုံးလွတ်မြောက်လာပြီး ဒီချုပ်ပါတီမှ ဗဟိုအလုပ်အမှုဆောင်၊ ပြည်သူ့လွှတ်တော်ဒုဥက္ကဌ ဦးထွန်းထွန်းဟိန်လည်း လွတ်မြောက်လာကြောင်း သတင်းရရှိသည်။
Public Service Announcement
လားရှိုးအကျဥ်းထောင်ရှိ လွတ်မြောက်လာသည့် နိုင်ငံရေးအကျဥ်းသားများအား ကိုးကန့်တပ်မတော်(MNDAA)ပူးပေါင်းတပ်ကစီစစ်ပြီးသက်ဆိုင်ရာလမ်းကြောင်းများဆွဲ၍ နေရပ်ပြန်ပို့ပေးမည်ဟု ကြားသိရကြောင်း နောင်ချိုမြို့မှ PDFရဲဘော်တစ်ဦးက ပြောသည်။
လားရှိုးအကျဥ်းထောင်၌ စစ်အာဏာသိမ်းမှုဆန့်ကျင်မှုကြောင့် မတရားဖမ်းဆီးခံရသော ဒီချုပ်ပါတီမှ ဗဟိုအလုပ်အမှုဆောင်၊ ပြည်သူ့လွှတ်တော်ဒုဥက္ကဌ ဦးထွန်းထွန်းဟိန်၊ လားရှိုးပြည်သူ့ဆေးရုံအုပ်ကြီး အပါအဝင် လားရှိုးမြို့ရှိ ဒီချုပ်ပါတီဝင်များ၊ ရှမ်းမြောက်ရှိ စစ်အာဏာသိမ်းမှုဆန့်ကျင်မှုကြောင့် ဖမ်းဆီးခံရသူ စုစုပေါင်း ၄၀၀ကျော်ရှိသည်ဟု ကြားသိရကြောင်း ရှမ်းမြောက်ရှိ လူထုနွေဦး၏ စစ်ရေးသတင်းရင်းမြစ်က ပြောသည်။
သိန္နီ၊ကွတ်ခိုင်၊ကွမ်လုံမြို့များ ပြန်ရမည့် နိုင်ငံရေးအကျဥ်းသားများအား ယနေ့တွင် စီစစ်၍ နေရပ်ပြန်ပို့ပေးသည်ဟု ကြားသိရကြောင်း ၎င်းက ဆက်ပြောသည်။
“မနက်က ထောင်မှာတိုက်ပွဲဖြစ်ပြီး အားလုံးလွတ်ကုန်တာပြောတယ်။ နောင်ချိုက အဖမ်းခံရတဲ့ သူတွေ အကုန်လွတ်လာတယ်ကြားတယ်”ဟု ၎င်းက ပြောသည်။
လားရှိုးအကျဉ်းထောင်သည် လားရှိုးမြို့ ရပ်ကွက်(၁၂)၌ရှိပြီး စစ်ကောင်စီက တပ်စွဲထားသည့် ယင်းနေရာအနီး၌ ယမန်နေ့ ညနှင့် ယနေ့(ဇူလိုင်၂၈ရက်)နံနက်အထိ တိုက်ပွဲများအပြင်းအထန်ဖြစ်ပွားခဲ့သည်ဟု သိရသည်။
“လားရှိုးထောင် ပွင့်တာအမှန်ပါ။ မနက် ၁၁နာရီလောက်က ပွင့်တာပါ။ အကျဉ်းသားတွေ လွတ်သွားပါတယ်”ဟု People’s Spring ၏ သတင်းရင်းမြစ်တစ်ဦးက ပြောသည်။
စစ်ကောင်စီနှင့်နီးစပ်သည့် လားရှိုးမြို့ခံ အချို့ကလည်း လူမှုကွန်ရက်၌ ရေးသားထားသည်။သို့သော် လားရှိုးမြို့ရှိ စစ်ကောင်စီတပ်များအား တိုက်ခိုက်သိမ်းပိုက်နေသည့် MNDAAကမူ တရားဝင်သတင်း မထုတ်ပြန်သေးပေ။
ထို့အပြင် ဇူလိုင် ၂၇ရက် ညနေ ၅နာရီတွင် MNDAA၏ ၆၁၁ တိုင်းရင်းသားတပ်မဟာက မင်းအောင်လှိုင် အာဏာသိမ်း စစ်တပ်၏ ခလရ(၆၈)အတွင်းရှိ စခန်းအားလုံးကို အောင်မြင်စွာ သိမ်းပိုက်နိုင်ခဲ့ပြီး စစ်ယာဉ် ၁၀စီးအပါအဝင် လက်နက်ခဲယမ်းများစွာ သိမ်းဆည်းရရှိနိုင်ခဲ့ကြောင်း MNDAAက ထုတ်ပြန်သည်။
ကိုးကန့်တပ်ဖွဲ့က ခလရ(၆၈)အလံတိုင်တွင် ကိုးကန့်တပ်ဖွဲ့အလံ လွှင့်ထူခဲ့ပြီး သိမ်းဆည်းလက်နက်ခဲယမ်း အချို့နှင့် စစ်ကားများကို ဖော်ပြခဲ့သည်။ ခလရ (၆၈)နှင့် ခလရ(၄၁)တို့ကို MNDAAက ယခင်ရသတ္တပတ်အတွင်းကတည်းက သိမ်းပိုက်နိုင်ခဲ့ကြောင်း ဒေသခံကအချို့က ပြောသော်လည်း MNDAA ယခု ရက်ပိုင်းအတွင်း သိမ်းနိုင်ခဲ့ကြောင်း ထုတ်ပြန်ခဲ့ခြင်းဖြစ်သည်။
MNDAAသည် ဇူလိုင် ၂၇ရက် နံနက်တွင်လည်း လားရှိုးမြို့ ဆင်တောင်ထိပ်ရှိ စစ်ကောင်စီ အသံလွှင့် ကုန်းမြင့်စခန်းကို သိမ်းပိုက်နိုင်ခဲ့ပြီး လက်နက်ခဲယမ်းများ ရရှိခဲ့ကြောင်း အသိပေးထားသည်။
လားရှိုးမြို့ကို ကိုးကန့်တပ်မတော် (MNDAA)က တိုက်ခိုက်သိမ်းပိုက်ပြီးနောက် တိုက်ပွဲများဆက်လက်ဖြစ်ပွားနေစဉ် ဆက်ဆံရေးရုံးများနှင့် ပိုင်ဆိုင်မှုများကို ကာကွယ်ရန်ဟုဆိုကာ
“၀”ပြည်သွေးစည်းညီညွတ်ရေးတပ်မတော် (UWSA)တပ်ဖွဲ့ဝင် ၅၀၀ခန့်က ဝင်ရောက်နေရာယူထားသည်။
မြို့သို့မဝင်မီတွင် MNDAA မဟာမိတ်များနှင့်စစ်ကောင်စီတို့ကို အကြောင်းကြားခဲ့ပြီး နှစ်ဖက်စလုံး၏ သဘောတူညီချက်ဖြင့် အဆင်ပြေစွာ ဝင်ရောက်ခဲ့ခြင်းဖြစ်ပြီး စစ်ရေး၌ဝင်ရောက်မစွက်ဖက်ဟု “ဝ”ပြောရေးဆိုခွင့်ရှိသူက ပြောထားသည်။
ထို့အပြင် လားရှိုးမြို့နယ်အုပ်ချုပ်ရေးအတွက် အုပ်ချုပ်ရေးယန္တရား ဖော်ဆောင်မည်ဟု MNDAAက ထုတ်ပြန်ထားသည်။
