ကျပ်ငွေတန်ဖိုး ဆက်တိုက်ကျဆင်းပြီး ဒေါ်လာနှင့် ထိုင်းဘတ် အဝယ်များနေ

စောနွေဦး/ People’s Spring

မြန်မာကျပ်ငွေ ဆက်တိုက်ကျဆင်းလာခြင်းကြောင့် နိုင်ငံခြားငွေများအဝယ်လိုက်နေကြောင်း ပြည်တွင်းဈေးကွက်အတွင်းမှ သိရသည်။

​ငွေ​ကြေး​ဈေးကွက်တွင်ကျပ်ငွေတန်ဖိုးကျဆင်းပြီး နိုင်ငံခြားငွေများကို ဝယ်ယူသူများနေသော်လည်း ရောင်းသူမရှိကြောင်းလည်း ငွေလဲကောင်တာပိုင်ရှင်တစ်ဦးကပြောသည်။

Public Service Announcement

ယနေ့ (ဇူလိုင် ၃၀ ရက်)တွင် အမေရိကန်တစ်ဒေါ်လာကို ကျပ် ၅၃၅၀ အထိမြင့်တက်လာပြီး အခြားနိုင်ငံခြားငွေဈေးများလည်း မြင့်တက်လာသည်ဟုအထက်ပါ ငွေလဲကောင်တာပိုင်ရှင်ကပြောသည်။

“ဈေးနှုန်းဆိုတာသတ်မှတ်ချက်မရှိတော့ပါဘူး။ ကြိုက်ရောင်းကြိုက်ဝယ်စနစ်ဖြစ်နေပါတယ်။ အခုအခြေအနေက ဝယ်ချင်သူများပြီး ရောင်းမယ့်သူမရှိဘူးဖြစ်နေတယ်”ဟု အခြားငွေလဲကောင်တာပိုင်ရှင်တစ်ဦးကပြောသည်။

ဇူလိုင် ၃၀ ရက်​​နေ့ ငွေလဲနှုန်းတွင် စင်ကာပူတစ်ဒေါ်လာကို ၁၈၉၀ ကျပ်၊ ထိုင်း တစ်ဘတ်ကို ၁၄၆ ကျပ်၊ မလေးရှား တစ်ရင်းဂစ်ကို ၁၁၂၀ကျပ်၊ တရုတ်ငွေ တစ်ယွမ်ကို ကျပ် ၇၁၅ကျပ်အထိမြင့်တက်လာသည်။

ငွေလဲဈေးကွက်တွင် ဇူလှိုင် ၂၉ ရက်က တစ်ဒေါ်လာကို ကျပ် ၅၂၀၀ ၊ စင်ကာပူတစ်ဒေါ်လာလျင် ၁၈၀၀ ကျပ် ၊ထိုင်းငွေ တစ်ဘတ်ကို ၁၄၀ကျပ်၊ မလေးရှား တစ်ရင်းဂစ်ကို ၁၀၈၅ကျပ် ၊ တရုတ်ငွေတစ်ယွမ်ကို ၆၉၆ကျပ်ရှိခဲ့ပြီး ​ဈေးဆက်တက်ခဲ့ခြင်းဖြစ်သည်။

“အဝယ်များတာ ဒေါ်လာနဲ့ ထိုင်းဘတ်ဘဲ။ ဒီနေ့တရက်ထဲကို အဝယ်လိုက်နေကြတာ။”ဟု ငွေလဲလုပ်ငန်းဆောင်ရွက်နေသူတစ်ဦးကပြောသည်။

​ဒေါ်လာနည်းတူ အခေါက်ရွှေဈေးမှာလည်း ဈေးနှုန်းမြင့်တက်နေပြီး တစ်ကျပ်သားကို ကျပ် ၆၇ သိန်းအထိ ပေါက်ဈေးရှိနေသည်ဟုလည်း ဈေးကွက်အတွင်းမှ စုံစမ်းသိရသည်။

ကျပ်ငွေတန်ဖိုးထိုးကျပြီး နိုင်ငံစီးပွားရေးမတည်ငြိမ်ဖြစ်နေချိန်တွင် စစ်ကောင်စီက ဩဂုတ်၁ ရက်မှ စတင်ပြီး ၎င်းတို့လက်အောက်ခံဝန်ထမ်းများ၊ အငြိမ်းစားဝန်ထမ်းများကို ကျပ် ၃၀,၀၀၀ စီတိုးမြှင့်ပေးခဲ့သည်။

သို့​သော် ဇွန်လအတွင်း ပုဂ္ဂလိက ကုမ္ပဏီဝန်ထမ်းများကို လစာတိုးမြှင့်ပေးခဲ့သည့်အ​ကြောင်းပြချက်ဖြင့် ဈေးဆိုင်ပိုင်ရှင် နှင့် ကုမ္ပဏီ ပိုင်ရှင် ၁၀ ဦးထက်မနည်းကို စစ်ကောင်စီကဖမ်းဆီးခဲ့​သေးသည်။ စစ်ကောင်စီဖမ်းဆီးသည့်အထဲတွင် ကော်ဖီဆိုင်၊ မိုဘိုင်းဖုန်းဆိုင်၊ စားသောက်ဆိုင်၊ လျှပ်စစ်ပစ္စည်းဆိုင်နှင့် ဆောက်လုပ်ရေးလုပ်ငန်းရှင်များ ပါဝင်ခဲ့ပြီး အချို့ဆိုင်များကို ချိတ်ပါပိတ်ခဲ့သည်။