အင်ကြင်း/People’s Spring
မန္တလေးတိုင်း၊ မြင်းခြံခရိုင်၊ နွားထိုးကြီးမြို့နယ်ရှိ လမ်းမများပေါ်တွင် ခရီးသွားယာဥ်များအား နွားထိုးကြီး PDFက စစ်ဆေးမှုပြုလုပ်ခဲ့ကြောင်း သတင်းရရှိသည်။
ယမန်နေ့(ဇူလိုင် ၃၀ရက်)မှစတင်ကာ နွားထိုးကြီးမြို့နယ်နှင့် ဆက်စပ်နေသော လမ်းမများပေါ်တွင် စစ်ဆေးမှုများ ပြုလုပ်နေပြီး ယာဥ်များအနေဖြင့် မောင်းပြေးခြင်းမပြုဘဲ ကြည်ဖြူစွာ လက်ခံပေးကြရန်နှင့် ချမှတ်ထားသော စည်းကမ်းများကို လိုက်နာပေးကြပါရန် မြင်းခြံခရိုင် အမှတ်(၄)တပ်ရင်း Natogyi People Defence Force အဖွဲ့က မေတ္တာရပ်ခံသည်။
Public Service Announcement
“အဓိက စခများက အိမ်စီးကားများအသုံးပြုပြီး သွားလာကြတာဖြစ်လို့၊ နောက်တစ်ချက်က စကစ ထုတ်ကုန်တွေ တင်ပို့မှုတွေပါ စစ်ပါတယ်”ဟု နွားထိုးကြီး PDF၏ ပြန်ကြားရေးတာဝန်ခံက ပြောသည်။
ထို့အပြင် လက်ရှိဖြစ်ပွားနေသော နိုင်ငံရေးအခြေအနေနှင့် စစ်ကောင်စီ၏ တိုက်ခိုက်မှုများအတွင်း ဘေးအန္တရာယ်ကင်းရှင်းစေရန် နေထိုင်ရမည့်အချက်များကိုလည်း အသိပညာပေးခဲ့ကြောင်း နွားထိုးကြီး PDFက ပြောသည်။
နွားထိုးကြီးမြို့နယ်သည် မန္တလေးတိုင်းအတွင်း တော်လှန်ရေးအားကောင်းရာဒေသတခုဖြစ်ပြီး စစ်ကောင်စီ၏ ဖမ်းဆီးသတ်ဖြတ်ခြင်း၊ ရွာလုံးကျွတ်မီးရှို့ဖျက်ဆီးခြင်းများ မကြာခဏခံနေရသည်။
နွားထိုးကြီး PDFကလည်း စစ်ကောင်စီအား တန်ပြန်တိုက်ခိုက်နေပြီး ဇူလိုင်(၂၉ရက်)နံနက်ပိုင်းက ရန်ကုန်-မန္တလေးအမြန်လမ်းပေါ်၌ စစ်ကောင်စီယာဥ်တန်းအား တိုက်ခိုက်ရာ စစ်ကားတစ်စီးမီးလောင်ပျက်စီးပြီး ကားပေါ်ပါ စစ်အုပ်စုထိခိုက်မှုရှိခဲ့သည်။
