စစ်ရေး အခြေအနေတွေ ပြင်းထန် ကြမ်းတမ်းလာတာကြောင့် မြန်မာနိုင်ငံအလယ်ပိုင်းမှာ အခြေစိုက်လည်ပတ်နေတဲ့ Sembcorp ကုမ္ပဏီပိုင် ဓာတ်အားပေး စက်ရုံတစ်ခုကို ဆိုင်းငံ့ထားရကြောင်း စင်ကာပူ စက်မှုလုပ်ငန်း တစ်ခုက ကြေညာခဲ့ပါတယ်။
စင်ကာပူ အခြေစိုက် စွမ်းအင်နဲ့ မြို့ပြ ဖွံ့ဖြိုးရေး ကုမ္ပဏီ Sembcorp စက်မှုလုပ်ငန်းဟာ မန္တလေးတိုင်း ဒေသကြီးထဲမှာရှိတဲ့ မြင်းခြံ မြို့နယ်ထဲက ဓာတ်အားပေးစက်ရုံ လည်ပတ်မှုကို ဩဂုတ် ၁၂ ရက်နေ့မှာ မဖြစ်မနေ ယာယီ ဆိုင်းငံ့ထားခဲ့ရတာလို့ အတည်ပြုခဲ့ပါတယ်။
အဓိက အကြောင်းရင်းကတော့ ကုမ္ပဏီရဲ့ ၂၂၅ မဂ္ဂါဝပ် ဓာတ်ငွေ့စွမ်းအင်သုံး ဓာတ်အားပေးစက်ရုံ Sembcorp Myingyan တည်ရှိရာ မြင်းခြံမြို့နယ်နဲ့ အနီးတဝိုက် ဒေသတွေမှာတိုက်ပွဲတွေ ပိုမို အရှိန်မြင့်လာတာကြောင့်ပါ။
Public Service Announcement
အာဏာသိမ်းခဲ့တာ ၃ နှစ်ခွဲကျော်လောက် ကြာမြင့်လာတဲ့နောက် စစ်ကောင်စီဟာ နိုင်ငံအနှံ့မှာ လက်နက်ကိုင် ခုခံစစ်ပွဲတွေရဲ့ ဒဏ်ကို ပိုပြီး ကြမ်းကြမ်းတမ်းတမ်းရင်ဆိုင်နေရသလို စီမံခန့်ခွဲမှု အလွဲတွေကြောင့် နိုင်ငံစီးပွားရေးကလည်း တဟုန်ထိုး ကျဆင်းနေပါတယ်။
Sembcorpဟာ မြင်းခြံမှာရှိတဲ့ ဓာတ်အားပေး စက်ရုံကို အခြေအနေတွေ ပြန်လည် တည်ငြိမ်ပြီး ဘေးကင်းလုံခြုံလာတာနဲ့ အမြန်ဆုံး ပြန်လည် လည်ပတ်စေဖို့ အသင့်ပြင်ထားမယ်လို့ ကုမ္ပဏီက ဆိုပါတယ်။
မြင်းခြံခရိုင် PDF တွေရဲ့အထူးစစ်ဆင်ရေးအနေနဲ့ မြင်းခြံ ၊နွားထိုးကြီး ၊တောင်သာ မြို့နယ်တွေက စစ်တပ်စခန်းနဲ့ တပ်စွဲရာနေရာတွေကို PDFတွေက သြဂုတ် ၁၀ရက် မနက်အစောပိုင်းကစပြီး တချိန်တည်းထိုးစစ်ဆင်တိုက်ခိုက်နေတာပါ။ စစ်တပ်စခန်းတွေအသိမ်းခံရလိုစစ်သားတွေ ၊ပျူတွေ သေဆုံး၊ဒဏ်ရာရတာ ၊အဖမ်းခံရတာတွေရှိသလို လက်နက်ခဲယမ်းတွေကိုလည်း PDFတွေကသိမ်းပိုက်နေပါတယ် ။
Sembcorpဟာ စင်ကာပူရဲ့ အစိုးရပိုင် အထင်ကရ ရင်းနှီးမြှုပ်နှံမှု လုပ်ငန်းစုကြီး Temasekက ကျောထောက်နောက်ခံ ရှိနေတဲ့ ကုမ္ပဏီ တစ်ခုလည်း ဖြစ်ပါတယ်။
ဒီအတောအတွင်း ဂျပန်ရဲ့ Unicharm ကုမ္ပဏီကလည်း နိုင်ငံခြား ငွေလဲနှုန်း မတည်ငြိမ်မှုနဲ့ တခြားသော စိန်ခေါ်မှုတွေ၊ ပြဿနာတွေကြောင့် မြန်မာ့ အခြေစိုက် လုပ်ငန်းခွဲမှာ ရင်းနှီးမြှုပ်နှံ ဖြည့်တင်းမှုတွေ ရပ်တန့်တော့မယ်လို့ ကြေညာထားပါတယ်။
PDF တွေက ထီးချိုင့်မြို့နယ်မှာရှိတဲ့ တရုတ်ရာနှုန်းပြည့်ရင်းနှီးမြှပ်နှံထားတဲ့ တကောင်းနီကယ် စက်ရုံက စစ်ကောင်စီတပ်တွေကိုတိုက်ခိုက်ပြီးနောက်ဆုံးလက်နက်ချတာကြောင့် စက်ရုံကို လည်းသိမ်းပိုက်ထားပါတယ် ။ စက်ရုံကိုထိန်းချုပ်ပြီး တရုတ်နဲ့ညှိနှိုင်းပြီးလုပ်ငန်းတွေဆက်လက် လည်ပတ်နေတယ်လို့တော်လှန်ရေး အဖွဲ့တွေကပြောပါတယ် ။
ကိုးကား-Bangkok Post
