အင်ကြင်း/People’s Spring
မန္တလေးတိုင်း၊ မတ္တရာမြို့နယ်တွင် တိုက်ပွဲများဖြစ်ပွားနေသည့်ကြားမှ တောင်ပြုံးပွဲကို အစဥ်အလာအတိုင်း ကျင်းပနေသည်။
တိုက်ပွဲဖြစ်ပွားနေသည့် မတ္တရာမြို့နယ်တွင် တိုက်ပွဲကြောင့် တောင်ပြုံးပွဲ စည်ကားမှုမရှိသော်လည်း ဩဂုတ် ၁၂ ရက်မှစတင်ကာ အစဥ်အလာတိုင်း ကျင်းပနေသည်ဟု ဒေသခံများက ပြောသည်။
Public Service Announcement
“ဆိုင်ရာတွေလာကြတယ်။ သူ့နေ့သူ့ရက်တော့အရောက်လာကြတာပဲ။”ဟု ဒေသခံတစ်ဦးက ပြောသည်။
တောင်ပြုံးပွဲလာရောက်သူများမှာ မြန်မာပြည်အောက်ပိုင်းဒေသမှ နတ်ကိုးကွယ်သူများဖြစ်ပြီး အစဥ်အလာအတိုင်း လာရောက်ကြခြင်းဖြစ်ကြောင်း ဒေသခံများက ပြောသည်။
“သူတို့ကတော့ တားမရဘူးလေ။ သိတဲ့အတိုင်း “ဟု မတ္တရာဒေသခံတစ်ဦးက မှတ်ချက်ပြုသည်။
သို့သော် လမ်းပန်းအခက်အခဲကြောင့် စျေးသည်များ လာရောက်ရောင်းချနိုင်ခြင်းမရှိဘဲ ဒေသတွင်း စျေးသည်အချို့သာ ရှိကြောင်း၊ ယမန်နှစ်ကကဲ့သို့ စည်ကားမှုမရှိကြောင်း သွားရောက်ခဲ့သူများက ပြောသည်။
ဇွန်လကုန်ပိုင်းကစတင်ခဲ့သော ၁၀၂၇ စစ်ဆင်ရေးအပိုင်း (၂)နှင့် ရှမ်းမန်းစစ်ဆင်ရေးတွင် မန္တလေးတိုင်း၊ မတ္တရာမြို့နယ်တွင်လည်း တိုက်ပွဲများ ပြင်းထန်စွာဖြစ်ပွားခဲ့သည်။ မတ္တရာမြို့နယ်အတွင်း စစ်ကောင်စီတပ်စခန်း၃၅ခုအား မန္တလေး PDF နှင့် ပူးပေါင်းတပ်များကသိမ်းပိုက်ထားသည်။
ယနေ့အထိ မတ္တရာမြို့နယ်အတွင်း မိုးကုတ်-မန္တလေးလမ်းပေါ်၌ပင် တိုက်ပွဲများဖြစ်ပွားနေပြီး စစ်ကောင်စီ၏ လေကြောင်းနှင့် လက်နက်ကြီးတိုက်ခိုက်မှုများကြောင့် ဒေသခံပြည်သူထောင်ချီထွက်ပြေးတိမ်းရှောင်နေရသည်။
