ဒီးဒီ/People’s Spring
အရှေ့မြောက်တိုင်းစစ်ဌာနချုပ်(ရမခ)ဆုံးရှုံးပြီးနောက် တရုတ်ဆန့်ကျင်ရေးပြုလုပ်ခဲ့သော စစ်ကောင်စီဝါဒဖြန့် တယ်လီဂရန်ချန်နယ်များ၊ အမျိုးသားရေး အစွန်းရောက်များ၊ စစ်တပ်ထောက်ခံသူများမှာ တရုတ်နိုင်ငံခြားရေးဝန်ကြီးဝမ်ယိ နေပြည်တော် လာပြီး နောက် တရုတ်မုန်းတီးရေး လှုံ့ဆော်မှုများရပ်တန့်သွားသည်။
စစ်ကောင်စီလက်အောက်ရှိ စစ်တိုင်း ၁၄ခုအနက် တတိယမြောက် အင်အားအတောင့်တင်းဆုံးဖြစ်ပြီး စစ်အုပ်စုတွင် သမိုင်းတလျှောင်အောင်ပွဲအလီလီရဖူးသည်ဆိုကာ ‘နေဝန်းနီ’ဟု ဂုဏ်ယူလေ့ရှိသည့် အရှေ့မြောက်တိုင်းစစ်ဌာနချုပ်(ရမခ) ကျဆုံးပြီး နောက် စစ်အုပ်စုသြဇာခံ အမျိုးသားရေးအစွန်းရောက်များ၊ စစ်တပ်ထောက်ခံသူများက သြဂုတ် ၆ရက်က လမ်းပေါ် ထပ်ထွက်လာပြီး MNDAAနှင့်အတူ တရုတ်ဆန့်ကျင်ရေးကိုပါဆန္ဒပြခဲ့ကြသည်။ နေပြည်တော်၊ရန်ကုန်အပါအဝင် စစ်ကောင်စီစိုးမိုးထားသော မြို့ကြီးအချို့တွင် ပြုလုပ်ခဲ့ခြင်း ဖြစ်သည်။
Public Service Announcement
ထို့အပြင် စစ်ကောင်စီ၏ ဝါဒဖြန့်ချန်နယ်တစ်ခုဖြစ်သော NP Newsမှတဆင့် ကျော်မျိုးမင်းက ရှမ်းမြောက်ဒေသရှိ တရားမဝင်တရုတ်နိုင်ငံသားများအား ရှင်းလင်းရန် သြဂုတ် ၇ရက်ညပိုင်းက လှုံ့ဆော်ပြောဆိုခဲ့သည်။
စစ်ကောင်စီ၏ ဝါဒဖြန့်တယ်လီဂရန်ချန်နယ်များဖြစ်သော ကျော်စွာ၊ မှိုင်းဝေ၊ Ko thet၊ Local News Mediaစသည့်ချန်နယ်လ်များက တရုတ်ဆန့်ကျင်မုန်တီးရေး လှုံ့ဆော်မှုများ ဆက်တိုက်ပြုလုပ်ခဲ့သည်။
ထို့အပြင် ရှမ်းမြောက်၌ လက်လွှတ်ဆုံးရှုံးခဲ့ရသည့် အခြေအနေမှာ တရုတ်နိုင်ငံ၏ ပယောဂမကင်းကြောင်း အာဏာသိမ်းခေါင်းဆောင် မင်းအောင်လှိုင်ကသြဂုတ် ၅ရက်က ပြောသည့်မိန့်ခွန်းတွင် သွက်ဝိုက်၍ ပြောဆိုခဲ့သည်။မြန်မာ – တရုတ်နယ်စပ်ရှိ EAO နယ်မြေအချို့တွင် လက်နက်စက်ရုံများတည်ထောင်နိုင်ရန်အတွက် ငွေကြေးနှင့် နည်းပညာ အင်အားများကို မည်သည့်နေရာမှ ထောက်ပံ့နေသည်ကို ဆန်းစစ်ရမည်ဟု မင်းအောင်လှိုင်က ဆိုသည်။MNDAA ၏တိုက်ခိုက်ရေး ဒရုန်းများကို ပြင်ပကြေးစားနည်းပညာရှင်များက အကူအညီပေးကာ အဆင့်မြှင့်ထားသည်ဟု မင်းအောင်လှိုင်က စွပ်စွဲထားသည်။
သို့သော် တရုတ်နိုင်ငံခြားရေးဝန်ကြီး ဝမ်ယိ သြဂုတ် ၁၄ရက်က နေပြည်တော်သို့လာရောက်ပြီး အာဏာရှင်ဟောင်း အငြိမ်းစားဗိုလ်ချုပ်မှူးကြီးသန်းရွှေ ၊ အာဏာသိမ်းခေါင်းဆောင် မင်းအောင်လှိုင်နှင့်တွေ့ဆုံအပြီး တရုတ်ဆန့်ကျင်ရေးလှုံ့ဆော်သူများမှာ ချက်ချင်းအသံတိတ်သွားခဲ့သည်။ ဆန္ဒပြမှုများလည်း ရပ်သွားခဲ့သည်။
တရုတ်နိုင်ငံခြားရေးဝန်ကြီးလာရောက်အပြီး တရုတ်ဆန့်ကျင်ရေးစာများရေးသားလှုံ့ဆော်မှုများချက်ချင်းရပ်တန့်သွားသည်။
ဝမ်ယိနှင့် အာဏာသိမ်းခေါင်ဆောင်တွေ့ဆုံစဥ် တရုတ်နိုင်ငံအနေဖြင့် မြန်မာ့ပြည်တွင်းရေးအပေါ် ပြည်ပအင်အားစု ဝင်ရောက် စွက်ဖက်ခြင်းကို ဆန့်ကျင်သလို တရုတ်-မြန်မာ ဆက်ဆံရေးအား သွေးကွဲအောင် လုပ်ဆောင်နေမှုနှင့် တရုတ်နိုင်ငံအား အိုးမဲသုတ်အပုပ်ချနေသည့် ပြောဆိုလုပ်ဆောင်မှု မှန်သမျှကို ဆန့်ကျင်ကြောင်း ပြောကြားခဲ့ကြောင်းတရုတ် နိုင်ငံပိုင်သတင်းဌာနဆင်ဟွာကမြန််မာဘာသာဖြင့်ဖော်ပြသည်။ထိုသို့ပြောဆိုခြင်းမှာ စစ်ကောင်စီ၏ တရုတ်မုန်းတီးရေးလှုံ့ဆော်နေမှုများကို သတိပေးခဲ့ခြင်းဖြစ်ကြောင်းပြည်သူများက သုံးသပ်ကြသည်။
စစ်ကောင်စီဝါဒဖြန့် မီဒီယာများတွင် အဆိုပါ သတိပေးပြောဆိုချက်ကို မဖော်ပြကြပေ။သို့သော် သြဂုတ် ၁၂ ရက် မှစ၍ တရုတ်မုန်းတီးရေးလှုံ့ဆော်မှုများမှာရချက်ချင်းရပ်တန့်သွားသည်။
“တရုတ်ကို ကြောက်ရတာ အားလုံးသိပြီးသားပဲလေ။ ဆန္ဒပြခိုင်းတယ်ဆိုတာလည်း သူတို့လိုချင်တာရှိလို့ တမင်ပြခိုင်းတာ။ ဟိုကမကြိုက်ဘူးပြောလိုက်တော့ ချက်ချင်းအသံတိတ်သွားတာ”ဟု နိုင်ငံရေးတက်ကြွလှုပ်ရှားသူတစ်ဦးကပြောသည်။
သြဂုတ် ၁၆ ရက်ညနေပိုင်းတွင်လည်း စစ်ကောင်စီ၏ ဝါဒဖြန့်ချန်နယ်ဖြစ်သော ကျော်စွာအကောင့်က အောင်နိုင်သူ(ဇွဲကပင်)ဆိုသူ ရေးသားထားသော တရုတ်-မြန်မာ နှစ်နိုင်ငံအကျိုးစီးပွားကိုရှေ့ရှုသည့် မေတ္တာရပ်ခံ အကြံပြု(၈)ချက်ကို ဖော်ပြ၍ တရုတ်ကိုမျက်နှာလုပ်၍ ရေးသားထား သည်ကိုပင်တွေ့ရသည်။
“တရုတ် – မြန်မာနိုင်ငံဟာ ပထဝီ နိုင်ငံရေးအရရော သမိုင်းကြောင်းရပ်တည်မှုအရပါ ရှေးနှစ်ပေါင်းများစွာထဲက အစဥ်လာကြီးမားခဲ့တဲ့ ဆွေမျိုး
ပေါက်ဖော်တွေ ဖြစ်ကြလို ချစ်စကိုရှည်စေ ၊ မုန်းစကိုတိုစေဆိုတဲ့စကားပုံအတိုင်း နှစ်နိုင်ငံချစ်ကြည်ရင်းနှီးစွာ ဆက်လက်နေထိုင်သွားကြခြင်းဖြင့် နှစ်နိုင်ငံတည်ငြိမ်ရေး ၊နှစ်နိုင်ငံ အကျိုးစီးပွား ဖွံဖြိုးတိုးတက်ရေးတိုကိုအလေးထားဆောင်ရွက်ပေးစေလိုကြောင်းအလေးထားတောင်းဆိုရေးသားလိုက်ရ ပါတယ်။ တရုတ်သမ္မတကြီးနှင့်တကွ တရုတ်
-မြန်မာနှစ်နိုင်ငံ ရှိ ပြည်သူလူထု အပေါင်းလည်း ကျန်းမာချမ်းသာကြပါစေ”ဟု ရေးသားဝါဒဖြန့်ထားခြင်းဖြစ်သည်။
ထို့အပြင် ထိုချန်နယ်လ်ကပင် မောင်ကောင်ရိပ် ဆိုသောကလောင်ဖြင့် “ဆက်ဆံရေး၏ အလှည့်အပြောင်း မိုးသားကင်းစင်တဲ့ကောင်းကင်ပြာဆီ”ခေါင်းစဥ်ဖြင့် တရုတ်ဝန်ကြီး ခရီးစဥ်မှာ စစ်ကောင်စီ၏ အောင်ပွဲ ၊ နှစ်နိုင်ငံဆက်ဆံရေးကောင်းပြန်တည်ဆောက်နိုင်ပြီဖြစ်ကြောင်းရေးသားဝါဒဖြန့်ထားသည်ကိုလည်းတွေ့ရသည်။
