သားကြီး/People’s Spring
ပြည်သူ့ကာကွယ်ရေးတပ်ဖွဲ့များက ဒီပဲယင်းမြို့ရှိ စစ်ကောင်စီတပ်စခန်းများကို အပြင်းအထန်ထိုးစစ်ဆင်ပြီး မြို့သိမ်းတိုက်ပွဲဆင်နွှဲနေရာ အပြီးသတ်သိမ်းပိုက်နိုင်ပြီဖြစ်ပြီး တမြို့လုံးအား သိမ်းပိုက်ထိန်းချုပ်နိုင်ပြီဟု မြေပြင်စစ်ရေးသတင်းရင်းမြစ်ကပြောသည်။
“မနေ့ညက ရတာပါ။ မိုးတွေအရမ်းသည်းနေချိန် တိုက်ပွဲခဏရပ်တုန်း အကုန်ထွက်ပြေးတာ။ အရှင်မိတွေလည်း ရှိပါတယ်” ဟု အထက်ပါ စစ်ရေးသတင်းရင်းမြစ်ကပြောသည်။
Public Service Announcement
ဒီပဲယင်းမြို့နယ် ပြည်သူ့အုပ်ချုပ်ရေးအဖွဲ့နှင့် နီးစပ်သူတစ်ဦးက ” တစ်မြို့လုံးရပါပြီ။ အုပ်ချုပ်ရေးလုပ်ငန်းတွေ စပါမယ်”ဟု ယနေ့(ဩဂုတ်လ ၁၈ရက်)နံနက် ၈နာရီခန့်၌ ပြောသည်။
ဒီပဲယင်းမြို့နယ်တစ်ခုလုံးကို ယနေ့ နံနက်တွင် အပြီးသတ်သိမ်းပိုက်နိုင်ခဲ့ခြင်းဖြစ်ကြောင်း PDF တစ်ဦးကပြောသည်။
ဒီပဲယင်းမြို့သိမ်းတိုက်ပွဲကို ဩဂုတ်လ ၁၆ရက်က စတင်ခဲ့ခြင်းဖြစ်သည်။ တိုက်ပွဲအပြင်းအထန်ဖြစ်ခဲ့ကြောင်း၊ စစ်ကောင်စီက ဂျက်ဖိုက်တာဖြင့်ရော Y12 လေယာဉ်ဖြင့်ပါပစ်ကူပေးဗုံးကြဲ တိုက်ခိုက်ခဲ့သည်။တိုက်ပွဲအတွင်း ဒီပဲယင်းမြို့သို့ ရေဦးမြို့ဘက်မှ စစ်ကူလာသည့် အင်အား ၁၀၀ ခန့်ပါ စစ်ကြောင်းကို ရေဦးမြို့မှ ပြည်သူ့ကာကွယ်ရေးပူးပေါင်းတပ်များက ပိတ်ဆို့ဖြတ်တောက်ခဲ့သည်။ ဩဂုတ်လ ၁၇ရက်ညတွင်သိမ်းယူနိုင်ခြင်းဖြစ်ရာ မြို့သိမ်းတိုက်ပွဲ နှစ်ရက် ကြာခဲ့သည်။
တိုက်ပွဲကြောင် ဒီပဲယင်း-ရေဦးလမ်းတစ်လျှောက်မှ ကျေးရွာများ ယာယီတိမ်းရှောင်နေကြရသည်။
ဒီပဲယင်းမြို့သိမ်းတိုက်ပွဲကို အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊အမှတ်(၁) စစ်ဒေသ၏ ကွပ်ကဲမှုဖြင့် ဒီပဲယင်း၊ ရေဦး၊ ဘုတင်လင် ပကဖများအပါအဝင် ပြည်သူ့ကာကွယ်ရေးတပ်ဖွဲ့များ ပူးပေါင်းတိုက်ခိုက်နေခြင်းဖြစ်သည်။
“အဖွဲ့အားလုံးရဲ့စုပေါင်းအားနဲ့ ဒီပဲယင်းမြို့ကို သိမ်းနိုင်ခဲ့ပါပြီ။ စစ်ကိုင်းအောက်ပိုင်းမှာ ပထမဆုံးသိမ်းနိုင်ခဲ့တဲ့မြို့ပါ”ဟု 96 Siolders PDF(အညာဒေသ)တပ်ခွဲခေါင်းဆောင် ကိုဇေယျာလွင် ကလည်းဖေစ်ဘွခ်တွင်ရေးသားထားသည်။
ဒီပဲယင်းမြို့သည် ရေဦးခရိုင်အတွင်းပါဝင်ပြီး အရှေ့ဘက်တွင် ရေဦး၊ခင်ဦး ၊ရွှေဘို ၊ တောင်ဘက်တွင် အာတော် ၊မြောက်ဘက်တွင် တန့်ဆည် ၊အနောက်ဘက်တွင် ကနီ ၊အနောက်တောင်ဘက်တွင် ဘုတလင်မြို့တို့ရှိသည်။
၂၀၁၄ သန်းခေါင်စာရင်းအရ ဒီပဲယင်းမြို့နယ်တွင် လူဦးရေစုစုပေါင်း ၁၄၀,၀၀၀ ကျော်နေထိုင်ပြီး မြို့ပေါ်တွင် လူဦးရေ ၄၀၀၀ ကျော် ၊ မြို့နယ်အတွင်းရှိ ကျေးရွာအုပ်စု ၅၀ကျော်တွင် လူဦးရေ ၁၃၆၀၀၀ ကျော်နေထိုင်သည်။
စစ်ကောင်စီဝါဒဖြန့် တယ်လီဂရန်ချန်နယ်လ်တခုကလည်း”ရန်သူအနေဖြင့်ဒီပဲယင်းရရှိသွားပါပြီ။စစ်သုံ့ပန်း၂၀၀ကျော်ဖြစ်တယ်။စစ်ကိုင်း ၊မကွေး၊ မန္တလေး ဟာထိန်းမရတော့ဘူး” ဟု ရေးသားထားသည်။ ဒီပဲယင်းမြို့ ကိုတော်လှန်ရေးတပ်များရပြီးနောက် အနောက်မြောက်တိုင်းစစ်ဌာနချုပ် (နမခ) ရှိရာ မုံရွာကို ဆက်လက်တိုက်ခိုက်ရန် ပြင်ဆင်နေကြောင်း အဆိုပါတယ်လီဂရန်က ဆက်လက်ရေးသားထားသည်။
၂၀၀၃ ခုနှစ် မေလ ၃၀ ရက်တွင် ဒီပဲယင်းမြို့နယ် ကြည်ရွာအနီး၌ စစ်အစိုးရ၏ အစီအစဥ်ဖြင့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ အသင်းဝင်များ ၊ ထောင်သားများအပါအဝင် စွမ်းအားရှင်ဟုဆိုသူများ ပါဝင်သည့် ရာနှင် ချီသောလူအုပ်ကြီးက အမျိုးသားဒီမိုကရေစီ အဖွဲ့ချုပ်ပါတီ (NLD) ခေါင်းဆောင် ဒေါ်အောင်ဆန်းစုကြည်နှင့် ဦးတင်ဦးတို့ပါသော ယာဥ်တန်းကို တိုက်ခိုက်လုပ်ကြံ့သတ်ဖြတ်ရာ ယာဥ်တန်းဖြင့် လိုက်ပါလာသူ ၇၀ ကျော်သေဆုံးခဲ့သည်။ ထိုဖြစ်စဥ်ကြီးကြောင့် ဒီပဲယင်းလုပ်ကြံမှု မှာ နာမည်ဆိုးဖြင့်လူသိများခဲ့သည်။ လုပ်ကြံမှုတစ်ခုလုံးစီစဥ်ခဲ့သော စစ်တပ်က အချင်းချင်းလွှဲချ ခေါင်းရှောင်နေကြပြီး ကျူးလွန်သူများကို ယနေ့အထိအရေးမယူနိုင်သေးပေ။ထိုလုပ်ကြံမှုကြီးနောက်ကွယ်တွင် စစ်အစိုးရခေါင်းဆောင် ဗိုလ်ချုပ်မှူးကြီးသန်းရွှေ နှင့်စစ်ျခါင်းဆောင်များ အဓိကတာဝန်ရှိကြောင်းနိုင်ငံရေးလေ့လာသူအချို့ကပြောသည်။
ရေဦး ၊ဘုတလင်မြို့တို့နှင့် မြို့နယ်ချင်းထိစပ်နေပြီး ရေဦး နှင့်ဘုတလင်မြို့ကိုလည်းတော်လှန်ရေးတပ်များက ၈၀ ရာခိုင်နှုန်း ခန့်ထိန်းချုပ်ထားနိုင့်ပြီဖြစ်ကြောင်း ပြည်သူ့ အုပ်ချုပ်ရေး အဖွဲ့ဝင်(ပအဖ)တစ်ဦးကပြောသည်။
စစ်ကိုင်းတိုင်းအတွင်း အင်းတော်နှင့် ပင်လည်ဘူးမြို့ကိုလည်း ပြည်သူ့ကာကွယ်ရေးတပ်ဖွဲ့များက မြို့သိမ်းတိုက်ပွဲ ဆင်နွှဲနေသည်။
People’s Spring ၏ အချက်အလက်စုဆောင်းထားမှုအရ နွေဦးတော်လှန်ရေးတွင် ဒီပဲယင်းမြို့သည် တော်လှန်ရေးတပ်ဖွဲ့များသိမ်းပိုက်နိုင်ခဲ့သော ၇၈ မြို့မြောက် မြို့ဖြစ်လာပြီး စစ်ကိုင်းတိုင်းအောက်ပိုင်းတွင် ပထမဆုံးသိမ်းပိုက်နိုင်သောမြို့ဖြစ်သည်။တော်လှန်ရေးတပ်များက သိမ်းပိုက်ပြီးသော်လည်းသတင်းမထုတ်ပြန်သေးသောမြို့များကျန်ရှိနိုင်သေးသဖြင့် သိမ်းပိုက်ထိန်းချုပ်ပြီးမြို့မှာ မြေပြင်တွင် ၇၈မြို့ထက်ပင်များနိုင်ပါသည်။
▪︎မှတ်ချက်- သတင်းကို သြဂုတ် ၁၈ ရက်နံနက် ၁၀ နာရီ ၂၀ မိနစ်တွင် ထပ်မံဖြည့်စွက်ထားပါသည်။
