ခမရ ၄၃၇ တပ်ရင်း KIA အပြီးသတ်သိမ်းပိုက်

ဒီပ/People’s Spring

ဗန်းမော်မြို့ နှင့် မိုးမောက်မြို့ကြားရှိ အမှတ် ၄၃၇ ခြေမြန်တပ်ရင်း (ခမရ ၄၃၇) ဌာနချုပ်အား ကချင်လွတ်လပ်ရေးတပ်မတော် (KIA)ဦး​ဆောင်​သော ပူးပေါင်းတပ်များက ယနေ့အပြီးသတ်သိမ်းပိုက်လိုက်နိုင်ပြီဖြစ်သည်။

“အပြီးရပါပြီ ။ ၄၃၇ က ဗန်မော်အတွက် အရမ်းအရေးကြီးပါတယ်”ဟု စစ်​ရေးရင်းမြစ်တစ်ဦးက​ပြောသည်။ခမရ (၄၃၇ )မှာ မိုး​မောက်မြို့အနီး တည်ရှိ​သော်လည်း ဗန်​မော်မြို့အတွက်ပါစစ်​ရေးအရ အလွန်အ​ရေးကြီး​သောတပ်ရင်းဖြစ်သည်။

Public Service Announcement

စစ်ဆင်​ရေးကွပ်ကဲမှု ဌာနချုပ် (စကခ) ၂၁ အတွက် အ​ရေးကြီးဆုံးဖြစ်​သော တိုက်ခိုက်​ရေးတပ်ရင်းကို KIA ဦး​ဆောင်​သောပူး​​ပေါင်းတပ်များက ၂၀၂၄ ခုနှစ် မေလ မှစတင်၍ အကြိမ်ကြိမ်ထိုးစစ်ဆင်တိုက်ခိုက်ခဲ့ရာ ဇူလိုင်လကုန်ပိုင်းတွင် ထိုးစစ်အရှိန်မြှင့်ထပ်မံတိုက်ခိုက်ခဲ့ခြင်းဖြစ်သည်။

ခမရ (၄၃၇) မှာ ​မြောက်ပိုင်းတိုင်းစစ်ဌာနချုပ်(မပခ)တစ်ခုလုံးတွင် အင်အားအပြည့်ရှိပြီး တိုက်ခိုက်ရေး အကောင်းဆုံးတပ်ရင်းဖြစ်​သော​ကြောင့် စစ်​ကောင်စီတပ်အတွက် ကြီးမား​သောဆုံးရှုံးမှုဖြစ်သလို KIA အတွက် ကြီးမား​သော​အောင်ပွဲဖြစ်သည်။

KIAပူးပေါင်းတပ်များသည် ကချင်ပြည်နယ် မိုးမောက်မြို့၌ နောက်ဆုံးကျန်နေသည့် စစ်ကောင်စီ၏ ခမရ(၄၃၇)တပ်ရင်း ၏ ကားကင်းစခန်းများကိုလည်း သြဂုတ် ၁၅ ရက်တွင် သိမ်းပိုက်နိုင်ခဲ့ခြင်းဖြစ်သည်။

စစ်​ကောင်စီတပ်မှ​သေဆုံး ဒဏ်ရာရသူများပြီး ခမရ ၄၃၇ ကို ကြီးကြပ်ခဲ့​သောစကခမှူး နှင့် ဒုဗျူဟာမှူးတို့သည် စစ်ရှုံးပြီး​နောက် ထွက်​ပြေးသွား​ကြောင်းစုံစမ်းသိရသည်။ တပ်ရင်းသိမ်းတိုက်ပွဲအ​ခြေအ​နေအ​သေးစိပ်ကို People’s Spring ကဆက်လက်​ဖော်ပြသည်။

KIA ပူးပေါင်းတပ်သည် မိုးမောက်မြို့နယ်ရှိ စစ်ကောင်စီတပ်စခန်းများစွာကို သိမ်းပိုက်ထားပြီး နောက်ဆုံးကျန်နေသည့် ခမရ(၄၃၇)တပ်စခန်းကိုမေလ မှစတင်၍ အကြိမ်ကြိမ်ထိုးစစ်ဆင်တိုက်ခိုက်ခဲ့ရာ ဇူလိုင်လတွင် ထိုးစစ်အရှိန်မြှင့် ထပ်မံ တိုက်ခိုက်ခဲ့ခြင်းဖြစ်ပြီး ခမရ ၄၃၇ ကျပြီဖြစ်၍ မိုး​မောက်မြို့နယ်မှာ စစ်​ကောင်စီတပ်ကင်းစင်သွားပြီဖြစ်သည်။ အဆိုပါ တိုက်ပွဲတွင် KIA နှင့်အတူ ရက္ခိုင့်တပ်တော်(AA)၊ KPDF ပူးပေါင်းတပ်များ ပါဝင်လျက်ရှိသည်။