ဟန်နွေ/People’s Spring
ချင်းပြည်နယ် မင်းတပ်မြို့နယ်အတွင်းကို စစ်ကောင်စီတပ်ကလေကြောင်းတိုက်ခိုက်မှုဆက်တိုက်ပြုလုပ်လျက်ရှိသည့်အတွက် ပြည်သူလူထုများ လိုက်နာရမည့်အချက်များကို ချင်းဒေသကာကွယ်ရေးတပ်(CDF)က သြဂုတ် ၁၉ ရက်တွင်ထုတ်ပြန်သည်။
အဆိုပါ အချက်များမှာ လူစုလူဝေး မပြုလုပ်ရန်၊ နေအိမ်များအနီးအိမ်အောက်မဟုတ်သည့်နေရာ၌ပုန်းခိုစရာ နေရာများသေချာတူးပေးကြရန်၊ မိမိအန္တရယ်ကင်းဖို့ သတင်းများကို အုပ်ချုပ်ရေးမှူး(သို့)တာဝန်ရှိသူများကိုသာ မေးမြန်းရန်၊ပြည်သူများစိတ်သောက ရောက်စေသည့်သတင်းမှားဖြန့်ဝေခြင်းများမပြုလုပ်ကြရန် ထုတ်ပြန်ထားခြင်းဖြစ်သည်။
Public Service Announcement
စစ်ကောင်စီသည် ဩဂုတ် ၁၉ ရက်မနက် အစောတွင် မင်းတပ်မြို့ အမှတ်(၄) တစ်နေရာသို့ ပေါင် ၅၀၀ ဗုံးနှင့် ဗုံးအသေး ၇ လုံး ကြဲချတိုက်ခိုက်ခဲ့ကြောင်း မင်းတပ်မှ ကာကွယ်ရေးတပ်ဖွဲ့ဝင်တစ်ဦးက အသိပေးသည်။
“မကွဲသေးသည့် ဗုံးများရှိနေသည့်အပြင် ထိခိုက်ပျက်ဆီးမှုများလည်း ရှိတယ်လို့ကြားသိရပါတယ်” ဟုလည်း မင်းတပ်ဒေသခံက လူမှုကွန်ရက်၌ရေးသားသတိပေးထားသည်။
လေကြောင်းရန်ကို ပြည်သူများ နှင့် ရဲဘော်များ အထူးဂရုစိုက်ကြရန်လည်း ဒေသခံက တိုက်တွန်းထားသည်။
စစ်ကောင်စီတပ်သည် တိုက်ပွဲဖြစ်ပွားမှုမရှိဘဲ မင်းတပ်မြို့နယ်ကို လေကြောင်း၊ လက်နက်ကြီး တိုက်ခိုက်မှုများ မကြာခဏ ပြုလုပ်လျက်ရှိရာ အရပ်သားသေဆုံးထိခိုက်မှုများ ရှိခဲ့သည်။
