နွားထိုးကြီးမြို့နယ်တွင် စစ်တပ်က လေကြောင်းထပ်မံတိုက်ခိုက်

အင်ကြင်း/People’s Spring

မန္တလေးတိုင်း၊ နွားထိုးကြီးမြို့နယ်ကို စစ်ကောင်စီတပ်က နှစ်ရက်ဆက်တိုက် လေကြောင်းထပ်မံ တိုက်ခိုက်ခဲ့ရာ လက်ဝဲမြင်းနီကျေးရွာရှိ ဘုန်းကြီးကျောင်းနှင့် စာသင်ကျောင်းပျက်စီးပြီး အမျိုးသမီးတစ်ဦး ဒဏ်ရာရရှိခဲ့ကြောင်း ဒေသခံများက ပြောသည်။

ယနေ့ (ဩဂုတ် ၂၁ရက်) နေ့လယ် ၁၂နာရီခန့်က နွားထိုးကြီးမြို့နယ်၊ လက်ဝဲမြင်းနီကျေးရွာကို စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ လေကြောင်းဖြင့် ဗုံးကြဲတိုက်ခိုက်ခဲ့သည်။ တိုက်ခိုက်မှုကြောင့် ကျေးရွာရှိ ဘုန်းကြီးကျောင်းနှင့် စာသင်ကျောင်းပျက်စီးပြီး အသက်(၅၀) အရွယ် အမျိုးသမီးတစ်ဦး ခန္ဓာကိုယ်အောက်ပိုင်း ထိခိုက်ဒဏ်ရာရရှိခဲ့ကြောင်း ဒေသခံများက ပြောသည်။

“ဘုရားစေတီ ပျက်စီးသွားတယ်။ ဘုန်းကြီးနေတဲ့ အဆောင်ရယ်၊ သိမ်ရယ်၊ ဓမ္မာရုံရယ်၊ ဓမ္မာရုံကတော့ အမိုးတွေမျက်နှာကျက်တွေ ပေါက်ပြဲကုန်တယ်။ ရိပ်သာအုတ်တံတိုင်းတွေ ပျက်စီးသွားတယ်။ ရိပ်သာရဲ့အရှေ့ဘက်ကအိမ် မှန်ပြတင်းတွေကွဲတယ်။”ဟု ဒေသခံတစ်ဦးက ပြောသည်။

Public Service Announcement

စစ်ကောင်စီ၏ အကြောင်းမဲ့လေကြောင်း ပစ်ခတ်တိုက်ခိုက်မှုများကြောင့် ကျေးရွာအတွင်းပြည်သူများ မနေရဲတော့ဘဲ ထွက်ပြေးတိမ်းရှောင်နေရကြောင်း ဒေသခံများက ပြောသည်။

သြဂုတ် ၂၀ ရက် နေ့လယ်ကလည်း လက်ဝဲမြင်းနီရွာအနီးရှိ ကွမ်းအုံကျေးရွာရှိ ဘုန်းကြီးကျောင်းကို လေကြောင်းတိုက်ခိုက်ခဲ့ရာ ပြည်သူသုံးဦးသေဆုံးပြီး ဘုန်းကြီးတစ်ပါး အပါအဝင်သုံးဦး ဒဏ်ရာရရှိခဲ့သည်။

စစ်ကောင်စီတပ်က ယခုရက်ပိုင်းအတွင်း မြင်းခြံ၊ နွားထိုးကြီး၊ တောင်သာ၊ ငါန်းဇွန်မြို့နယ်တို့တွင် လေကြောင်းတိုက်ခိုက်မှု နေရာခြောက်ခုထက် မနည်းပြုလုပ်ခဲ့ပြီး ဒေသခံပြည်သူများ ထိခိုက်မှုအချို့ ရှိခဲ့သည်။

နွားထိုးကြီးမြို့သည် သြဂုတ် ၁၀ရက်က မြင်းခြံခရိုင်အထူးစစ်ဆင်ရေးဖြင့် မြို့ပေါ်၌တိုက်ပွဲစတင်ပြီးနောက် စစ်ကောင်စီ၏ Non CDMဝန်ထမ်းများထွက်ပြေးသွားပြီးနောက် စစ်ကောင်စီ၏ အုပ်ချုပ်ရေးယန္တရားပျက်စီးခဲ့သည်။