ပခုက္ကူမြို့နယ်ရှိ စစ်ကောင်စီနယ်မြေရဲစခန်းနှစ်ခု စခန်းစွန့်သွား

ဟာနာဆန်/People’s Spring

မကွေးတိုင်း၊ ပခုက္ကူမြို့နယ်အတွင်းရှိ ရဲစခန်းနှစ်ခုမှ စစ်ကောင်စီတပ်နှင့်ရဲများ စခန်းစွန့် ဆုတ်ခွာသွားကြောင်း သတင်းရရှိသည်။

ယနေ့(သြဂုတ် ၂၂ရက်)နံနက် ၂နာရီခန့်က ပခုက္ကူမြို့နယ်ရှိ သာကြီးတောင်ရေနံမြေ ရဲကင်းစခန်းရှိ ရဲများမှာ စခန်းစွန့်ခွာထွက်ပြေးပြီး ကမ္မမြို့မရဲစခန်းအတွင်းသို့ သွားရောက်ပူးပေါင်းဒေသတွင်းပြည်သူ့ကာကွယ်ရေးအဖွဲ့များက ပြောသည်။

Public Service Announcement

သာကြီးတောင်ရဲကင်းစခန်းအား သြဂုတ် ၂၀ ရက် နံနက်က တိုက်ခိုက်ခံရပြီး စစ်ကောင်စီတပ်သား ငါးဦးသေဆုံးကာ စစ်သုံ့ပန်းသုံးဦးနှင့် လက်နက် ၈လက်အပါအဝင် ခဲယမ်းများအား PDFများက ရရှိခဲ့သည်။ ထို့နောက် တစ်ရက်အကြာတွင် စခန်းစွန့်ခွာသွားခြင်းဖြစ်သည်။

တချိန်တည်းမှာပင် ပခုက္ကူမြို့နယ်၊ ကျထိုးနယ်မြေရဲစခန်းမှ စစ်ကောင်စီတပ်နှင့်ရဲ အင်အား ၂၅ဦးခန့်သည် ညောင်ကျစ်ပင်ပျူစောထီးစခန်းသို့ ဆုတ်ခွာသွားကြောင်း ဒေသတွင်းပြည်သူ့ကာကွယ်ရေးအဖွဲ့များက ပြောသည်။

“သာကြီးတောင်ကတော့ အတိုက်ခံရလို့ ဆုတ်သွားတာ။ ကျထိုးကတော့ ကျွံနေတဲ့စခန်းဆိုတော့ အဆော်ခံရမှာသိနေတော့လေ။ မဆော်ခံရခင် ဆုတ်သွားတဲ့သဘောပါ။ သူ့ကိုစစ်ကူလည်းမပို့နိုင်ဘူး။ ကျွံနေတာထီးထီးကြီးဖြစ်နေတာပေါ့။”ဟု မြိုင်ပကဖမှ ရဲဘော်တစ်ဦးက ပြောသည်။

အဆိုပါ စခန်းများအား စစ်ကောင်စီတပ် ပြန်အထိုင်မချနိုင်စေရန် PDFများက မီးရှို့ဖျက်ဆီးခဲ့ကြောင်း သိရသည်။

သြဂုတ် ၇ရက်နှင့် ၈ရက်များကလည်း ပခုက္ကူခရိုင်၊ မြိုင်မြို့နယ်အတွင်းရှိ ကိုင်းတောမရဲစခန်းနှင့် ဝက်ပုတ်ပျူစောထီးစခန်းများအား လက်နက်ခဲယမ်းများနှင့်တကွ PDFများက သိမ်းပိုက်နိုင်ခဲ့သည်။