ဟန်နွေ/People’s Spring
မွန်ပြည်နယ် ရေးမြို့နယ်တွင် စစ်ကောင်စီတပ်ဖွဲ့ကို ရေးပြည်သူ့ကာကွယ်ရေးတပ်ဖွဲ့(YPDF)၊ ကရင်အမျိုးသားလွတ်မြောက်ရေးတပ်မတော်(KNLA) တို့နှင့် ပူးပေါင်းပြီး တိုက်ခိုက်ခဲ့ကြောင်း မွန်ပြည်သစ်ပါတီ-စစ်အာဏာရှင်တိုက်ဖျက်ရေး(NMSP-AD)က သတင်းထုတ်ပြန်သည်။
အင်အား ၂၀ခန့်ရှိ စစ်ကောင်စီတပ်သည် ရေးမြို့နယ် ကွမ်ကျိုက်ရွာ ဘက် ဝင်ရောက်တပ်စွဲရန် သတင်းရ၍ ဩဂုတ် ၂၉ရက် မနက်တွင် NMSP(AD) ၊ YPDF နှင့် KNLA ပူးပေါင်းတပ်ဖွဲ့တို့က ကြားဖြတ်တိုက်ခိုက်ခဲ့သည်ဟုဆိုသည်။
Public Service Announcement
တိုက်ပွဲမှာ နာရီဝက်ခန့် ကြာမြင့်ခဲ့ပြီး စစ်ကောင်စီတပ်ဘက်က ၁၀ဦးထက်မနည်း သေဆုံးထိခိုက်ရှိခဲ့ကြောင်း အသိပေးထားပြီး ပူးပေါင်းတပ်မှ ထိခိုက်မှု ရှိမရှိ အခြေအနေကို ဖော်ပြမထားပေ။
လွတ်လပ်သောမွန်သတင်းအေဂျင်စီ၏ တိုက်ပွဲသတင်းဖော်ပြချက်တွင် ကွမ်ကျိုက်ရွာ တိုက်ပွဲ စစ်ကောင်စီက လက်နက်ကြီး ပစ်ကူ ပေးခဲ့ပြီး စစ်ကူတပ်များ ထပ်ရောက်လာကြောင်း ဒေသခံကို ကိုးကား ဖော်ပြထားပြီး စစ်ကောင်စီတပ်ဘက်မှ ၃ဦးထက်မနည်း ထိခိုက်သေဆုံးခဲ့ဟု ဆိုသည်။
NMSP-ADသည် ယခုနှစ်ဆန်းပိုင်းတွင် မွန်ပြည်သစ်ပါတီမှ ခွဲထွက်ပြီး စစ်ကောင်စီကို တော်လှန်တိုက်ခိုက်နေခြင်းဖြစ်သည်။ထိုသို့ တိုက်ခိုက်ရာတွင် မွန်တော်လှန်ရေးတပ်ဖွဲ့များအပြင် ဒေသတွင်း အခြားသော တော်လှန်ရေးတပ်ဖွဲ့များနှင့်ပူးပေါင်းကာ စစ်ရေးဖော်ဆောင်လျက်ရှိသည်။
