နောင်ချို တောင်ခမ်းအမြောက်တပ်၌ ဆက်လက်တိုက်ပွဲပြင်းထန်

ဟန်နွေ/People’s Spring

ရှမ်းပြည်နယ်မြောက်ပိုင်း၊ နောင်ချိုမြို့နယ် တောင်ခမ်းကျေးရွာအခြေစိုက် စစ်ကောင်စီ အမြောက်တပ် (၉၀၂)တပ်ရင်းတွင် ယနေ့ ဩဂုတ် ၃၀ရက် တိုက်ပွဲဆက်လက်ဖြစ်ပွားခဲ့ကြောင်း တအာင်းတပ်မတော်(TNLA)က ထုတ်ပြန်သည်။

အဆိုပါ (၉၀၂)တပ်စခန်းတိုက်ပွဲတွင် စစ်ကောင်စီတပ်မှ Jet Fighter ဖြင့် (၂)ကြိမ် ပစ်ကူပေး တိုက်ခိုက်ခဲ့ပြီး Y12 ဖြင့် လက်နက်ခဲယမ်းများ ၈၅ထုပ်လာရောက်ကြဲချခဲ့သည်ဟု ဆိုသည်။

Public Service Announcement

TNLAအနေဖြင့် ဩဂုတ် ၂၈ရက်တွင် တောင်ခမ်းရွာရှိ အမတ(၂၀၆)နှင့် အမတ(၄၀၆တပ်ရင်းများကို တိုက်ခိုက်သိမ်းပိုက်ခဲ့ပြီးနောက် ကျန်နေသည့် အမှတ်(၉၀၂) အမြောက်စခန်းကွပ်ကဲမှုဌာနချုပ် (မစခ-၉၀၂)နှင့် အမတ(၃၅၄) တပ်ရင်းတို့ကို ဆက်လက် တိုက်ခိုက်နေခြင်းဖြစ်သည်။

ရှမ်းပြည်နယ်တောင်ပိုင်း ရပ်စောက်မြို့နယ် ကျောက်ဂူမှ နောင်ချိုမြို့နယ်အတွင်းသို့ စစ်အင်အားပြန်လည်ဖြည့်တင်းရန် ကြိုးပမ်းနေသည့် စစ်ကောင်စီတပ်က ထိုးစစ်ဆင်လာ၍ နှစ်ဖက်တိုက်ပွဲ ဖြစ်ပွားခဲ့ဟုလည်း TNLA ၏ ထုတ်ပြန်ချက်၌ ဖော်ပြထားသည်။

TNLAအနေဖြင့် ရှမ်းမြောက်တိုက်ပွဲများ ချက်ချင်းရပ်တန့်ရန် တရုတ်အစိုးရက ဩဂုတ် ၂၉ရက် နေ့စွဲဖြင့် စာပို့ ခြိမ်းခြောက်ခဲ့သော်လည်း ယနေ့ တိုက်ပွဲဆက်ဖြစ်နေခြင်းဖြစ်သည်။

တရုတ်အစိုးရ၏ စာကိုလက်ခံရရှိကြောင်း TNLA ပြောရေးဆိုခွင့်ရှိသူ လွေးယေဦးက အတည်ပြုပြီး အဆိုပါစာကို အဖွဲ့တွင်း ဆွေးနွေးနေဆဲဖြစ်ကာ တုန့်ပြန်ခြင်းမရှိသေးဟု အသိပေးသည်။

TNLAသည် ၁၀၂၇ စစ်ဆင်ရေး ပထမပိုင်းတွင် မြို့ ၇မြို့ ကို သိမ်းပိုက်ထားပြီး ယခုနှစ် ဇွန်လ ၂၅ရက်မှစ တင်သည့် စစ်ဆင်ရေးဒုတိယပိုင်းတွင် နောင်ချို၊ ကျောက်မဲ၊ မိုးကုတ်၊ မိုးမိတ် မြို့များကို အပြီးသတ် သိမ်းပိုက်ထားပြီး သီပေါမြို့ကိုလည်း ထိန်းချုပ်ထားသည်။