အင်ကြင်း/People’s Spring
မန္တလေးတိုင်း၊ နွားထိုးကြီးမြို့နယ်ကို စစ်ကောင်စီက တိုက်ပွဲဖြစ်ပွားခြင်းမရှိဘဲ လေကြောင်းထပ်မံတိုက်ခိုက်ခဲ့ရာ အမျိုးသမီးတစ်ဦးသေဆုံးပြီး ဘုန်းကြီးကျောင်းနှင့် နေအိမ်အချို့ ပျက်စီးကြောင်း ဒေသခံများက ပြောသည်။
ယနေ့(သြဂုတ် ၃၁ရက်) နံနက်စော ၁နာရီခွဲခန့်က နွားထိုးကြီးမြို့နယ်၊ ထနောင်းပင်ကျေးရွာကို စစ်ကောင်စီတပ်က လေကြောင်းမှ ဗုံးသီးတစ်လုံးချတိုက်ခိုက်ခဲ့ရာ အမျိုးသမီးတစ်ဦးသေဆုံးကြောင်း ဒေသခံများက ပြောသည်။
Public Service Announcement
“ထနောင်းပင်က နွားထိုးကြီးမြို့နဲ့သိပ်မဝေးဘူး။ ၂ မိုင်လောက်ပဲဝေးတာ။ မြို့အခြေနဲ့ကပ်ရပ်လေးပဲ။ နွားထိုးကနေထွက်လာရင် မလှိုင်သွားတဲ့လမ်းအနောက်ဘက်ကပ်ရပ်ပဲ။ တိုက်ပွဲမရှိဘဲပစ်တာ။”ဟု နွားထိုးကြီးဒေသခံတစ်ဦးက ပြောသည်။
ထို့အပြင် နေအိမ် ၂လုံးအထက်ပျက်စီးကြောင်း နွားထိုးကြီးသတင်းစုံတာဝန်ခံက ပြောသည်။
အလားတူ ထနောင်းပင်ကျေးရွာအား မပစ်ခတ်မီ မိနစ်ပိုင်းအလိုက ကျွန်းဒေါင့်ကျေးရွာကိုလည်း လေကြောင်းမှ ဗုံးကြဲတိုက်ခိုက်ရာ ဘုန်းကြီးကျောင်းနှင့် လူနေအိမ်တစ်လုံး ထိခိုက်ပျက်စီးခဲ့ကြောင်း ဒေသခံများက ပြောသည်။
ထို့အပြင် ယမန်နေ့ညနေ ၅ နာရီခန့်ကလည်း နွားထိုးကြီးရဲစခန်းမှ မြို့တောင်ဘက်သို့ လက်နက်ကြီး ၅ လုံးပစ်ခတ်ခဲ့ရာ ထိခိုက်မှုအခြေအနေမသိရသေးကြောင်း ဒေသခံများက ပြောသည်။
မြင်းခြံခရိုင်အထူးစစ်ဆင်ရေးစတင်ပြီးနောက်ပိုင်း စစ်ကောင်စီက နွားထိုးကြီးနယ်အတွင်း ကျေးရွာများအား လေကြောင်းတိုက်ခိုက်ခဲ့ရာ ပြည်သူ ၃ဦးသေဆုံးပြီး ၆ ဦးထက်မနည်း ထိခိုက်ဒဏ်ရာရရှိခဲ့သည်။
သြဂုတ် ၂၉ ရက်က မြင်းခြံခရိုင်အထူးစစ်ဆင်ရေးအဖြစ် ရန်ကုန်-မန္တလေးအမြန်လမ်းမနှင့် တစ်မိုင်ခန့်အကွာရှိ နွားထိုးကြီးမြို့နယ်၊ ကုက္ကိုသီးကျေးရွာဘုန်းကြီးကျောင်း၌ တပ်စွဲထားသော စစ်ကောင်စီတပ်ကို နွားထိုးကြီးPDFနှင့်ပူးပေါင်းတပ်များက တိုက်ခိုက်ရာ စစ်ကောင်စီတပ်ဖွဲ့ဝင် ၅ ဦး သေဆုံးပြီး ဗိုလ်ကြီးဝေဖြိုးသူအပါအဝင် စစ်သုံ့ပန်း ၂ ဦးနှင့် လက်နက်ခဲယမ်းများ သိမ်းဆည်းရမိခဲ့သည်။
ညနေပိုင်းတွင် ဆူးရစ်ကုန်းကျေးရွာနှင့် ကုက္ကိုသီးကျေးရွာတို့အား လေကြောင်းတိုက်ခိုက်ခဲ့ရာ နေအိမ်အချို့ ပျက်စီးကြောင်း ဒေသခံအချို့က ပြောသည်။
သြဂုတ် ၁၀ရက်က စတင်ခဲ့သည့် မြင်းခြံခရိုင် အထူးစစ်ဆင်ရေး၏ နွားထိုးကြီးမြို့ပေါ်တိုက်ပွဲတွင် စစ်ကောင်စီတပ်စခန်း လေးခုကိုသိမ်းပိုက်ရရှိခဲ့သည်။
