မိထက်/People’s Spring
ယာဂီ (YAGI)တိုင်ဖွန်းမုန်တိုင်းအရှိန် နှင့် ဘင်္ဂလားပင်လယ်အော်မှ လေဖိအားနည်းရပ်ဝန်းကြောင့် မြန်မာနိုင်ငံဒေသအများစုတွင် မိုးများနိုင်ပြီး ရေဘေးသတိပြုရန်သတိပေးချက်များရှိနေသည်။
တောင်တရုတ်ပင်လယ်မှ အားကောင်းသည့် တိုင်ဖွန်းမုန်တိုင်း ယာဂီသည် ယနေ့ (စက်တင်ဘာဘ ၆ရက်)တွင် တရုတ်နိုင်ငံသို့ ဝင်ရောက်ပြီး ဗီယက်နမ်ကမ်းခြေကို စက်တင်ဘာ ၇ ရက်ညပိုင်းတွင် ဖြတ်ကျော်ဝင်ရောက်မည်ဖြစ်သည်။ ထိုမှတဆင့် ထိုင်း၊ မြန်မာ၊လာအိုနိုင်ငံတို့ ထိစပ်နေသော ရွှေတြိဂံဒေသကို ကုန်းတွင်းလေဖိအားနည်းရပ်ဝန်းအဖြစ် ဆက်လက်ရွေ့လျားနိုင်ပြီး မြန်မာဘက်၌မုန်တိုင်းအရှိန်ကြောင့် မိုးများနိုင်ကြောင်း မိုးလေဝသအရေးလေ့လာသူ ဦးဝင်းနိုင်က သတိပေးထားသည်။
Public Service Announcement
ထို့အပြင် ဘင်္ဂလားပင်လယ်အော်မှ လေဖိအားနည်းရပ်ဝန်းလည်း ဖြစ်လာနိုင်ပြီး လက်ရှိရာသီဥတုအခြေအနေများကြောင့် ရှမ်းပြည်နယ်၊ မန္တလေးတိုင်း၊ စစ်ကိုင်းတိုင်း၊ ကရင်ပြည်နယ်၊ မွန်ပြည်နယ်၊ တနင်္သာရီတိုင်း၊ ဧရာဝတီတိုင်း၊ ရန်ကုန်တိုင်းနှင့် ပဲခူးတိုင်းတို့တွင် နေရာကွက်၍ စက်တင်ဘာလ ၇ ရက် မှ ၁၂ ရက်အတွင်း မိုးကောင်းနိုင်ကြောင်း သတိပေးထားသည်။
ထိုဒေသများ၌ ၂၄နာရီအတွင်း မိုးရေချိန် ၇လက်မခန့်မှ ၁၀လက်မခန့်အထိ ရွာနိုင်ကြောင်း မိုးလေဝသဝက်ဆိုက်များ၌ သတိပေးထားသည်။
ဘင်္ဂလားပင်လယ်အော်မှ လေဖိအားနည်းရပ်ဝန်းသည်လည်း ဆိုင်ကလုန်းမုန်တိုင်းဖြစ်လာနိုင်ခြေ ၈၀ ရာခိုင်နှုန်းအထိအထိရှိနေကြောင်း မိုးလေဝသခန့်မှန်းချက်များထုတ်ပြန်ပေးနေသည့် ECMWF က ခန့်မှန်းထားသည်။
အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေး ဝန်ကြီးဌာန (MOHADM) ကလည်း ဘင်္ဂလားပင်လယ်အော်တွင် လေဖိအားနည်းရပ်ဝန်းအရှိန်ကြောင့် တနင်္သာရီကမ်းရိုးတန်း၊ မြစ်၀ကျွန်းပေါ် ၊ရခိုင်ကမ်းရိုးတန်းနှင့် မြန်မာနိုင်ငံအလယ်ပိုင်း ဒေသအချို့တွင် မိုးသည်းထန်နိုင်ပြီး တနင်္သာရီတိုင်း၊ မွန်ပြည်နယ်၊ ကရင်ပြည်နယ်၊ ကရင်နီပြည်၊ ရန်ကုန်တိုင်း (ကိုကိုကျွန်းမြို့နယ်)၊ ဧရာ၀တီတိုင်း၊ ရခိုင်ပြည်နယ်၊ မကွေးတိုင်း၊ နေပြည်တော်တို့တွင် စက်တင်ဘာလ ၅ ရက်နေ့မှ ၈ ရက်နေ့အတွင်း မိုးများနိုင်ကြောင်းသတိပေးထားသည်။ အဆိုပါ ဒေသများ၌ ရေဘေး၊ မြေပြိုမှုဘေးများ ကြိုတင်ကာကွယ်ရန် MOHADM က သတိပေးထားသည်။
ယာဂီမုန်တိုင်းသည် ဟိုင်နန်ပြည်နယ် အပါအဝင် တရုတ်နိုင်ငံတောင်ပိုင်းအတွက် အန္တရာယ်ကြီးမားပြီး ကျောင်းများ ပိတ်ထားသလိုလေယာဉ်ခရီးစဉ်အချို့လည်း ဖျက်သိမ်းကာ ကုန်းမြင့်ဒေသများ၌ မြေပြိုမှု အန္တရာယ်သတိပေးချက်များ ထုတ်ပြန်ထားသည်။
(ယာဂီတိုင်ဖွန်း ဂြိုလ်တုမြေပုံ နှင့် ဖြတ်သန်းဖွယ်ရှိသော မုန်တိုင်းလမ်းကြောင်း ။ဓါတ်ပုံ-wunderground ၊NY Times၊ NOAA)
