ဇေအောင်/People’s Spring
မန္တလေးတိုင်း၊ နွားထိုးကြီးမြို့နယ်၊ ဆူးရစ်ကုန်းကျေးရွာကို စစ်ကောင်စီ လေကြောင်းမှ ဗုံးကြဲတိုက်ခိုက်ခဲ့ရာ နေအိမ် သုံးလုံး ပျက်စီးခဲ့ကြောင်း သတင်းရရှိသည်။
ယနေ့(စက်တင်ဘာ ၈ရက်) နံနက်စော ၁နာရီကျော်က နွားထိုးကြီးမြို့နယ်၊ ဆူးရစ်ကုန်းကျေးရွာကို စစ်ကောင်စီက လေကြောင်းမှ ပေါင် ၅၀၀ဗုံးကြဲ တိုက်ခိုက်ခဲ့ရာ နေအိမ်သုံးလုံးပျက်စီးခဲ့ကြောင်း ဒေသခံများက ပြောသည်။
Public Service Announcement
“ဆူးရစ်ကုန်းက ဒါရောဆို ငါးကြိမ်ရှိပြီ။ လူတွေကတော့ ရွာပြင်ထွက် နေကြတာဆိုတော့ပြည်သူတွေတော့ တစ်ယောက်မှမထိဘူး။ အိမ်တွေကတော့ ပျက်စီးသွားတာပေါ့။ ရွာပြင်ကျတယ် ရယ်။ အိမ်တွေရယ်။”ဟု နွားထိုးကြီးမြို့နယ် ပြည်သူ့ကာကွယ်ရေးအဖွဲ့(ပကဖ)တာဝန်ရှိသူတစ်ဦးက ပြောသည်။
ဆူးရစ်ကုန်းကျေးရွာကို စက်တင်ဘာ ၅ရက်ကလည်း လေကြောင်းတိုက်ခိုက်ခဲ့ရာ နေအိမ်သုံးလုံးပျက်စီးခဲ့သည်။
အလားတူ အဆိုပါနေ့တွင်လည်း မြင်းခြံမြို့နယ်၊ ပျားကျေးရွာအား လေကြောင်းမှ ဗုံးကြဲတိုက်ခိုက်ခဲ့သည်။
ပြီးခဲ့သည့် သြဂုတ် ၁၀ရက်က နွားထိုးကြီးမြို့ရှိ စစ်ကောင်စီတပ်များ တိုက်ခိုက်ခံရပြီးနောက် နွားထိုးကြီးမြို့နယ်အား သြဂုတ်လလယ်မှ စက်တင်ဘာ ပထမပတ်အတွင်း လေကြောင်းမှ ၁၂ ကြိမ်ထက်မနည်းတိုက်ခိုက်ခဲ့ရာ ဒေသခံပြည်သူ ၄ဦးထက်မနည်းသေဆုံးပြီး သံဃာတော်များအပါအဝင် ၃၀ ထက်မနည်း ထိခိုက်ဒဏ်ရာရရှိခဲ့သည်။ ထို့အပြင် ဘုန်းကြိီးကျောင်း၊ စာသင်ကျောင်း၊ ဘုရားစေတီပုထိုးများနှင့် လူနေအိမ်အများအပြား ထိခိုက်ပျက်စီးခဲ့သည်။
သြဂုတ် ၁၀ရက်က စတင်ခဲ့သည့် မြင်းခြံခရိုင် အထူးစစ်ဆင်ရေး၏ နွားထိုးကြီးမြို့ပေါ်တိုက်ပွဲတွင် စစ်ကောင်စီတပ်စခန်း၄ခုကို တော်လှန်ရေးတပ်များက သိမ်းပိုက်ခဲ့သည်။
သြဂုတ် ၂၉ ရက်ကလည်း ရန်ကုန်-မန္တလေးအမြန်လမ်းမနှင့် တစ်မိုင်ခန့်အကွာရှိ နွားထိုးကြီးမြို့နယ်၊ ကုက္ကိုသီးကျေးရွာဘုန်းကြီးကျောင်း၌ တပ်စွဲထားသော စစ်ကောင်စီတပ်စခန်းကို နွားထိုးကြီးPDFနှင့် ပူးပေါင်းတပ်များက တိုက်ခိုက်ရာ စစ်ကောင်စီတပ်ဖွဲ့ဝင် ၅ ဦး သေဆုံးပြီး ဗိုလ်ကြီးဝေဖြိုးသူအပါအဝင် စစ်သုံ့ပန်း ၂ ဦးနှင့် လက်နက်ခဲယမ်းများ သိမ်းဆည်းရခဲ့သည်။
