ဇော်ရမ်း၊ဟန်နွေ/People’s Spring
ကချင်ပြည်နယ်၊ ဖားကန့်မြို့နယ်၊ ဆိုင်းတောင်ကျေးရွာတွင် တိုက်ပွဲဆက်ပြင်းထန်နေပြီး စစ်ကောင်စီက လက်နက်ကြီးများပစ်ခတ်နေ၍ ဒေသခံများသည် အလံဖြူထောင်၍ ဘေးလွတ်ရာသို့ ထွက်ပြေးနေကြသည်။
ဆိုင်းတောင်ကျေးရွာတွင် ယမန်နေ့(စက်တင်ဘာ ၈ရက်) ညနေ ၃နာရီခွဲမှစ၍ စစ်ကောင်စီနှင့် ကချင်လွတ်လပ်ရေးတပ်မတော်(KIA)၊PDF ပူးပေါင်းတပ်များ တိုက်ပွဲဖြစ်ပွားခဲ့ခြင်း ဖြစ်သည်။
” စစ်တပ်က မြေပြင်ကနေ စစ်ကြောင်းထိုးတယ်။ အဲဒီစစ်ကြောင်းကို ဗျူဟာကုန်းကနေလက်နက်ကြီးပစ်ကူပေးတယ်။ ဒါကြောင့် အရပ်သားတွေ အလံဖြူထောင်ပြီးတော့ ထွက်ကုန်ကြပြီ”ဟု ဖားကန့်မြို့ခံတစ်ဦးက ပြောသည်။
Public Service Announcement
ဆိုင်းတောင်ကျေးရွာသည် စစ်ကောင်စီဗျူဟာကုန်းနှင့် ရဲစခန်းကြား၌ တည်ရှိနေ၍ အရပ်သားများအတွက် လုံခြုံရေးအန္တရာယ်ကြီးမားနေသည်ဟု ဒေသခံများက ပြောသည်။
စစ်ကောင်စီပစ်သည့်လက်နက်ကြီးများသည် လူနေအိမ်များအတွင်းကျရောက်ပေါက်ကွဲပြီး ထိခိုက်ပျက်စီးမှုရှိကြောင်း ဆိုင်းတောင်ကျေးရွာဒေသခံများက ပြောသည်။
” အသက်ဘေးကနေ မနည်းလုပြေးရတယ်။ မြေပြင်တိုက်ပွဲမှာက ဘေးလွတ်ရာကို ရှောင်လို့ရတယ်။ အခုက လက်နက်ကြီးနဲ့ရမ်းပစ်နေတာစစ်တပ်က”ဟု နေရပ်စွန့်ခွာခဲ့သည့်ဒေသခံတစ်ဦးက ပြောသည်။
ထို့အပြင် ဆိုင်းတောင်တိုက်ပွဲအတွင်း ငြိမ်းချမ်းရေးအကျိုးဆောင်အဖွဲ့(PCG)ခေါင်းဆောင် ဦးယွပ်ဇော်ခေါင် လက်နက်ကြီး ကျည်ထိမှန် ဒဏ်ရာရခဲ့သည်ဟု ကချင်သတင်းရင်းမြစ်က ပြောသည်။
ဦးယွပ်ဇော်ခေါင် ဦးဆောင်သည့် PCGသည် ယခင်က ကချင်လွတ်လပ်ရေးတပ်မတော်(KIA)နှင့် စစ်တပ်အကြား၊ KIO/KIAနှင့် အစိုးရအကြား ငြိမ်းချမ်းရေးဆွေးနွေးပွဲများ ဖြစ်ပေါ်လာရေး ကြားဝင်ညှိနှိုင်းပေးနေသကဲ့သို့ ကချင်ဒေသခံ ပြည်သူများနှင့် စစ်တပ်၊ ရဲများအကြား ပဋိပက္ခများ၊ ပြဿနာများ ပြေလည်မှုရအောင်လည်း ကြားဝင် ဖြေရှင်းပေးခဲ့သည်။
တစ်ဖက်တွင် ဦးယွပ်ဇော်ခေါင်ပိုင်သည့် ကုမ္ပဏီသည် မြစ်ဆုံအနီး ရွှေတူးဖော်မှု အလွန်အကျွံပြုလုပ်နေခြင်းကြောင့်ကချင်ဒေသခံများ၏ ကန့်ကွက်မှု ခံခဲ့ရသည်။
ထို့အပြင် ဖားကန့်မြို့တွင် စက်တင်ဘာ ၆ရက် ၁၀နာရီခန့်၌ကလည်း စစ်ကောင်စီ၏ လက်နက်ကြီး ပစ်ခတ်မှုကြောင့် လမ်းသွားလမ်းလာနှစ်ဦး ဒဏ်ရာအပြင်းအထန်ရပြီး သေဆုံးခဲ့သည်။ ဖားကန့်မြို့တွင် လက်တလောဖြစ်နေသည့်တိုက်ပွဲများနှင့်ပတ်သက်၍ KIAက သတင်းထုတ်ပြန်ထားခြင်း မရှိသေးပေ။
“စစ်တပ်စစ်ကြောင်း ဗျူဟာထဲပြန်မဝင်ရင်တော့ တိုက်ပွဲက ဆက်ဖြစ်နေမှာ”ဟု KIA၊PDFနှင့် နီးစပ်သူတစ်ဦးက ပြောသည်။
