ကျော်ဇော/People’s Spring
လောင်းလုံးမြို့နယ်အတွင်းရှိ စကျေးရွာအချို့တွင် ဝဲရောဂါ ဖြစ်ပွားလျှက်ရှိပြီး ဆေးဝါးနှင့်ကုသမှုလိုအပ်လျှက်ရှိကြောင်း လောင်းလုံးမြို့နယ်(ပကဖ)မှ တာ ဝန်ရှိသာတစ်ဦးက ပြောသည်။
ဝဲရောဂါအဖြစ်များနေသည့် ကျေးရွာများမှာ ညောပြင်၊ အောက်ကျောက်၀ပ်၊ ကြက်လွှတ်၊ ဇလွတ်စသည့်ကျေးရွာများဖြစ်ပြီး တစ်ရွာလျှင် လူဦးရေ ရာဂဏန်းအထိ ဖြစ်ပွားလျှက်ရှိသည်ဟု စုံစမ်းသိရသည်။
“(ကျန်းမာရေး)စောင့်ရှောက်မှု မပေးနိုင်သေးဘူးဗျ။ လူကြီးလူငယ် အကုန်ဖြစ်နေတာ။ ရွာတစ်ရွာမှာတောင် ရာဂဏန်းနဲ့ရှိတယ်။ အဲတော့အခက်ခဲဖြစ်နေတာရှိတာပေါ့”ဟု လောင်းလုံး(ပကဖ)မှ တာဝန်ရှိသူက ပြော သည်။
Public Service Announcement
ယားနာရောဂါဖြစ်ပွားလျှက်ရှိသည့် ကျေးရွာများသည် ပင်လယ်ကမ်းအနီးတည်ရှိကြပြီး လက်ရှိတွင် တော်လှန်ရေးတပ်ဖွဲ့များ၏ ထိန်းချုပ်နယ်မြေအတွင်း ပါဝင်နေသည့်ကျေးရွာများ ဖြစ်သည်။
“အခုဖြစ်နေတာက မျောက်ကြောက်ရောဂါနဲ့ ဆင်မတူပါဘူးနော်။ ကျမတို့ကွင်းဆင်းရရှိတဲ့ အခြေအနေတွေကို (NUG အစိုးရ)ကျန်းမာရေးဝန်ကြီးဌာနကိုတင်ပြပါတယ်။ အထက်အဆင့်ဆင့်က ဆရာဝန်ကြီးတွေ၊ ပါမောက္ခတွေပြောတာက ဝဲရောဂါလို့ပဲ ပြောပါတယ်။ အဓိကတော့ အဲဒီဝဲကိုကုပ်ခြစ်ရာကတဆင့် ဗစ်တီးရီးယားပိုးဝင်ပြီး ပြန့်နှံ့ကူးစက်လာတာပါ”ဟု လောင်းလုံး(ပကဖ)ကျန်းမာရေးဆိုင်ရာဆေးဘက်တာဝန်ခံနှင့် CDM ကျန်းမာ ရေးဝန်ထမ်းတစ်ဦးက People’s Spring သို့ ပြောသည်။
“အရေအတွက် အရမ်းများတော့ အကုန်လုံးကိုအဆင်ပြေအောင် ကုသမပေးနိုင်သေးဘူး”ဟု လောင်းလုံး(ပကဖ)မှာ တာဝန်ရှိသူက ရှင်းပြသည်။
လက်ရှိတွင် ယားနာရောဂါခံစားနေရသူများမှာ သက်သာကောင်းမွန်လာပြီဖြစ်ပြီး ယခုကဲ့ သို့ ရာနာရောဂါခံစားကြရသည်မှာ စစ်ဘေးရှောင်ရာတွင် လူအစုလိုက်အပြုံလိုက်နေထိုင်ရခြင်း၊ တစ်ကိုယ်ရေသန့်ရှင်းမှုအားနည်းခြင်း စသည့်အချက်များကြောင့်ဖြစ်ကြောင်း လောင်းလုံး(ပကဖ)ကျန်းမာရေးဆိုင်ရာဆေးဘက်တာဝန်ခံနှင့် CDM ကျန်းမာ ရေးဝန်ထမ်းကပြောသည်။
