ရဲခေါင်/People’s Spring
ကရင်နီပြည်နယ်အတွင်း ရေကြီးမှုနှင့် မြေပြိုခြင်းတို့ကြောင့် သေဆုံးသူခြောက်ဦးရှိလာကြောင်း ကယန်းအမျိုးသမီအစည်းအရုံး(KyWO)က ယနေ့ အသိပေးထုတ်ပြန်သည်။
မြေပြင်တွင် ပြည်သူများထိခိုက်သေဆုံးမှုနှင့် အိုးအိမ်ပျက်စီးဆုံးရှုံးမှုများ ယခုထက်များနိုင်ကြောင်းလည်း အသိပေးသည်။
စက်တင်ဘာ ၁၀ရက်ကစ၍ ယနေ့အထိ မိုးအဆက်မပြတ်ရွာသွန်းမှုကြောင့် ကယန်းဒေသနှင့် ကရင်နီပြည်အတွင်း ရေကြီးရေလျှံခြင်း၊ မြေပြိုခြင်းတို့ နေရာအနှံ့ဖြစ်ပွားနေသည်ဟု ဆိုသည်။
Public Service Announcement
ထိုသို့ မိုးအဆက်မပြတ်ရွာသွန်းမှုကြောင့် လူထုများ၏ အိုး၊အိမ်၊တဲများ ရေလွှမ်း ခြင်း၊ လယ်ယာများပျက်စီးခြင်း၊ အသက်ဆုံးရှုံးခြင်း၊ ထိခိုက်ဒဏ်ရာရရှိခြင်းတို့ ကြုံတွေ့ခဲ့ကြောင်း ဖော်ပြသည်။
“အခုလက်ရှိ ကတော့ မိုးအဆက်မပြတ်ရွာသွန်းနေတယ်။စစ်ရှောင်တွေရဲ့ တဲတွေလည်းပါနေတာရှိသလို စိုက်ခင်းများ ပျက်စီးသွားပြီ။ပြီးတော့ သေဆုံးတဲ့ အရပ်သားတွေရှိတယ်။ ဒီးမော့ဆို ပဲ”ဟု ကရင်နီလူမှုကူညီရေးအဖွဲ့တစ်ခုမှ တာဝန်ရှိသူက လူထုနွေဦးသို့ ပြောသည်။
ကရင်နီပြည်နယ်တွင်းရှိ ဒေသခံနှင့် စစ်ရှောင်လူထုများသည် ရေဘေးလွတ်ရာသို့ ထပ်မံရွေ့ပြောင်းနေရခြင်းကြောင့် ရွေ့ပြောင်းနေထိုင်ရေးအတွက် အမိုးအကာများ၊ အဝတ်အထည်များ၊ ရိက္ခာခြောက်များနှင့် အခြေခံအသုံးအဆောင်ပစ္စည်းများ လိုအပ်လျက်ရှိကြောင်း အသိပေးသည်။
” မိုးတအားကြီးတာနဲ့ မြေပြိုတာတွေကြောင့် စစ်ရှောင်စခန်းတွေ အထူးသဖြင့် ဒီးမော့ဆိုအရှေ့ခြမ်းက စစ်ရှောင်စခန်းတွေရေနစ်မြှုပ်တာရှိတယ်။ဖယ်ခုံလည်း တောင်ကျရေးကြောင့် လူသေဆုံးတာရှိတယ်။ ပြီးတော့ ဖရူဆိုအနောက်ခြမ်းဘက်မှာလည်း စစ်ရှောင်စခန်းတွေ ရေမြုပ်တာရှိတယ်။ပြီးတေ့ ဖရူဆိုထဲက ရွယတစ်ရွာဆိုလည်း ရွာလုံးကျွတ် ရွှေ့ရတာလုပ်နေရတယ်”ဟု ကရင်နီပြည် ကြားကာလ အုပ်ချုပ်ရေးကောင်စီအတွင်းရေးမှူး ဦးဗညားက လူထုနွေဦးသို့ပြောသည်။
ကယန်းအမျိုးသမီးအစည်းအရုံး(KyWO)က လက်လှမ်းမီသိရှိရသော စာရင်းအရ ကရင်နီပြည်အတွင်းတွင် သေဆုံးသူ ခြောက်ဦးနှင့် ဒဏ်ရာရသူ နှစ်ဦး၊ နေအိမ်၊တဲပျက်စီးမှု ၄၀ ခန့်ရှိသည်ဟု ဆိုသည်။
လက်ရှိတွင် နိုင်ငံနေရာအနှံ့ မိုးများ၍ ရေကြီးနေပြီး ကရင်နီပြည်နယ်အပါအဝင် အခြားဒေသများတွင်လည်း လူသေဆုံးမှုရှိသည်အထိ ဖြစ်ပေါ်နေသည်။
တရုတ်နိုင်ငံနှင့် ဗီယက်နမ်နိုင်ငံသို့ဝင်ရောက်ခဲ့သော ယာဂီမုန်တိုင်းအရှိန်ကြောင့် မြန်မာနိုင်ငံ
တွင် လက်တလောတွင် မိုးကြီးနေသည်။
မနက်ဖြန်မွန်းတည့်ချိန်အထိ ခန့်မှန်းချက်အရ စစ်ကိုင်းတိုင်းအထက်ပိုင်း၊ ကချင်ပြည်နယ်နှင့် ရှမ်းပြည်နယ်(မြောက်ပိုင်း)တို့တွင် နေရာစိပ်စိပ်နှင့် ကျန်တိုင်းနှင့် ပြည်နယ်တို့တွင် နေရာအနှံ့အပြား မိုးထစ်ချုန်းရွာနိုင်ကြောင်း၊ နေပြည်တော်၊ မန္တလေးတိုင်း၊ မကွေးတိုင်း၊ ရှမ်းပြည်နယ်(တောင်ပိုင်း)၊ ရခိုင်ပြည်နယ်၊ ကရင်ပြည်နယ်နှင့် မွန် ပြည်နယ်တို့တွင် ဒေသအလိုက်နှင့် စစ်ကိုင်းတိုင်း၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ တနင်္သာရီတိုင်းနှင့် ချင်းပြည်နယ်တို့တွင် နေရာကွက်၍ မိုးကြီးနိုင်ကာ ရွာရန်ရာနှုန်းပြည့်ဟု မိုးလေဝသပညာရှင်များက ခန့်မှန်းထားသည်။
