မိထက်/People’s Spring
ရခိုင်ပြည်နယ်တွင် ယနေ့(စက်တင်ဘာ ၃)မှစ၍ သုံးရက်ဆက်မိုးကြီးနိုင်ပြီး လတ်တလောရာသီဥတုအခြေအနေအရ ရန်ကုန်တိုင်း၊ရခိုင်ပြည်နယ်အပါအဝင် တိုင်းနှင့်ပြည်နယ် ခြောက်ခု၌ ရေဘေးအန္တရာယ်ကြီးမားနေကြောင်းအမျိုးသားညီညွတ်ရေးအစိုးရ(NUG)၊လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဦးစီးဌာန(MOHADM)က သတိပေးသည်။
ရခိုင်ပြည်နယ်တွင် စက်တင်ဘာလ ၁၃ ရက်မှ ၁၅ရက်အထိ သုံးရက်ဆက် မိုးကြီးနိုင်ပြီး အဆိုပါကာလအတွင်း မကွေးတိုင်း၊ မန္တလေးတိုင်းအောက်ပိုင်း၊ရန်ကုန်တိုင်း၊ ပဲခူးတိုင်းနှင့် ကရင်ပြည်နယ်တို့တွင် မိုးကြီးခြင်းနှင့်အတူ မြို့ပြရေကြီးခြင်း၊ လျှပ်တစ်ပျက်ရေကြီးခြင်းနှင့် မြေပြိုခြင်းများကို အထူးသတိထားရန် MOHADMကစက်တင်ဘာလ ၁၂ရက်တွင် သတိပေးချက်ထုတ်ပြန်ထားသည်။
Public Service Announcement
စက်တင်ဘာလ (၁၃)ရက်တွင် ရခိုင်ပြည်နယ်အလယ်ပိုင်းနှင့် အောက်ပိုင်း၊မန္တလေးတိုင်းအောက်ပိုင်း၊မကွေးတိုင်းအောက်ပိုင်း နှင့် ပဲခူးတိုင်းတို့တွင် မိုးသည်းထန်စွာ ရွာသွန်းနိုင်ပြီး ရခိုင်ပြည်နယ် နှင့် ပဲခူးတိုင်းတို့ရှိ နေရာအချို့တွင် တနေ့တာအတွင်း မိုးရေချိန်စုစုပေါင်း ၈ လက်မမှ ၁၀ လက်မ)အထိ ရွာသွန်းနိုင်သည်ဟု သတိပေးထားသည်။
စက်တင်ဘာလ (၁၄)ရက်နေ့တွင် ရခိုင်ပြည်နယ် နေရာအနှံ့အပြားနှင့် ပဲခူးတိုင်းနေရာ အတော်များများတွင် မိုးထစ်ချုန်းရွာသွန်းပြီး နေရာကွက်၍ မိုးကြီးနိုင်ကြောင်းသိရသည်။ ချင်းပြည်နယ်၊ စစ်ကိုင်း တိုင်းအောက်ပိုင်း၊ မကွေးတိုင်း၊ မန္တလေးတိုင်းနှင့် ကရင်ပြည်နယ်တို့တွင် နေရာစိပ်စိပ် မိုးသည်းထန်စွာ ရွာသွန်းနိုင်ပါသည်။ ကချင်ပြည်နယ်၊ ရှမ်းပြည်နယ်၊ ရန်ကုန်တိုင်း၊ ဧရာဝတီတိုင်းနှင့် တနင်္သာရီတိုင်းတို့တွင် နေရာကျဲကျဲမိုးရွာသွန်း နိုင်ပါသည်။ ရခိုင်ပြည်နယ်၊ မကွေးတိုင်း၊ ပဲခူးတိုင်းနှင့် ရန်ကုန်တိုင်းတို့တွင် မိုးကြီးခြင်းနှင့်အတူ မြို့ပြရေကြီးခြင်း၊ လျှပ်တစ်ပျက်ရေကြီးခြင်းနှင့် မြေပြိုခြင်းများကို အထူးသတိ ထားသင့်ကြောင်းဖော်ပြထားသည်။
အလားတူ စက်တင်ဘာလ (၁၅)ရက်နေ့တွင် ရခိုင်ပြည်နယ်၊ ချင်းပြည်နယ်တို့တွင် နေရာအနှံ့အပြား၊ ပဲခူးတိုင်း၊ မကွေးတိုင်းအရှေ့ခြမ်းနှင့်မန္တလေးတိုင်း ၊ရန်ကုန်တိုင်း၊ တနင်္သာရီတိုင်း၊ကရင်ပြည်နယ် ၊ ရှမ်းပြည်နယ်နှင့်ကချင်ပြည်နယ်တို့တွင် နေရာကျဲကျဲ မိုးထစ်ချုန်းရွာနိုင်ပါသည်။ ကျန်ဒေသများတွင် နေရာကွက်ကျား မိုးရွာသွန်းနိုင်ပါသည်။ ရခိုင်ပြည်နယ်၊ ချင်းပြည်နယ်၊ မကွေးတိုင်း၊ မန္တလေးတိုင်းအောက်ပိုင်း၊ ပဲခူးတိုင်းနှင့် ကရင်ပြည်နယ်တို့တွင် မိုးကြီးခြင်းနှင့်အတူ မြို့ပြရေကြီးခြင်း၊ လျှပ်တစ်ပျက်ရေကြီးခြင်းနှင့် မြေပြိုခြင်းများကို အထူးသတိထားသင့်ကြောင်း သတိပေးထားသည်။
ယခုအခါ စက်တင်ဘာ ဒုတိယပါတ်မှစ၍ ယာဂီမုန်တိုင်းအကျွင်းအကျန် တိမ်စိုင်များကြောင့် ရှမ်းပြည်နယ်၊ မန္တလေးတိုင်း၊ ပဲခူးတိုင်း၊ နေပြည်တော်တို့ရှိ မြို့အများအပြား၌ မိုးသည်းထန်စွာရွာသွန်းပြီး ရေဘေးကြုံတွေ့နေသည်။ မန္တလေးတိုင်းအတွင်း မြစ်သား၊ ဝမ်းတွင်းမြို့၊ ပဲခူးတိုင်းအတွင်း တောင်ငူ၊ ရေတာရှည်မြို့တို့တွင် ရေဘေးအရေးပေါ်အခြေအနေ ရင်ဆိုင်နေရသည်။ ကရင်ပြည်နယ် ဘားအံမြို့တွင်လည်း သံလွင်မြစ်ရေတက်ပြီး ရေကြီးနေသည်။
ထို့အပြင် ရခိုင်ပြည်နယ်တွင် အာရက္ခတပ်တော်(AA)ထိန်းချုပ်နယ်မြေများအတွင်း မွတ်ဆလင်များအပါအဝင် စစ်ဘေးရှောင် အရေအတွက်မှာငါးသိန်းကျော်ရှိနေသည်။ ပြီးခဲ့သည့်မေလကလည်း ရခိုင်ပြည်နယ်တွင် ရေဘေးကြုံတွေ့ခဲ့ပြီး ရေဘေးစစ်ဘေးရှောင်များအတွက် စားနပ်ရိက္ခာနှင့်လူသုံးကုန်ပစ္စည်းများ အရေးပေါ်လိုအပ်နေကြောင်း AA ကမေလ ၂၄ရက်တွင် ထုတ်ပြန်ထားသည်။
