အင်ကြင်း/People’s Spring
ရေကြီးရေလျှံမှုမှာ မန္တလေးတိုင်း၊ တံတားဦးမြို့နယ်အထိ ရောက်ရှိလာပြီး တံတားဦးမြို့ပေါ်နှင့် အမြန်လမ်းများပေါ်အထိ စတင်ရေကြီးနေကြောင်း ဒေသခံများက ပြောသည်။
ယမန်နေ့(စက်တင်ဘာ ၁၂ရက်ည)ကတည်းက ကျောက်ဆည်မြို့နယ်ဘက်မှ စီးဆင်းလာသော ပန်းလောင်မြစ်နှင့် အခြားမြစ်ချောင်းများမှ ရေများတက်လာ၍ တံတားဦးမြို့နယ်ရှိ အမြန်လမ်းဘေးတဝိုက် စကားအင်း၊ ပန်းယျနှင့် ရှားပင်၊ဒွေးလှ ၊ရွာတော်၊ကျီးအိပ်၊အနောက်ငါးဆူ၊ အိမ်မြင့်စံ၊ ထန်းတော၊ ဝန်ပတေ့ ထန်းလုံးတပ်၊သားများဘရွာ စသည့် ကျေးရွာအများအပြား ရေနစ်မြုပ်နေကြောင်း ဒေသခံများက ပြောသည်။
ထို့အပြင် တံတားဦး ၃၅၇ အဝိုင်းထိပါ ရေများတက်နေပြီး မြို့တွင်း သာဂေါင်ရပ်၊ စိတ္တရမဟီရပ်များရှိ လမ်းများပေါ် ရေကျော်နေကြောင်း မြို့ခံများက ပြောသည်။
Public Service Announcement
“ကျွန်တော်တို့ရွာက မြစ်၊ချောင်းပတ်လည် ဝိုင်းပြီးနေတဲ့ရွာ။ အခုရေဘေး ပြေးစရာမြေမရှိဖြစ်နေပြီ။ နံဘေးနားက မြစ်ရိုးတလျှောက်ရွာတွေလည်း ရေကြီးနေပြီ။ ရွာက အိမ်ဝိုင်းထဲမှာ လူတရပ်မြုပ်လုလုရှိနေပြီတဲ့။အနိမ့်ပိုင်းတွေက အိမ်တွေ မြုပ်ကုန်ပြီ။တချို့က ရွာအထွက်လမ်းမြောင်းဘောင်ဆီသွားကုန်တာ လမ်းတဝက်မှာ ပိတ်မိနေကြတယ်။”ဟု တံတားဦးမြို့နယ်၊ ရှားပင်ကျေးရွာဒေသခံတစ်ဦးက ပြောသည်။
ထို့အပြင် တံတားဦး-ပလိပ်လမ်း၊ ကျောက်ဆည်-တံတားဦးလမ်းများလည်း ရေကျော်၍ ဖြတ်သန်း၍ မရတော့ကြောင်း သိရသည်။
ပြည်သူများလည်း ပိတ်မိနေပြီး ကယ်ဆယ်ရေးအကူအညီများလိုအပ်နေကြောင်း ဒေသခံများက ပြောသည်။
နေပြည်တော်အနီး ရမည်းသင်း၊ ပျော်ဘွယ်၊ သာစည်၊ ဝမ်းတွင်း၊ ကူမဲ၊ မြစ်သား၊ ကျောက်ဆည်မြို့နယ်များ အဆိုးရွားဆုံး ရေကြီးရေလျှံမှုများ ဖြစ်ပွားနေပြီး လူအများအပြား သေဆုံးမှုများပါရှိနေသည်။ ရေဘေးဒုက္ခသည်များအတွက် စားနပ်ရိက္ခာများ အရေးပေါ်လိုအပ်နေပြီး ရေကြီးဒေသများပြားနေ၍ ကယ်ဆယ်ရေးအဖွဲ့များလည်း လုံလောက်မှုမရှိကြောင်း သိရသည်။
