သံလွင်မြစ်ကမ်းတလျောက်က ရွာတွေ ရေဘေးကယ်ဆယ်ရေး လိုအပ်နေ

နိုင်ပကောင်း/People’s Spring

ကရင်ပြည်နယ် မြို့တော် ဘားအံအပါအဝင် သံလွင်မြစ်ကမ်းတလျှောက်က ရွာတွေ အားလုံးနီးပါး ဆိုးဆိုးရွားရွားရေနစ်မြှုပ်နေပြီး အရေးပေါ် ရွှေ့ပြောင်းပေးဖို့ အကူအညီတွေ လိုအပ်နေတယ်လို့ ဒေသတင်းသတင်းရင်းမြစ်တွေထံကသိရပါတယ်။

ဒီနေ့ စက်တင်ဘာလ ၁၄ ရက်မှာဆိုရင် သံလွင်မြစ်ရေဟာ ဘားအံမြို့မှာ စံချိန်တင်အနေ နဲ့ မြို့ရဲ့ စိုးရိမ်ရေမှတ်အထက် ၇ ပေ အထိ ကျော်လွန်ရောက်ရှိလာတာကြောင့် ဘားအံမြို့ပေါ် အားလုံးနီးပါး ရေဘေးကြုံနေရတာပါ။

Public Service Announcement

သံလွင်မြစ်ဘေး လှိုင်းဘွဲ့မြို့နယ်ထဲက ရွှေဂွန်း ၊ မြိင်ကြီးငူ ကျေးရွာကြီးတွေအပြင် ကမမောင်းမြို့ ပေါ်ရပ်ကွက်တွေနဲ့ ရွာတွေမှာလည်းရေနစ်မြှုပ်မှု ဆိုးရွားနေတယ်လို့ ဒေသတွင်းသတင်းရင်းမြစ်က ပြောပါတယ်။

လက်ရှိအခြေအနေမှာ နှစ်ထပ်အိမ်တွေဆိုရင် အိမ်အပေါ်ထပ်ထိ ရေရောက်လာပြီး ရေပတ်လည်ဝိုင်းလာတာကြောင့် ပိတ်မိနေသူတွေ အများအပြား ရှိနေပေမယ့် ကူညီကယ်ဆယ်ရေး မလုံလောက်ဘူးလို့ သိရပါတယ်။

ပိတ်မိနေသူတွေထဲမှာကလေးငယ်တွေ ၊ကိုယ်ဝန်ဆောင်အမျိုးသမီးတွေ နဲ့သက်ကြီးရွယ်အိုတွေပါ ပါဝင်နေပြီး ကိုယ်ထူကိုယ်ထ ကယ်ဆယ်ရေးအဖွဲ့တွေကိုသာ အားထားနေရတယ်လို့ဒေသတွင်းသတင်းရင်းမြစ်ကဆိုပါတယ်။

ရေဘေးကြောင့် ဘားအံ-ဇာသပြင်-မော်လမြိုင် လမ်း၊ ဘားအံ-ရွှေဂွန်း-မြိုင်ကြီးငူ(လှိုင်းဘွဲ)လမ်း၊ ဘားအံ-မြိုင်ကလေး-သထုံကားလမ်းတွေ ဖြတ်သန်းသွားလာလို့မရတော့ပါဘူး။

စစ်ကောင်စီထိန်းချုပ်ထားတဲ့မိုးဇလရဲ့ ဒီနေ့ ထုတ်ပြန်ချက်အရ ဘားအံမှာ သံလွင်မြစ်ရေဟာ နောက်ရက်မှာလည်း လက်ရှိထက် တစ်ပေခန့် ထပ်မြင့်တက်နိုင်သေးတယ်လို့သိရပါတယ်။