မောင်မောင်/People’s Spring
ကရင်နီပြည် – ရှမ်းပြည်နယ်တောင်ပိုင်း နယ်စပ်ရှိ စစ်ကောင်စီတပ်များအား တော်လှန်ရေးတပ်ပေါင်းစုက တိုက်ခိုက်ခဲ့ရာ စစ်ကောင်စီတပ်မှ သေဆုံးသူများပြားခဲ့ပြီး လက်နက် ၂၄လက် သိမ်းရခဲ့ကြောင်း ကရင်နီအမျိုးသားများ ကာကွယ်ရေးတပ်(KNDF)က ထုတ်ပြန်သည်။
စစ်ကောင်စီတပ်များ တပ်စွဲထားသောနေရာများအား စက်တင်ဘာ ၅ရက်တွင် တော်လှန်ရေးတပ်ပေါင်းစုက ဝင်ရောက်တိုက်ခိုက်ခဲ့ရာ စက်တင်ဘာ ၈ရက်အထိ တိုက်ပွဲပြင်းထန်ခဲ့ကြောင်း၊ ကရင်နီ – ရှမ်းတောင်နယ်စပ်ရှိ စစ်ကောင်စီတပ်များ တပ်စွဲစခန်းချထားသည့် လွိင်လင်လေးမြိုတွင်းရှိ ကာကင်းစခန်းများ ၊ ကျောင်းကုန်း ၊ ကုန်းဆွတ် ၊ အောင်ပလ ၊ ကယန်းလေးတာဝါတိုင်ကုန်း စသည့်နေရာများတွင် တိုက်ပွဲများဖြစ်ခဲ့ကြောင်း ဖော်ပြသည်။
လေးရက်ကြာတိုက်ပွဲအတွင်း စစ်ကောင်စီဖက်မှ ထိခိုက်မှုများခဲ့၍ လေကြောင်းဖြင့်ပစ်ကူ၊ ဒရုန်းများ ၊ လက်နက်ကြီးများ အသုံးပြုတိုက်ခိုက်ခဲ့ကြောင်း၊ တိုက်ပွဲများအတွင်း စစ်ကောင်စီတပ်ဖွဲဝင် ၃၀ကျော်သေဆုံးကာ ၃ဦး အရှင်ဖမ်းဆီးရရှိခဲ့ပြီး လက်နက်ကြီး၊ငယ်အစုံ (၂၄)လက်အား တော်လှန်ရေးတပ်ပေါင်းစုက သိမ်းနိုင်ခဲ့ကြောင်း ဓာတ်ပုံမှတ်တမ်းများနှင့်အတူ အသိပေးသည်။
Public Service Announcement
တိုက်ပွဲအတွင်း တော်လှန်ရေးတပ်ပေါင်းစုဘက်မှ ထိခိုက်ကျဆုံးရှိ၊မရှိ အခြေအနေကို ဖော်ပြမထားပေ။
စစ်ကောင်စီတပ်က လွိင်လင်လေးမြို့အတွင်းရှိ တိုက်ပွဲဖြစ်ပွားနေသည့်နေရာမဟုတ်ဘဲ အရပ်သာပြည်သူများနေထိုင်ရာ ရပ်ကွက် အတွင်း ဒရုန်းဖြင့်ဗုံးကြဲခဲ့၍ ဒေသခံအမျိုးသမီး တစ်ဦးအပါအဝင် အရပ်သား ၄ဦးသေဆုံးကာ စစ်ကောင်စီ လက်နက်ကြီးကြောင့် အရပ်သား ၅ဦးဒဏ်ရာရခဲ့သည်ဟု ထုတ်ပြန်သည်။
လက်ရှိအချိန်ကာလအထိ လွိင်ကော်-လွိင်လင်လေး-ဆီဆိုင် လမ်းမကြီးအနီး တွင်လည်း တော်လှန်ရေးတပ်များနှင့် စစ်ကောင်စီတပ်ဖွဲများအကြား ကြိုကြားထိတွေ့မှုများရှိနေခြင်းကြောင့် ဒေသခံများနှင့်အတူ အများပြည်သူများအနေဖြင့် စစ်ရေးသတိကြီးစွာထား၍ နေထိုင်သွားလာကြပါရန် အသိပေးထားသည်။
ထို့ပြင် လတ်တလော ရေဘေးအန္တရာယ်ကိုလည်း အထူးသတိပြုကြရန် KNDFက ထုတ်ပြန်သည်။
ကရင်နီပြည်နယ်တွင် စက်တင်ဘာ ၁၀ရက်မှစ၍ မိုးအလွန်အကျွံရွာသွန်းကာ နေရာအနှံ ရေးကြီးမြေပြိုမှုများဖြစ်၍ ပြည်သူများ (စစ်ဘေးရှောင်များ)၏ အိုးအိမ်ပျက်ဆီးဆုံးရှုးမှုများနှင့် ရေဘေးဒုက္ခများကြီးကြီးမားမားကြုံတွေ့ရင်ဆိုင်နေရဟု ဆိုသည်။
ထို့အပြင် KNDF မှကြီးမှူး၍ပြုလုပ်သော ဆေးသင်တန်းတစ်ခုတွင်လည်း သင်တန်းသားရဲဘော်၊ ရဲမေ ၁၈ဦး ရေကြီးမှုအတွင်းမျှောပါ၍ အသက် ဆုံးရှုံးခဲ့ရဟု အသိပေးထားသည်။ အထက်ပါအခြေနေများနှင့်အတူ မိုးရွာသွန်းမှုများဆက်ရှိနေ၍ ရေကြီးရေလျှံမှုအန္တရာယ်များဖြစ်နိုင်သည့်အပေါ် ပြည်သူများအနေဖြင့် အထူးသတိရှိကြရန် KNDFက သတိပေးထားသည်။
