အင်ကြင်း/People’s Spring
မန္တလေးတိုင်း၊ ပြင်ဦးလွင်ခရိုင်၊ သပိတ်ကျင်းမြို့နယ်တွင် မူးယစ်ဆေးဝါးများအား သုံးစွဲခြင်း လက်ဝယ်ထားရှိခြင်း၊ ရောင်းချခြင်းများ လုံးဝ မပြုလုပ်ရန် သပိတ်ကျင်းမြို့နယ် ပြည်သူ့ကာကွယ်ရေးအဖွဲ့က တားမြစ်လိုက်သည်။
အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၏ သပိတ်ကျင်းမြို့နယ် ပြည်သူ့ကာကွယ်ရေးအဖွဲ့က ယမန်နေ့ (စက်တင်ဘာ ၁၅ရက်)က ကြေညာချက်ထုတ်ပြန်ကာ တားမြစ်လိုက်ခြင်းဖြစ်ပြီး မူးယစ်ဆေးဝါးနှင့် စိတ်ကို ပြောင်းလဲစေနိုင်သော ဆေးဝါးများအဖြစ် သတ်မှတ်ထားသော မူးယစ်ဆေးဝါး အမျိုးမျိုး၊ ဘိန်းဖြူ၊ ဘိန်းမဲ၊ ဆေးခြောက်၊ ဆေးခြောက်အဆီ အစရှိသည်တို့အား လုံးဝ (လုံးဝ) သုံးစွဲခြင်းမပြုရန်နှင့် လက်ဝယ်ထားရှိခြင်း၊ ရောင်းချခြင်း မပြုရန် သပိတ်ကျင်းပကဖက သတိပေးသည်။
Public Service Announcement
“မူးယစ်ဆေးဝါးကတော့ သိတဲ့အတိုင်း ရွှေတောဒေသဆိုတော့လေ။ လူငယ်အများစုကတော့ မူးယစ်ဆေးဝါးနဲ့ပတ်သက်တာတွေ ကြားရတယ်ပေါ့။အဲအတွက်ကြောင့် ကျွန်တော်တို့ကလည်း မူးယစ်ဆေးဝါးနဲ့ပတ်သက်ပြီး ရောင်းချတာပဲဖြစ်ဖြစ်၊ သုံးစွဲတာပဲဖြစ်ဖြစ် အခုကျွန်တော် တို့လက်ရှိ စိုးမိုးထားတဲ့ ဒေသတွေမှာ ကျွန်တော် တို့ကတော့ လုံးဝမှအပြင်းအထန်ကန့်ကွက်ပြီးတော့မှ အမျိုးသားရေးတရပ်အနေနဲ့ ဒီမူးယစ်ဆေးဝါးကိုနှိမ်နင်းသွားမှာပါ။”ဟု သပိတ်ကျင်းပကဖတာဝန်ခံ ကိုနဂါးနီက ပြောသည်။
သပိတ်ကျင်းမြို့နယ်အတွင်း မူးယစ်ဆေးဝါး အန္တရာယ် တားဆီးကာကွယ်ရန်၊ ထိရောက်စွာ နှိမ်နင်းအရေးယူနိုင်ရန်အတွက် ပြည်သူလူထုမှ ပူးပေါင်းပါဝင်ပေးပါရန် သပိတ်ကျင်းပကဖက မေတ္တာရပ်ခံထားသည်။
သပိတ်ကျင်းမြို့နယ် အတွင်းတွင် မည်သည့်နေရာတွင်မဆို မူးယစ်ဆေးဝါးများအား သုံးစွဲခြင်း၊ လက်ဝယ်ထားရှိခြင်း၊ ရောင်းချခြင်းများ တွေ့ရှိပါက ပြည်သူလူထုအနေဖြင့် သက်ဆိုင်ရာ အဖွဲ့အစည်းများအား အချက်အလက်နှင့်တကွ လာရောက် တိုင်ကြားပေးရန် သပိတ်ကျင်းပကဖက ထပ်မံမေတ္တာရပ်ခံသည်။
ဘိန်းဖြူ၊ ဘိန်းမဲ၊ ဘိန်းစိမ်း၊ ဆေးခြောက် (သို့မဟုတ်)ဆေးခြောက်အဆီ (သတ်မှတ် အလေးချိန် ၂၅ဂရမ်ထက်ပိုပါက) အစရှိသည်တို့သည် မူးယစ်ဆေးဝါးနှင့် စိတ်ကို ပြောင်းလဲစေနိုင်သော ဆေးဝါးများအဖြစ် သတ်မှတ်ထားကြောင်း သိရသည်။
သပိတ်ကျင်းမြို့ကို သြဂုတ် ၂၅ ရက်တွင် ပြည်သူ့ကာကွယ်ရေးပူးပေါင်းတပ်များက တိုက်ခိုက်သိမ်းပိုက်နိုင်ခဲ့ပြီး မြို့နယ်အတွင်းရှိ စစ်ကောင်စီစခန်းအများအပြားကိုလည်း ပူးပေါင်းတပ်များက သိမ်းပိုက်ထားသည်။
လက်ရှိတွင် သပိတ်ကျင်းမြို့နယ်အတွင်း စစ်ကောင်စီက လေကြောင်းတိုက်ခိုက်မှု ၇ ကြိမ်ထက်မနည်း ပြုလုပ်ခဲ့ပြီး ပြည်သူ ၁၂ဦးထက်မနည်း သေဆုံးခဲ့ကြောင်း၊ ထို့ကြောင့် ပြည်သူများ ဗုံးခိုကျင်းများတူးကြရန် လိုက်လံနှိုးဆော်နေကြောင်း သပိတ်ကျင်းပကဖ တာဝန်ခံ ကိုနဂါးနီက ပြောသည်။
