မိထက်/People’s Spring
ဖားကန့်မြို့နယ်၊ဆိုင်းတောင်ရွာအတွင်း ၁၀ ရက်မြောက်နေ့ တိုက်ပွဲဆက်လက်ဖြစ်ပွားနေရာ ယနေ့ ပိုမိုပြင်းထန်နေပြီး စစ်ကောင်စီတပ်က လေကြောင်းမှတိုက်ခိုက်၍ အရပ်သားထိခိုက်သေဆုံးမှုများရှိနေသည်။
ဖားကန့်မြို့နယ် ဆိုင်းတောင်ရွာအတွင်း တိုက်ပွဲဖြစ်နေပြီး စစ်ကောင်စီက စက်တင်ဘာ ၁၆ ရက်မွန်းလွဲပိုင်းတွင် ဆိုင်းတောင်ရွာအပြင် ဘေးပတ်ဝန်းကျင်ရွာများကိုလည်း လေကြောင်းမှဗုံးကြဲတိုက်ခိုက်နေခြင်းဟု ဒေသခံတဦးကပြောသည်။
“ငှက်ပျောတောရပ်ကွက်ထဲဗုံကြဲတာ။ အရပ်သားတစ်ယောက်သေတယ်။ဒဏ်ရာရသူတွေလည်းရှိတယ်။ မရှီကထောင်ရပ်ကွက်ဘက်မှာလည်း သေနတ်သံတွေကြားနေရတယ်” ဟု ဒေသခံတဦးက လူထုနွေဦးသို့ပြောသည်။
Public Service Announcement
ဖားကန့်မြို့နယ် ဆိုင်းတောင်ရွာတွင် စက်တင်ဘာ ၇ရက်မှစ၍ ကချင်လွတ်လပ်ရေးတပ်မတော် KIA ပူးပေါင်းတပ်နှင့် စစ်ကောင်စီတိုက်ပွဲဖြစ်ပွားခဲ့သည်။
စက်တင်ဘာ ၁၂ရက်တွင် ဆိုင်းတောင်ရဲစခန်းကို KIA ပူးပေါင်းတပ်က သိမ်းယူခဲ့သည်။ ရဲစခန်းသိမ်းခံရပြီးနောက် စစ်ကောင်စီတပ်ကဆိုင်းတောင်ရွာကို လေကြောင်းမှဗုံးကြဲတိုက်ခိုက်ခဲ့ပြီး မြေပြင်တွင်လည်း နေအိမ်များအားမီးရှို့ဖျက်ဆီးခဲ့သည်။
ဖားကန့်တိုက်ပွဲ၌ စစ်ကောင်စီနှင့်အတူ ရှမ်းနီတပ်(ANA)ကလည်း ပါဝင်တိုက်ခိုက်နေပြီး နေအိမ်များ ဖျက်ဆီးနေသည်ဟု ဒေသခံများကပြောသည်။ ဆိုင်းတောင်တွင် စစ်ကောင်စီတပ်က မူးယစ်ဆေးသုံးစွဲသူများကိုနေအိမ်များအား မီးရှို့ရန် ခိုင်းစေထားသူများအနက်မှ ၂၃ ဦးကို KIA/KPDF ပူးပေါင်းတပ်ကစက်တင်ဘာလ ၁၄ရက် ဖမ်းဆီးခဲ့သည်။
KIA သတင်းပြန်ကြားရေးဌာန၏ စက်တင်ဘာ ၁၂ရက် ဆိုင်းတောင်တိုက်ပွဲသတင်း ဖော်ပြချက် တွင် KIA ပူးပေါင်းတပ်က ဆိုင်းတောင်ရဲစခန်းကိုစက်တင်ဘာ ၁၂ရက် မနက်တွင် အပြီးသတ် သိမ်းပိုက်လိုက်သည့်နောက် စစ်ကောင်စီက လေယာဉ်ဖြင့် ဗုံးကြဲတိုက်ခိုက်ခဲ့၍ လူနေအိမ်အများအပြားထိခိုက်ပျက်စီးခဲ့ကြောင်း၊ ရဲစခန်းသိမ်းပိုက်ထားနိုင်သော်လည်း ဆိုင်းတောင် Lucky Men ဟိုတယ်အနီးရှိ စစ်ကောင်စီတပ်သားများကို ဆက်လက် ရှင်းထုတ်လျက်ရှိရာ တိုက်ပွဲပြင်းထန်နေကြောင်း အသိပေးထားသည်။
ထို့အပြင် Lucky Men ဟိုတယ်အတွင်းစစ်တပ်ကဓါးစာခံအနေဖြင့် ဖမ်းဆီးထားသည့် အရပ်သားများအနက် အချို့ကို စက်တင်ဘာ ၁၅ရက်တွင် သတ်ဖြတ်နေပြီး ရုပ်အလောင်းများကိုလည်း ကောက်ယူခွင့်မပြုကြောင်း ဒေသခံများကပြောသည်။Lucky Men ဟိုတယ်ကို စစ်ကောင်စီက စီးနင်းထားပြီး ဟိုတယ်ဝန်ထမ်းများ၊ဧည့်သည်များအပါအဝင် အရပ်သား၂၀၀ကျော်ကို ဖမ်းဆီးထားခြင်းဖြစ်သည်။
