ထားအိ/People’s Spring
ရေဘေးကြောင့် ဒုက္ခရောက်နေသည့် မြန်မာပြည်သူများကို လူသားချင်းစာနာမှုဆိုင်ရာအကူအညီများအား တိုင်းရင်းသားအဖွဲ့အစည်းများ၊ မြေပြင်တွင် အမှန်တကယ်လုပ်ဆောင်နေသော အဖွဲ့အစည်းများနှင့်ချိတ်ဆက်လုပ်ဆောင်ရန် နိုင်ငံတကာသံတမန်များနှင့် ကုလသမဂ္ဂအေဂျင်စီအရာရှိများကို NUG လူ့အခွင့်အရေးဝန်ကြီး ဦးအောင်မျိုးမင်းက တိုက်တွန်းပြောကြားသည်။
ဆွစ်ဇာလန်မြို့၊ ဂျီနီဗာမြို့ ကုလသမဂ္ဂအစည်းအဝေးခန်းမ၌ ယမန်နေ့(စက်တင်ဘာ ၁၉ရက်) နံနက်ပိုင်းတွင် မြန်မာနိုင်ငံ၏ လူ့အခွင့်အရေး အခြေအနေနှင့် သဘာဝဘေးဒဏ်ခံစားရမှုအခြေအနေများကို အထက်ပါ အမျိုးသားညီညွတ်ရေးအစိုးရ NUG လူ့အခွင့်အရေးဆိုင်ရာဝန်ကြီးက ရှင်းလင်းပြောကြားပြီး ခေတ်အဆက်ဆက်တွင် စစ်တပ်က လူသားချင်းစာနာမှုအကူအညီများကို ပိတ်ဆို့၊ အမြတ်ထုတ်၊ အလွဲသုံးစားလုပ်ခဲ့သည့်အခြေအနေများကိုလည်း နှိုင်းယှဥ်တင်ပြခဲ့သည်ဟု ဖော်ပြထားသည်။
Public Service Announcement
“အခုလက်ရှိမှာလည်း လူသားချင်းစာနာမှုအကူအညီတွေကို သူတို့စိုးမိုးမှု မရှိတဲ့နယ်မြေတွေဆီမရောက်အောင် တားဆီးပိတ်ပင်တာတွေ၊ ကူညီတဲ့ ဘဏ်ငွေလွှဲစနစ်ကို အနှောင့်အယှက်ပြုတာတွေ၊ ရေဘေးကြောင့်တိမ်းရှောင်လာရတဲ့ပြည်သူတွေကို အိမ်ထောင်စုစာရင်းကောက်ဖို့ အတင်းအကြပ်ပြန်ခိုင်းတာတွေကိုလုပ်ဆောင်နေလျက်ရှိပါတယ်”ဟု ဝန်ကြီး ဦးအောင်မျိုးမင်းက ပြောသည်။
ထို့အပြင်စစ်တပ်က အရပ်သားပြည်သူများအပေါ် လေကြောင်းတိုက်ခိုက်မှုများကြောင့် နေရပ်မှ ထွက်ပြေးတိမ်းရှောင်နေရသည့် စစ်ဘေးရှောင်ပြည်သူများအပြင် တိုင်ဖွန်းယာဂီကြောင့် နေအိမ်ဆုံးရူံးခဲ့ရသောပြည်သူများ၏ ‘ဗူးလေးရာ ဖရုံဆင့်’ အဖြစ်များကို မြေပြင်မှရရှိသည့် သတင်းများကို ကိုးကားတင်ပြခဲ့ကြောင်း ဝန်ကြီးက အသိပေးသည်။
လက်ရှိမြန်မာနိုင်ငံ၏အခြေအနေများနှင့် စပ်လျဉ်း၍ နိုင်ငံတကာနှင့် ပူးပေါင်းဆောင်ရွက်ရန် အထူးလိုအပ်ပြီး NUG အနေဖြင့် တိုင်းရင်းသား အဖွဲ့အစည်းများနှင့် လက်တွဲပြီး ရေဘေးသင့်ပြည်သူများ အား ကူညီကယ်ဆယ်ရေးနှင့် အရေးပေါ်တုံ့ပြန်ရေး လုပ်ငန်းများကို အစွမ်းကုန် ကြိုးပမ်းဆောင်ရွက်လျက်ရှိကြောင်းနှင့် နယ်စပ်ဖြတ်ကျော် အစီအစဥ်မှတဆင့် လူသားချင်း စာနာထောက်ထားမှုအကူအညီများ ပေးအပ်စေလိုကြောင်း အထက်ပါအစည်းအဝေး၌ ဝန်ကြီးက တိုက်တွန်းခဲ့သည်။
ယာဂီမုန်တိုင်းကြောင့် သေဆုံးပျောက်ဆုံးသူ တစ်ထောင်ခန့်ရှိပြီး ရေဘေးသင့်ပြည်သူ ၇ သိန်းကျော်ရှိကြောင်း NUG နှင့် တိုင်းရင်းသားလက်နက်ကိုင်အဖွဲ့များဖြစ်သော KNU ၊ KNPP ၊ CNF တို့က ပူးတွဲထုတ်ပြန်ထားသည်။
