ဇေအောင်/People’s Spring
စစ်ကိုင်းတိုင်း၊ စစ်ကိုင်းမြို့နယ်တွင် ပျူစောထီးများ လိုက်ပါလာသောယာဥ် တိုက်ခိုက်ခံရပြီး ယာဥ်ပေါ်လိုက်ပါလာသူအချို့ သေဆုံးမှုရှိခဲ့ကြောင်း ဒေသခံများက ပြောသည်။
စက်တင်ဘာ ၁၇ရက် နံနက် ၆နာရီခွဲခန့်က စစ် ကိုင်းမြို့နယ်၊ ကြွယ်ပုံရွာနှင့် ရွှေဘို-မန္တလေးလမ်းပိုင်းကြားတွင် ပျူစောထီးများလိုက်ပါလာသော ယာဥ်တစ်စီး တိုက်ခိုက်ခံရပြီး နှစ်ဘက်တိုက်ပွဲဖြစ်ပွားခဲ့ကြောင်း ဒေသခံများက ပြောသည်။
Public Service Announcement
တိုက်ခိုက်မှုကြောင့် ယာဉ်ပေါ်ပါ အမျိုးသမီး ၁၂ ဦးသေဆုံးပြီး ပျူစောထီး သုံးဦးဒဏ်ရာရရှိခဲ့ကြောင်း စစ်ကောင်စီ၏ ဝါဒဖြန့် ချန်နယ်များက သတင်းဖြန့်ဝေနေသည်။
သို့သော် ယာဉ်ပေါ်ပါသူများ၏ ထိခိုက်သေဆုံးသည့်အရေအတွက်အား လူထုနွေဦးက သီးခြားအတည်ပြုနိုင်ခြင်း မရှိသေးပေ။
“တောင်သူ ၁၃ယောက်၊ လက်နက်ကိုင် ပျူ သုံးယောက် ထွက်လာတာ။ လက်နက်ကိုင် အချင်းချင်းပစ်တာကနေ ကြောက်ပြီးထွက်ပြေးကြတာ မိုင်းကွင်းထဲဝင်သွားတယ်လို့သိရတယ်။”ဟု စစ်ကိုင်းမြို့နယ်ခံတစ်ဦးက ပြောသည်။
မည်သည့်အဖွဲ့နှင့် တိုက်ပွဲဖြစ်ပွားသည်ကိုမူ မသိရသေးဘဲ ပျူစောထီးများကိုင်ဆောင်သည့် သေနတ် ၃လက်သိမ်းဆည်းခံလိုက်ရကြောင်း ဒေသခံအချို့က ပြောသည်။
“ရွာကတော့ စကစ၊ ပျူ အခိုင်အမာ အခြေချထားတဲ့ရွာပါ။ ထိတွေ့ ဘယ်အဖွဲ့တွေနဲ့ဖြစ်လဲဆိုတာတော့ အတိအကျမသိရဘူး။”ဟု စစ်ကိုင်းမြို့နယ် သတင်းမှန်ပြန်ကြားရေးအဖွဲ့တာဝန်ရှိသူက ပြောသည်။
စစ်ကိုင်းမြို့နယ်အခြေစိုက် ကာကွယ်ရေးအဖွဲ့များထံ ဆက်သွယ်မေးမြန်းရန် ကြိုးစားသော်လည်း လက်တလောဆက်သွယ်၍ မရသေးပေ။
တိုက်ခိုက်ခံရပြီးနောက် စစ်ကိုင်းမြို့ တပ်မ (၃၃) မှ စစ်ကား ၂စီး ကြွယ်ပုံကျေးရွာသို့ ဝင်ရောက် သွားကြောင်း သိရသည်။
အာဏာသိမ်းပြီးနောက် စစ်ကောင်စီတပ်က ကြွယ်ပုံကျေးရွာသို့ လာရောက်တပ်စွဲခဲ့ပြီး ရွာခံများကိုပါ ပျူစောထီးသင်တန်းပေး၍ လက်နက်တပ်ဆင်ပေးခဲ့သည်။ ထို့အပြင် ကြွယ်ပုံရွာအနီးရှိ ဒီပဲယင်းကွဲကျေးရွာအပါအဝင် စစ်ကိုင်းနှင့် မြင်းမူနယ်အတွင်းရှိ ကျေးရွာများအား အဆိုပါကျေးရွာရှိစစ်ကောင်စီတပ်က စစ်ကြောင်းထိုး မီးရှို့ခြင်းများ ပြုလုပ်ခဲ့သည်။
ပြည်သူ့ကာကွယ်ရေးအဖွဲ့များကလည်း ကြွယ်ပုံရွာရှိ စစ်ကောင်စီတပ်အား မကြာခဏ လာရောက်တိုက်ခိုက်လေ့ရှိသည်။
