နန်းမယ်ခုံမြို့နယ် ရွာ ၁၀ ရွာရေကြီးနိုင်၍ ကုန်းမြင့်​​သို့ အမြန်​ပြောင်း​ရွေ့ရန်အ​ရေး​ပေါ်သတိပေး

ရဲခေါင်/People’s Spring

ကရင်နီပြည်နယ်အတွင်းရေကြီးရေလျှံမှုများကြောင့် ကျေးရွာ ၁၀ ခု မှပြည်သူများ ကုန်းမြင့်ဒေသသို့ ၂ ရက်အတွင်းပြောင်းရွှေ့ရန် နန်းမယ်ခုံမြို့နယ်ပူးပေါင်းအုပ်ချုပ်ရေးကော်မတီက အရေးပေါ်ညွှန်ကြားချက်ထုတ်ပြန်သည်။

မိုးအဆက်မပြတ်ရွာသွန်းမှုနှင့်မိုးဗြဲရေကာတာ ဖွင့်ချမှုကြောင့် ဘုရားဖြူ၊ ဘုရားနီ၊ ဖောင်းတော၊ မှုံပြာ၊ ပလဖ၊ ဒေါပေါ်ကလဲ (ရွာကြီး၊ရွာငယ်)၊ ဒေါ်ဆော်လိ၊ ကယားညေးခူနှင့် နန့်စံခမ်းကျေးရွာများတွင် ရေမြှုပ် ပျက်စီးမှုများရှိနေသည်ဟု အသိ​ပေးထားသည်။

Public Service Announcement

ထို့အပြင်အထက်ပါကျေးရွာများ၌ကျန်ရှိနေသောပြည်သူများရေဘေးအသက်အန္တရာယ်ထိခိုက်ပျက်စီး မှုမရှိစေရန် နီးစပ်ရာကုန်မြင့်ဒေသသို့နှစ်ရက်အတွင်းပြောင်းရွှေ့ရန် သတိပေးသည်။

“နန်းမယ်ခုံဘက်မှာက ရေဘေးရှောင်ပြည်သူ သုံးထောင်လောက်ရှိတယ်။ရေကတော့ တက်တက်နေတုန်းပဲ။အရေးပေါ် စားသောက်စရာ နဲ့ မိုးကာ တွေတော့ အမြန်လိုပါတယ်”ဟု နန်းမယ်ခုံမြို့နယ်ရေဘေးကူညီနေသူတစ်ဦးက လူထုနွေဦးသို့ပြောသည်။

ကရင်နီပြည်နယ်ဖယ်ခုံ၊လွိုင်ကော်၊ဒီးမော့ဆို၊ရှားတော၊ဖားဆောင်း၊ဘောလခဲ နှင့် ဖရူဆိုမြို့နယ် တွင်ရေဘေးကြောင့်နေရပ်စွန့်ခွာနေရသူ ၂၁,၇၃၉ ဦးရှိ ကြောင်းကရင်နီလူ့အခွင့်အရေးအဖွဲ့ က စက်တင်ဘာ ၂၀ ရက်တွင် ထုတ်ပြန်ထားသည်။

ရေဘေးနှင့်မြေပြိုမှုကြောင့် ဒီးမော့ဆိုမြို့နယ်တွင် သေဆုံးသူ ၁၈ ဦးရှိပြီး ဘောလခဲ၊ရှားတော၊လွိုင်ကော်၊ဖယ်ခုံမြို့နယ်၌ သေဆုံးသူ ၁၀ ဦးရှိသည်။