သားကြီး/People’s Spring
ဧရာဝတီမြစ်ကြောင်းအတိုင်း ဗန်မော်မြို့မှပြန်လည်စုန်ဆင်းလာသော စစ်ကောင်စီသင်္ဘောလေးစီးသည် ယနေ့(စက်တင်ဘာ ၂၃ရက်)တွင် ကသာမြို့ဆိပ်ကမ်း၌ ညအိပ်ရပ်နားနေသည်။
” မနေ့က ရွှေကူကနေ ထွက်လာပြီး လမ်းမှာ သောင်တင်တယ်။ ဒီမနက် ၈နာရီလောက်မှာ သောင်ကနေလွတ်လာပြီး ညနေ ၃နာရီမှာ ကသာရောက်လာတယ်။ ဒီည ကသာမှာ ညအိပ်တယ်” ဟု ကသာမြို့မှ ပြည်သူ့ကာကွယ်ရေးတပ်ဖွဲ့ဝင် ရဲဘော်တစ်ဦးက ပြောသည်။
Public Service Announcement
အဆိုပါစစ်ကောင်စီသင်္ဘောများသည် ဗန်းမော်မြို့မှ စက်တင်ဘာ၂၁ရက် နံနက်တွင် စတင်ထွက်ခွာလာခြင်းဖြစ်သည်။
စက်တင်ဘာ၂၂ရက်က ရွှေကူနှင့် ကသာမြို့နယ်စပ်ကို ဖြတ်နေစဉ် မြစ်ကမ်းဘေးကျေးရွာများကို Y12လေယာဉ်ဖြင့် ဗုံးအလုံး ၄၀ကျော် ကြဲချတိုက်ခိုက်ခဲ့သည်။ ယနေ့လည်း လေကြောင်းမှ လုံခြုံရေးယူ၍ ထွက်ခွာလာခြင်းဖြစ်ပြီး မြစ်ကမ်းဘေးကျေးရွာများကို ထပ်မံဗုံးကြဲတိုက်ခိုက်ခဲ့ကြောင်း သတင်းရရှိသည်။
သင်္ဘောလေးစီးတွင် စစ်သင်္ဘောတစ်စီးပါဝင်ပြီး သင်္ဘောပေါ်မှနေ၍ ရမ်းသမ်းပစ်ခတ်မှုများပြုလုပ်ခဲ့ကြောင်းလည်း ပြည်သူ့ကာကွယ်ရေးရဲဘော်အချို့က ပြောသည်။
ပြီးခဲ့သည့် ရက်အနည်းငယ်က ရွှေကူမြို့မှ ဗန်းမော်မြို့သို့ ဧရာဝတီမြစ်ကြောင်းအတိုင်းဆန်တက်သည့် စစ်ကောင်စီသင်္ဘောအုပ်စုကို ကချင်လွတ်လပ်ရေးတပ်မတော်(KIA)နှင့် PDFက တိုက်ခိုက်ရာ လက်နက်ခဲယမ်းများသယ်ဆောင်လာသည့်သင်္ဘောအပါအဝင် ရေယာဉ်အချို့နစ်မြုပ်သွားပြီး စစ်ကောင်စီတပ်ဖွဲ့ဝင်အချို့ဖမ်းမိခဲ့သည်။
သင်္ဘောငါးစီးဆန်တက်သည်ကို KIA နှင့် PDFက စက်တင်ဘာ ၁၇ရက်တွင်တိုက်ခိုက်ရာ လေးစီးပျက်စီးပြီး ဗန်းမော်မြို့သို့ တစ်စီးသာရောက်ရှိခဲ့သည်။ ထို့နောက် ဗန်းမော်မှသင်္ဘောနှစ်စီးနှင့်အတူ စုစုပေါင်း သုံးစီး ပြန်လည်စုန်ဆင်းလာခြင်းဟု သတင်းရရှိသည်။
ဗန်မော်နှင့် ရွေကူကြား၌တိုက်ခိုက်ခံပြီး ပျက်စီးသွားသည့် သင်္ဘောတစ်စီးကို စစ်ကောင်စီက ပြန်လည်ဆွဲယူလာရာ လက်ရှိတွင် သင်္ဘောလေးစီးရှိနေခြင်းဖြစ်သည်။
စစ်ကောင်စီသည် ချင်းတွင်းမြစ်ကြောင်းတွင်လည်း ကျောက်စိမ်း၊ သစ်လုံးများနှင့် ကြေးနီများတင်ဆောင်လာသော သင်္ဘောများ မုံရွာမြို့မှတစ်ဆင့် မန္တလေးမြို့ဘက်သို့ လေကြောင်းလုံခြုံရေးအကူအညီရယူ၍ စုန်ဆင်းနေသည်။
