ဇေအောင်/People’s Spring
မန္တလေးတိုင်း၊ မြင်းခြံမြို့နယ်ရှိ ဖုံကျေးရွာကို စစ်ကောင်စီတပ်က ဝင်ရောက်စီးနင်းပြီး ဒေသခံသုံးဦး သတ်ဖြတ်ကာ နေအိမ်များ မီးရှို့ဖျက်ဆီးသွားကြောင်း သတင်းရရှိသည်။
ယနေ့(စက်တင်ဘာ ၂၅ ရက်)နံနက်ပိုင်းက မြင်းခြံ အမှတ်(၁၅)ခြေမြန်တပ်ရင်းမှ စစ်ကောင်စီတပ်နှင့် ပျူစောထီးများသည် ဖုံကျေးရွာသို့ဝင်ရောက်ကာ ရွာသားများဖြစ်သော ကိုရဲဝင်း၊ ကိုကျော်စွာနှင့် ကိုမျိုးဇင်ဆိုသူတို့အား သတ်ဖြတ်သွားကြောင်း ဒေသခံများက ပြောသည်။
“မီးမရှို့ခင် အရင်သတ်သွားတာ။ ရွာကိုအစောပိုင်း မနက်လေးနာရီ၊ ငါးနာရီလောက်က လာတာကား သုံးစီးနဲ့”ဟု ဒေသခံတစ်ဦးက ပြောသည်။
Public Service Announcement
ထို့အပြင် ဒေသခံများလည်း ထွက်ပြေးတိမ်းရှောင်နေရပြီး မီးလောင်ကျွမ်းပျက်စီးမှုအခြေအနေ မသိရသေးဟု ၎င်းတို့က ပြောသည်။
စက်တင်ဘာ ၁၆ ရက်ကလည်း မြင်းခြံခရိုင်၊ တောင်သာမြို့နယ်၊ ခြုံကြီးကျေးရွာကို စစ်ကောင်စီတပ်က ဝင်ရောက်စီးနင်းပြီး မြင်းခြံခရိုင်ပကဖဒုခေါင်းဆောင် ကိုအီးတီအပါအဝင် ၅ဦးအား ဖမ်းဆီးသတ်ဖြတ်သွားခဲ့သေးသည်။
ထို့အပြင် စစ်ကောင်စီတပ်က စက်တင်ဘာ ၂၂ ရက် နံနက်ပိုင်းက မြင်းခြံမြို့နယ်၊ ခြေဆေးရွာအား ဂျက်ဖိုက်တာဖြင့် နှစ်ကြိမ်တိုင် ဗုံးချတိုက်ခိုက်ခဲ့ရာ အမျိုးသမီးတစ်ဦးသေဆုံးပြီး ၄ ဦး ဒဏ်ရာရရှိခဲ့သည်။
မြင်းခြံမြို့နယ်သည် သြဂုတ်၁၀ရက်က မြင်းခြံခရိုင်အထူးစစ်ဆင်ရေးစတင်ပြီးနောက်ပိုင်း မြင်းခြံ၊ နွားထိုးကြီး၊ တောင်သာမြို့နယ်များရှိ ကျေးရွာအများအပြားအား စစ်တပ်ကလေကြောင်းတိုက်ခိုက်မှုများ ပြုလုပ်ခဲ့၍ ပြည်သူထိခိုက်သေဆုံးမှုများရှိနေသည်။
