ဟန်နွေ/People’s Spring
ကချင်လွတ်လပ်ရေးတပ်မတော်(KIA) ပူးပေါင်းတပ်နှင့် စစ်ကောင်စီတပ်အကြား တိုက်ပွဲဖြစ်ပွားနေသည့် ဖားကန့်မြို့ ဆိုင်းတောင်ကျေးရွာကို စစ်ကောင်စီက ယနေ့ လေကြောင်းမှ ထပ်မံ ဗုံးကြဲတိုက်ခိုက်ခဲ့ဟု ကချင်စစ်ရေးသတင်းရင်းမြစ်အချို့က အသိပေးသည်။
စက်တင်ဘာ ၂၇ရက် မွန်းလွဲ ၃နာရီခွဲဝန်းကျင် တွင် ဆိုင်းတောင်ရွာကို လေကြောင်း တိုက်ခိုက် လာခြင်းဖြစ်သည်ဟု ဆိုသည်။
Public Service Announcement
ယနေ့တွင် KIAနှင့် စစ်ကောင်စီတပ်အကြား ဆိုင်းတောင်ရွာတွင် ရံဖန်ရံခါ ပစ်ခတ်မှုရှိသော်လည်းတိုက်ပွဲအကြီးအကျယ်ဖြစ်ပွားမှု မရှိကြောင်း သတင်းရင်းမြစ်က ပြောသည်။
” ၃နာရီခွဲလောက်မှာ လေယာဉ်ပျံနဲ့လာပစ်သွားတာ။ သူတို့က ၆ခါ ၇ခါလောက်လာပစ်သွားတယ်လို့ အဲဒီလိုတော့ သတင်းရတယ်” ဟု သတင်းရင်းမြစ်က ပြောသည်။
လေကြောင်းတိုက်ခိုက်မှုကြောင့် ထိခိုက်မှု အခြေအနေကို စုံစမ်းနေဆဲဖြစ်သည်။
ဆိုင်းတောင်ရွာရှိ စစ်ကောင်စီတပ်ကို KIA ပူးပေါင်းတပ်က စက်တင်ဘာ ၇ရက်တွင် စတင်ထိုးစစ်ဆင်ခဲ့ရာ စက်တင်ဘာ ၁၂ရက်တွင် ဆိုင်းတောင်ရဲစခန်းကို သိမ်းပိုက်နိုင်ခဲ့သည်။
လက်ရှိတွင် စစ်ကောင်စီသည် ဆိုင်းတောင်ရှိ လက်ကီးမန်းဟိုတယ်ကို အခြေပြုပြီး ခုခံနေခြင်းဖြစ်ကြောင်း၊ စစ်ကောင်စီက လေကြောင်းပစ်ကူပေး တိုက်ခိုက်ခြင်းအပြင် ဖားကန့် ဗျူဟာစခန်းမှ လက်နက်ကြီးပစ်ကူပေး တိုက်ခိုက်မှုများ ပြုလုပ်ခဲ့ကြောင်း စစ်ရေးသတင်းရင်းမြစ်အချို့က ပြောသည်။
စစ်ကောင်စီတပ်သည် ဆိုင်းတောင်ရွာရှိ ပြည်သူလူထုနေအိမ်များကို မီးရှို့ဖျက်ဆီးမှုများ ပြုလုပ်နေကြောင်း၊ စစ်ကောင်စီတပ်ဖွဲ့များ က လိုက်လံမီးရှို့ခြင်း၊ လေကြောင်း ပစ်ခတ်ခြင်းနှင့် လက်နက်ကြီး ပစ်ခတ်ခြင်းများကြောင့်
ဆိုင်းတောင်ရှိ ပြည်သူအများအပြား၏ နေအိမ်များ မီးလောင်ခဲ့ရကြောင်း KIA သတင်းပြန်ကြားရေးဌာနက ဖော်ပြထားသည်။
