ဇေအောင်/People’s Spring
မန္တလေးတိုင်း၊ မြင်းခြံမြို့နယ်တွင် PDF စခန်းသို့ စစ်ကြောင်းထိုးလာသော စစ်ကောင်စီတပ်နှင့် တိုက်ပွဲဖြစ်ပွားပြီး ထိခိုက်မှုရှိ၍ ပြန်လည်ဆုတ်ခွာသွားကြောင်း သတင်းရရှိသည်။
ယနေ့(စက်တင်ဘာ၂၇ရက်) နံနက် ၅ နာရီခန့်က မြင်းခြံမြို့နယ် ခြေဆေးရွာအနီးရှိ Myingyan Black Tiger (MBT)တပ်ဖွဲ့၏ စစ်ကြောင်း (၃)အခြေချရာ တပ်စခန်းများအား အင်အား ၁၂၀ ခန့်ပါ စစ်ကောင်စီတပ်က စစ်ကြောင်းထိုးဝင်ရောက်လာခဲ့သည်။
Public Service Announcement
MBTတပ်ဖွဲ့ ရဲဘော်များက တန်ပြန်တိုက်ခိုက်မှုကြောင့် စစ်ကောင်စီတပ် ဆုတ်ခွာခဲ့ကြောင်း၊ နံနက် ၇နာရီခန့်တွင် မဟာမိတ်တပ်များကပါ တပ်ကူလာဖြည့်ခဲ့ရာ စစ်ကောင်စီတပ်အား ခြေဆေးချောင်းအတွင်း ဝိုင်းဝန်းပိတ်ဆို့တိုက်ခိုက်ခဲ့ကြောင်း Myingyan Black Tiger (MBT)တပ်ဖွဲ့၏ခေါင်းဆောင် ဗိုလ်မိုက်ခဲက ပြောသည်။
စစ်ကောင်စီဘက်က ဒရုန်း ၅စီးနှင့် ဂျက်ဖိုက်တာ၂ စီးဖြင့် အကြိမ်ပေါင်းများစွာ လာရောက်ပစ်ခတ်မှုကြောင့် ကာကွယ်ရေးအဖွဲ့များ အနည်းငယ်ဆုတ်ခွာပေးခဲ့ပြီး နံနက် ၁၁နာရီကျော်အထိ တိုက်ပွဲဖြစ်ပွားခဲ့ကြောင်း ၎င်းက ပြောသည်။
ထို့နောက် စစ်ကောင်စီတပ် အထိအခိုက်များဖြင့် ပြန်လည်ဆုတ်ခွာသွားပြီး ထိခိုက်သေဆုံးသူများအား သယ်ဆောင်သွားသည်ကို မျက်မြင်တွေ့ရှိခဲ့သည်ဟု ဗိုလ်မိုက်ခဲက ဆိုသည်။
“မြင်းခြံက စစ်တပ်၊ရဲ၊ပျူတွေပါတယ်။ အဓိကက ခြေဆေးချောင်းနားမှာ ဒီကောင်တွေထွက်ပြေးရင်းနဲ့ပိတ်မိသွားတာ။ အဲအချိန်မှာ လေယာဥ်သာမရောက်လာခဲ့ရင် အားလုံးပြုတ်မှာပဲ ဒီကောင်တွေ။”ဟု ဗိုလ်မိုက်ခဲက ပြောသည်။
တိုက်ပွဲသံများမှာ မြို့နှင့်နီးကပ်၍ အတိုင်းသားကြားခဲ့ရကြောင်း မြင်းခြံမြို့ခံများက ပြောသည်။
“လေယာဥ်ပေါ်ကချတဲ့ ဗုံးသံပါကြားရတယ်။ မြို့အစွန်ကအိမ်တွေတောင်တုန်တယ်။ မနေ့ကညနက်ပိုင်းကတည်းက လက်နက်ကြီးတွေလှမ်းထုတာ။”ဟု မြင်းခြံမြို့ခံတစ်ဦးက ပြောသည်။
Myingyan Black Tiger (MBT)တပ်ဖွဲ့နှင့်အတူ မြင်းခြံခရိုင် အမှတ် (၁၊၂၊၃၊၇၊၈)တပ်ရင်းများ၊မြင်းခြံခရိုင် ပကဖ၊စွန်ရဲပြောက်ကျားတပ်ဖွဲ့၊ရဲခေါင်ပြောက်ကျားတပ်ဖွဲ့၊အမှတ် (၈၁၅)တပ်ရင်း (PLA) တပ်ဖွဲ့များမှ တပ်ကူများလာရောက်ပူးပေါင်းတိုက်ခိုက်ခဲ့ကြောင်း သိရသည်။
စစ်ကောင်စီတပ်သည် ခြေဆေးကျေးရွာကို စက်တင်ဘာ ၂၂ ရက် နံနက်ပိုင်းကလည်း စစ်ကောင်စီတပ်က ဂျက်ဖိုက်တာဖြင့် ၂ ကြိမ်တိုင်ဗုံးကြဲတိုက်ခိုက်ခဲ့ရာ ယာခင်းထဲပေါင်းနှုတ်နေသည့် ကိုယ်ဝန်ဆောင်အမျိုးသမီးတစ်ဦးအပါအဝင် ၄ ဦး ဒဏ်ရာရရှိခဲ့သည့်အနက် အမျိုးသမီး တစ်ဦးသေဆုံးခဲ့သေးသည်။
စက်တင်ဘာ ၉ ရက်ကလည်း မြင်းခြံမြို့နယ်၏ မြောက်ပိုင်းရှိ Myingyan Black Tiger (MBT)တပ်ဖွဲ့၏ စစ်ကြောင်း (၁) နယ်မြေအတွင်းသို့ စစ်ကြောင်းထိုးလာသော စစ်ကောင်စီတပ်နှင့် ကာကွယ်ရေးအဖွဲ့များ တိုက်ပွဲဖြစ်ပွားခဲ့သည်။
