စစ်ကောင်စီက ယခုနှစ်ဘဏ္ဍာနှစ်ဝက်အတွင်း တရုတ်ယွမ်ငွေ ၅၃ သန်းကျော်ကို ထုတ်ရောင်းခဲ့ကြောင်း စစ်ကောင်စီ၏ဗဟိုဘဏ်က ထုတ်ပြန်သည့် စာရင်းများအရသိရသည်။
နိုင်ငံခြားငွေလိုအပ်ချက်ကြီးမားနေသည့် စစ်ကောင်စီက သွင်းကုန်လုပ်ငန်းများနှင့် ၎င်းတို့ အသုံးပြုရန် မရှိမဖြစ်လိုအပ်သည့် လေယာဉ်ဆီနှင့်အခြားစက်သုံးဆီများအတွက် သွင်းကုန်လုပ်
ငန်းရှင်များအတွက် တရုတ်ယွမ်၊ ထိုင်းဘတ်နှင့် အမေရိကန် ဒေါ်လာများကို ထုတ်ရောင်းပေးရာတွင် ယခုနှစ်ဘဏ္ဍာနှစ်အတွင်း တရုတ်ယွမ်ငွေ ထုတ်ရောင်းမှု သိသိသာသာတိုးတက်လာခြင်းဖြစ်သည်။
Public Service Announcement
၂၀၂၃-၂၀၂၄ ဘဏ္ဍာနှစ်အတွင်း စစ်ကောင်စီက တရုတ်ယွမ်ငွေ ၁၆ သန်းကျော်ကိုသာထုတ်ရောင်းခဲ့သော်လည်း ယခု (၂၀၂၄-၂၀၂၅) ဘဏ္ဍာနှစ်ဝက် ခြောက်လအတွင်း၌ တရုတ်ယွမ်ငွေ ၅၃ သန်းကျော်အထိရောင်းချပေးခဲ့ခြင်းဖြစ်သည်။
“ဒီလို တရုတ်ငွေတွေ ထုတ်ပေးရခြင်းက တရုတ်ဆီက စကစ(စစ်ကောင်စီ)က ကုန်ပစ္စည်းဝယ်တာ ပိုများလာတယ်ဆိုတာ ကိန်းဂဏန်းတွေက ညွှန်ပြတာပါပဲ”ဟု စီးပွားရေးလုပ်ငန်းရှင်တစ်ဦးကပြောသည်။
ပြီးခဲ့သည့် နှစ်အတွင်း စစ်ကောင်စီက ထိုင်းဘတ်ငွေ သန်း ၁၆၇၅ ကျော်ကို ရောင်းချခဲ့သော်လည်း ယခုဘဏ္ဍာနှစ်အတွင်း ထိုင်းဘတ်ငွေ ၃၁၃ သန်းကိုသာ ထုတ်ရောင်းခဲ့သည်ကိုတွေ့ရသည်။
အမေရီကန် နှင့် နိုင်ငံတကာပိတ်ဆို့မှုများကြောင့် ထိုင်းနိုင်ငံက စစ်ကောင်စီနှင့် ကုန်သွယ်မှုလျော့ချလိုက်ခြင်းကြောင့် ထိုင်းနှင့် စစ်ကောင်စီကြားကုန်သွယ်မှုလျော့ကျသွားခြင်းဖြစ်သည်ဟုအခြားစီးပွားရေးလုပ်ငန်းရှင်တစ်ဦးကပြောသည်။ ထိုအပြင် မြန်မာ-ထိုင်းနယ်စပ်ကုန်သွယ်ရေးတွင် အဓိက ကုန်သွယ်ရေးလမ်းကြောင်းဖြစ်သော အာရှလမ်းမကြီး နှင့် မြဝတီ မြို့ အနီးရှိ စစ်တပ်စခန်းများကို KNU နှင့် တော်လှန်ရေးတပ်များသိမ်းပိုက်ထိန်းချုပ်ထားပြီးနောက် မြဝတီနယ်စပ်ကုန်သွယ်ရေးလမ်းကြောင်းမှ တရားဝင်နယ်စပ်ကုန်သွယ်မှုကို ထိုင်းနိုင်ငံက ရပ်တန့်ထားသဖြင့် နယ်စပ်ကုန်သွယ်ရေးကျဆင်းသွားခြင်းဖြစ်သည်။
ထိုအပြင် စစ်ကောင်စီသည် ၂၀၂၃-၂၀၂၄ ဘဏ္ဍာနှစ်တွင် အမေရိကန်ဒေါ်လာ ၁၈၆ သန်းရောင်းချပေးခဲ့သော်လည်း ယခုဘဏ္ဍာနှစ် ဝက် ခြောက်လအတွင်း (၂၀၂၄-၂၅ ဧပြီ ၁ ရက် စက်တင်ဘာ ၃၀ ရက်အထိ) အမေရိကန်ဒေါ်လာ ၁၉၆ သန်းကို ထုတ်ရောင်းပေးခဲ့သည်။ ထိုကြောင့် ဒေါ်လာထုတ်ရောင်းမှုမှာလည်း ယခင်နှစ်ကထက်ပိုများခဲ့သည်ကိုတွေ့ရသည်။
ပြည်ပပေါက်ဈေးတွင် အမေရိကန်တစ်ဒေါ်လာကို ကျပ် ၄၇၅၀၊ ထိုင်းဘတ်ငွေ တစ်ဘတ်ကို ၁၄၃ ကျပ်နှင့် တရုတ်ငွေတယွမ်ကို ၆၆၀ကျပ်ပေါက်ဈေးရှိနေသည်။
တရုတ်နိုင်ငံခြားရေးဝန်ကြီး ဝန်ယိ သြဂုတ်လတွင်မြန်မာနိုင်ငံသို့လာပြီးနောက် တရုတ်နိုင်ငံက စစ်ကောင်စီကို ချေးငွေ ယွမ် ၃ ဘီလီယံ(ဒေါ်လာသန်း၄၃၀ ခန့်)ပေးပြီးနောက် နိုင်ငံခြားငွေလဲနှုန်းများကျဆင်းလာခြင်းဖြစ်သည်။အစောပိုင်းတွင်တရုတ်ကချေးငွေပေးသည်ဟုသတင်းထွက်ခဲ့သော်လည်း တရုတ်နိုင်ငံက ယွမ် သုံးဘီလီယံကို သဘာဝဓါတ်ငွေ့ဖိုးပေးသည်ဆိုသောခေါင်းစဥ်အောက်မှပေးကာ စစ်ကောင်စီကို ဘဏ္ဍာရေး အကြပ်ဆိုက်နေမှုအားအသက်ဆက်ပေးခဲ့ခြင်းဖြစ်ကြောင်း သတင်းရင်းမြစ်အချို့ကပြောသည်။
