အီယိုရီ/People’s Spring
အမျိုးသားဒီမိုကရေစီအဖွဲ့ချုပ်(NLD)ပါတီ ဒုဥက္ကဌ-၂ ဒေါက်တာဇော်မြင့်မောင်သည် မန္တလေးဆေးရုံကြီး၌ အရေးပေါ်ကုသမှုခံယူနေရပြီး သတိပြန်လည်မလာသေးကြောင်း ပါတီသတင်းရင်းမြစ်အချို့က ပြောသည်။
သွေးကင်ဆာရောဂါဝေဒနာခံစားနေရသူ အသက် ၇၃နှစ်အရွယ် မန္တလေးတိုင်းဝန်ကြီးချုပ်ဟောင်းဒေါက်တာဇော်မြင့်မောင်ကို အာဏာသိမ်းစစ်ကောင်စီက ဆေးကုသခွင့် ကောင်းမွန်စွာ မပေးဘဲ မိသားစုနှင့်တွေ့ဆုံခွင့်ကိုလည်း တားမြစ်ကန့်သတ်ထားသည်။
“အရေးပေါ်မှာပဲလို့ သိရတယ်။ အခြေအနေကတော့ နောက်ဆုံးအချိန်ရောက်နေပြီလို့ ပြောရမယ်” ဟု NLD သတင်းရင်းမြစ်က ပြောသည်။
Public Service Announcement
စစ်ကောင်စီက ဆေးကုသခွင့်ကောင်းစွာမပေးခဲ့ဘဲ ယနေ့ နေ့ခင်းပိုင်းတွင်မူ ဆေးရုံသို့လာ၍လွတ်ငြိမ်းခွင့်လာဖတ်သွားကြောင်းလည်း သတင်းရင်းမြစ် အချို့ကပြောသည်။
စစ်တပ်အာဏာသိမ်းသည့် ၂၀၂၁ ဖေဖော်ဝါရီ ၁ရက် နံနက်အစောပိုင်းတွင် ဒေါက်တာဇော်မြင့်မောင်ကို ဖမ်းဆီးခဲ့ပြီး မတရားသဖြင့် အမှု ၁၀ မှုစွဲဆိုခဲ့ကာ ထောင်ဒဏ် ၂၉နှစ်အထိ ချမှတ်ခဲ့သည်။
ဒေါက်တာဇော်မြင့်မောင်သည် ၁၉၈၈ အရေးတော်ပုံကြီးအပြီးတွင် မန္တလေးဆေးတက္ကသိုလ် ဇီဝဓာတုဌာနမှ အလုပ်ထွက်ကာ နိုင်ငံရေးနယ်ပယ်သို့ ဝင်ရောက်ခဲ့သည်။ ၁၉၈၉ ခုနှစ်တွင် NLD ပါတီဝင်ဖြစ်လာပြီး ၁၉၉၀ အထွေထွေရွေးကောက်ပွဲ၊ ၂၀၂၁ ကြားဖြတ်ရွေးကောက်ပွဲ၊ ၂၀၁၅ အထွေထွေရွေးကောက်ပွဲနှင့် ၂၀၂၀ အထွေထွေရွေးကောက်ပွဲတို့၌ အနိုင်ရခဲ့ကာ လေးထပ်ကွမ်းအမတ် အဖြစ် မှတ်တမ်းဝင်ခဲ့သည်။
၁၉၉၀ အထွေထွေရွေးကောက်ပွဲတွင် အမရပူရမြို့နယ်မှ ရွေးကောက်တင်မြှောက်ခံရသူ ဒေါက်တာဇော်မြင့်မောင်ကို ထိုစဥ်က စစ်အစိုးရက ထောင်ဒဏ် ၂၅ နှစ် ချမှတ်ခဲ့သည်။ ဒေါက်တာဇော်မြင့်မောင်သည် နှစ်ပေါင်း ၂၀ ခန့် အကျဥ်းထောင်များအတွင်း ဖြတ်သန်းခဲ့ရပြီး ၂၀၀၉ ခုနှစ်တွင်မှ ပြန်လည် လွတ်မြောက်ခဲ့သည်။
