ရဲခေါင်/People’s Spring
စစ်ကိုင်းတိုင်း၊ ပင်လည်ဘူးမြို့တိုက်ပွဲ စစ်ကူသွားသည့် ဂန့်ဂေါမြို့ခလရ(၅၀)တပ် စစ်ကြောင်းမှ ဗိုလ်မှူးနှစ်ဦးအပါအဝင် ၁၀ဦးထက်မနည်းသေဆုံးကြောင်း ဒေသခံသတင်းရင်းမြစ်က လူထုနွေဦးသို့ ပြောသည်။
စက်တင်ဘာ ၂၂ ရက်တွင် ဂန့်ဂေါမြို့ ခလရ(၅၀)မှ အင်အား ၅၀ခန့်ကို ရဟတ်ယာဥ်ဖြင့်ခေါ်ဆောင်ပြီး ပင်လည်ဘူးမြို့သို့ ပို့ဆောင်ခဲ့ခြင်းဟု ဆိုသည်။
Public Service Announcement
ထို့နောက် ပင်လည်ဘူးမြို့မြေပြင်တိုက်ပွဲအတွင်း ခလရ(၅၀)မှ ဗိုလ်မှူး ခန့်မင်းကိုမှာ စက်တင်ဘာ ၂၇ ရက်တွင် ကျည်ထိမှန်သေဆုံးပြီး စက်တင်ဘာ ၂၉ ရက်တွင်လည်း ဗိုလ်မှူးဖြိုးကိုကိုဦး သေဆုံးခဲ့ကြောင်း ဒေသခံသတင်းရင်းမြစ်များက ပြောသည်။
” ခုစစ်ကူပို့ခံလိုက်ရတဲ့သူတွေထဲက ၁၀ ယောက်ကျော် ကျသွားပြီလို့တော့ သိရတယ်။ ဖြိုးကိုကိုဦးဟာ စက်တင်ဘာလ ၂၇ ရက်နေ့ကတည်းက ဒဏ်ရာရခဲ့တာ။ စက်တင်ဘာ ၂၉ ရက်နေ့မှာသေဆုံးသွားခဲ့တာဖြစ်ပါတယ်”ဟု ဂန့်ဂေါမြို့ခံ ကိုဘကောင်းက ပြောသည်။
လက်ရှိတွင် ဂန့်ဂေါမြို့ခလရ (၅၀)၌ တပ်ရင်းမှူး၊ ဒုတပ်ရင်းမှူးများမရှိဘဲ ဗျူဟာမှူးဖြစ်သူကတပ်ကို အဓိကအုပ်ချုပ်နေပြီး တပ်တွင်းသတင်းများပေါက်ကြားမှုကြောင့် ဖုန်းသုံးစွဲမှုများကိုလည်း ကန့်သတ်ထားသည်ဟု ကြားရကြောင်း ၎င်းက အသိပေးသည်။
အမှတ်(၁)စစ်ဒေသနှင့် အမျိုးသားညီညွတ်ရေးအစိုးရ(NUG၊ ကာကွယ်ရေးဝန်ကြီးဌာနကွပ်ကဲမှုဖြင့် PDFနှင့် မဟာမိတ်တပ်များ ထိုးစစ်ဆင်နေသည့် ပင်လည်ဘူးမြို့ရှိ စစ်တပ်စခန်းများအား ယနေ့နံနက်ပိုင်းတွင် အပြီးသတ်သိမ်းပိုက်ပြီး ပင်လည်ဘူးမြို့ကို သိမ်းပိုက်နိုင်ပြီဟု စစ်ရေးသတင်းရင်းမြစ်အချို့က လူထုနွေဦးသို့ ပြောသည်။
သြဂုတ်လလယ်ပိုင်းကစပြီး ပင်လည်ဘူး ၊အင်းတော်၊ထီးချိုင့် မြို့များအား PDFနှင့် မဟာမိတ်တပ်များက တပြိုင်နက် ထိုးစစ်ဆင်ခဲ့ခြင်း ဖြစ်သည်။
အောက်တိုဘာ ၈ ရက်နံနက်အစောပိုင်းတွင် ပင်လည်ဘူးမြို့ကို အပြီးသတ်သိမ်းပိုက်နိုင်ခဲ့ခြင်းဟု စစ်ရေးသတင်းရင်းမြစ် ၃ ဦးက အတည်ပြုသည်။
“စစ်ကိုင်း မြောက်ပိုင်း ပင်လည်ဘူး မြို့ကို KIA/PDF ပူးပေါင်းတပ်ဖွဲ့များ အပြီးသတ် တိုက်ခိုက်သိမ်းပိုက်နိုင်ခဲ့ပါပြီ။ ပင်လည်ဘူးမှာနောက်ဆုံးကျန်နေတဲ့ စခန်းတွေ သိမ်းရတာ ဟုတ်တယ်”ဟု စစ်ရေးသတင်းရင်းမြစ်တစ်ဦးက ပြောသည်။
