ဇေအောင်/People’s Spring
မန္တလေးတိုင်း၊ နွားထိုးကြီးမြို့နယ်၊ ကန်နားနယ်မြေရဲစခန်းတိုက်ခိုက်ခံရ၍ စစ်ကောင်စီက လေကြောင်းပစ်ကူရာ စခန်းအတွင်းဗုံးချမိ၍ အဆိုပါရဲစခန်း ပျက်စီးသွားကြောင်း ဒေသခံများက ပြောသည်။
ယမန်နေ့(အောက်တိုဘာ ၁၁ ရက်) နံနက် ၁၀နာရီခန့်က ကန်နားနယ်မြေရဲစခန်းအား မြင်းခြံခရိုင်တပ်ရင်း (၄)နှင့် တပ်ရင်း (၁၀)တို့က လက်နက်ကြီး၊ ငယ်များဖြင့် ပစ်ခတ်တိုက်ခိုက်ခဲ့ကြောင်း နွားထိုးကြီး PDFတာဝန်ရှိသူက ပြောသည်။
အဆိုပါစခန်းအတွင်း စစ်ကောင်စီတပ်သားနှင့်ရဲ အင်အား ၃၀ခန့်ရှိပြီး နေ့လယ် ၁၂ နာရီခန့်တွင် စစ်ကောင်စီက ဂျက်ဖိုက်တာဖြင့် လေကြောင်း ပစ်ကူများရောက်ရှိလာ၍ ဆုတ်ခွာခဲ့ကြောင်း ၎င်းက ဆိုသည်။
Public Service Announcement
“အထိအခိုက်ကတော့ မသိရသေးပါဘူး။”ဟု နွားထိုးကြီး PDFတာဝန်ရှိသူက ပြောသည်။
လေကြောင်းတိုက်ခိုက်မှု ဗုံးသီးမှာ ရဲစခန်းအတွင်းကျရောက်ပြီး ရဲစခန်းနှင့် ရဲစခန်းမြောက်ဘက် နေအိမ် နှစ်လုံးပျက်စီးခဲ့သည်ဟု နွားထိုးကြီးမြေပြင်သတင်းများဖော်ပြနေသော ရွှေညာမြေက ရေးသားထားသည်။
“သူတို့စခန်းထဲပြန်ကြဲသွားတာ။ စခန်းထဲကအိမ်တော့မီးလောင်သွားတယ်။”ဟု ဒေသခံတစ်ဦးက ပြောသည်။
ထို့အပြင် တိုက်ပွဲများ အချိန်မရွေး ဖြစ်ပွားနိုင်၍ ပြည်သူများ ပြင်စီ-တံတားဦး လမ်းပိုင်းအား အသုံးပြုခြင်း မပြုရန် နွားထိုးကြီး PDFက သတိပေးသည်။
သြဂုတ် ၁၀ရက်က မြင်းခြံခရိုင်အထူးစစ်ဆင်ရေးစတင်ပြီးနောက်ပိုင်း မြင်းခြံ၊ နွားထိုးကြီး၊ တောင်သာမြို့နယ်များရှိ စစ်ကောင်စီတပ်စွဲရာနေရာအများအပြား တိုက်ခိုက်ခံရပြီး စစ်ကောင်စီအုပ်ချုပ်ရေးယန္တရားပါ ပြိုလဲခဲ့သည်။ စစ်အုပ်စုကလည်း ကျေးရွာအများအပြားအား လေကြောင်းတိုက်ခိုက်မှုများ ပြုလုပ်ခဲ့၍ ပြည်သူထိခိုက်သေဆုံးမှုများရှိနေသည်။
