အင်ကြင်း/People’s Spring
မြင်းခြံမြို့တွင် မိုးသည်းထန်စွာရွာသွန်း၍ ဘုရားအုတ်တံတိုင်းပြိုကျပြီး လူတစ်ဦး သေဆုံးခဲ့ကြောင်း သတင်းရရှိသည်။
ယနေ့ (အောက်တိုဘာ ၂၅ရက်)နံနက် ၄ နာရီခွဲခန့်က မန္တလေးတိုင်း၊ မြင်းခြံမြို့ တွင် မိုးသည်းထန်စွာရွာသွန်းမှုကြောင့် အမှတ်(၁၀)ရပ်ကွက်၊ နယ်မြေ(၇)အတွင်းရှိ မဟာဝါဠုကာရာမ သဲပြင်ကျောင်းတိုက်ပိုင် ဘုရားလေးဆူစေတီ၏ အုတ်တံတိုင်းပြိုကျမှုဖြစ်ပွားကြောင်း လူမှုကူညီရေးအဖွဲ့များက ပြောသည်။
Public Service Announcement
ထိုအုတ်တံတိုင်းပြိုကျမှုကြောင့် အမျိုးသားတစ်ဦးသေဆုံးကာ အခြားအမျိုးသားတစ်ဦး ထိခိုက်ဒဏ်ရာရရှိခဲ့ကြောင်း လူမှုကူညီရေးအဖွဲ့များက ပြောသည်။
“သူတို့က ဘုန်းကြီးကျောင်းအုတ်တံတိုင်းဘေး မှာ အဖီဆွဲတဲထိုးနေတာပြောတယ်။ ဒဏ်ရာရတဲ့တစ်ဦးကလည်း စိုးရိမ်ရတယ်။”ဟု မြင်းခြံမြို့ခံတစ်ဦးက ပြောသည်။
ထို့အပြင် မြင်းခြံဘူတာရှိ အမှတ်(၁၆)၊ အမှတ်(၁၇) ရပ်ကွက်များလည်း ရေနစ်မြုပ်နေကြောင်း ဒေသခံများက ပြောသည်။
ဘင်္ဂလားပင်လယ်အော်မှ ဆိုင်ကလုန်းမုန်တိုင်းအရှိန်ကြောင့် စစ်ရေးတင်းမာနေသည့် ကချင် ၊ ချင်း နှင့် စစ်ကိုင်းတိုင်းအပါအဝင် ဒေသအများစု၌မိုးကြီးပြီး လေပြင်းတိုက်ခတ်နိုင်ကြောင်း အမျိုးသားညီညွတ်ရေးအစိုးရ(NUG)၊လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM) က သတိပေးချက်ထုတ်ပြန်ထားသည်။
မုန်တိုင်း၏အရှိန်ကြောင့်ကချင်ပြည်နယ်၊ ချင်း
ပြည်နယ်၊ စစ်ကိုင်းတိုင်းအထက်ပိုင်း၊ မြေလတ်ဒေသများ နှင့် တနင်္သာရီတိုင်း၊ ရန်ကုန်တိုင်း၊ ဧရာဝတီတိုင်း နှင့် ရခိုင်ရိုးမတောင်တန်းတလျှောက် မိုးကြီးခြင်း နှင့် လေပြင်းတိုက်ခတ်ခြင်းများ ဖြစ်ပေါ်နိုင်သည်ဟု MOHADMက အောက်တိုဘာလ၂၃ရက်နံနက်ပိုင်း၌ ခန့်မှန်းထားသည်။
