ဟာနာဆန်/People’s Spring
မကွေးတိုင်း၊ ရေစကြိုမြို့ပေါ်တွင် စစ်ကောင်စီတပ်နှင့် ပျူစောထီးများပစ်ခတ်၍ အလုပ်ပြန်လာသည့် လက်သမားတစ်ဦးသေဆုံးခဲ့ကြောင်း သတင်းရရှိသည်။
အောက်တိုဘာ ၂၅ရက် နေ့လည်က စစ်ကောင်စီတပ်သားများနှင့် ပျူစောထီးများသည် ရေစကြိုမြို့၊ ရေစကြို – ညောက်ဇောက်လမ်းမကြီးပေါ်၌ သေနတ်ပစ်ဖောက်၍ ပြည်သူများစစ်ဆေးနေစဉ် ဆိုင်ကယ်နှစ်ယောက်စီးသူကို တွေ့သဖြင့်လိုက်လံပစ်ခတ်ခဲ့ကြောင်း ရေစကြိုသတင်းအချက်အလက်ကော်မတီ၏ တာဝန်ရှိသူက ပြောသည်။
Public Service Announcement
ထိုသို့ပစ်ခတ်ရာ ဆိုင်ကယ်သမားနှစ်ဦးကို မထိမှန်ဘဲ အလုပ်မှပြန်လာသော လက်သမားဆရာ အသက် (၃၇)နှစ်အရွယ် ကိုဌေးဝင်းဆိုသူ သေနတ်ကျည်ထိမှန်ကာ နေရာတွင် ပွဲချင်းပြီးသေဆုံးသွားခဲ့ကြောင်း ၎င်းက ပြောသည်။
” ကိုဌေးဝင်းက ကလေးသုံးယောက်အဖေ။ မိသားစုကို သူပဲလုပ်ကိုင်ကျွေးနေတာ။”ဟု ရေစကြိုမြို့ခံတစ်ဦးက ပြောသည်။
အောက်တိုဘာ ၅ ရက်ကလည်း ရေစကြိုမြို့ပေါ်နေထိုင်သူ စိုက်ပျိုးရေးလုပ်ကိုင်သည့် အသက်(၁၈)နှစ်အရွယ် ကိုနောင်နောင်ဆိုသူအား စစ်တပ်က ဖမ်းဆီးသတ်ဖြတ်ခဲ့သည်။
ရေစကြိုမြို့ပေါ်တွင် အပြန်အလှန် ပစ်ခတ်မှုများ မကြာခဏဖြစ်ပွားနေပြီး စစ်ကောင်စီက ပြည်သူများကို ငွေညှစ်ခြင်း၊ ဖမ်းဆီးခြင်း၊ သတ်ဖြတ် ခြင်း၊ နေအိမ်များ ဖျက်ဆီးဝင်ရောက်ကာ ပြည်သူပိုင်ပစ္စည်းများ ခိုးယူလုယက် ယူဆောင်ခြင်း၊ အနုကြမ်းစီးခြင်း၊ ဓါးပြတိုက်ခြင်း စသည့် လုပ်ရပ်များ ပြုလုပ်နေပြီး မြို့ခံပြည်သူများ နေ့စဉ် စိုးရိမ်ထိတ်လန့်နေကြရသည်။
