ဟန်နွေ/People’s Spring
ကချင်ပြည်နယ် မိုးမောက်နှင့် ဗန်းမော်မြို့နယ်အကြားတွင် ကချင်လွတ်လပ်ရေးတပ်မတော် (KIA)နှင့် စစ်ကောင်စီတပ်အကြား တိုက်ပွဲပြင်းထန်နေပြီး စစ်ကောင်စီက လေကြောင်းပစ်ကူပေးတိုက်ခိုက်ခဲ့ကြောင်း သတင်းရင်းမြစ်က ပြောသည်။
ပြီးခဲ့သည့်ဩဂုတ်တွင် မိုးမောက်မြို့ အခြေစိုက် ခမရ(၄၃၇)တပ်ရင်းကို KIAက သိမ်းပိုက်ပြီးနောက် စစ်ကောင်စီက ဗန်းမော်မြို့မှတဆင့် မကြာခဏ ထိုးစစ်ဆင်ပြီး ခမရ(၄၃၇)တပ် ပြန်ရရေး ကြိုးပမ်းနေခြင်းဖြစ်သည်။
Public Service Announcement
” ဒီနေ့ကတော့ ဗန်းမော်နဲ့မိုးမောက်ကြား ၇မိုင် အောင်မြေကျေးရွာမှာလည်း KIAနဲ့စစ်ကောင်စီအကြား တိုက်ပွဲတွေပြင်းထန်စွာ ဖြစ်ပွားနေပါတယ်။စစ်ကောင်စီကနေ ဒီကနေ့ ၇မိုင် အောင်မြေကျေးရွာမှာ လေကြောင်းနဲ့ ငါးကြိမ် ဗုံးကြဲ တိုက်ခိုက်ခဲ့တယ်”ဟု ကချင်စစ်ရေးသတင်းရင်းမြစ်က ပြောသည်။
စစ်ကောင်စီသည် ဗန်းမော်မြို့နယ်မှ မိုးမောက်မြို့နယ်သို့ သံချပ်ကားယာဉ်အသုံးပြုပြီး မြေပြင် ထိုးစစ်ဆင်လာရာ KIAက ခုခံတိုက်ခိုက်နေခြင်းဖြစ်သည်ဟု ဆိုသည်။
“လက်နက်ကြီး အပါအဝင် ကုန်းကြောင်းနဲ့ပါ သူတို့ဘက် ဒီနေ့က ပိုမိုပြင်းထန်တဲ့ ထိုးစစ်ဆင်လာခြင်းဖြစ်တယ်။ဒီကနေ့ တိုက်ပွဲမှာ နှစ်ဖက်ထိခိုက်ကျဆုံးမှုများတယ်လို့တော့ ဒေသခံတွေက ပြောဆိုနေကြတယ်”ဟု ကချင်စစ်ရေးသတင်းရင်းမြစ်က ပြောသည်။
